Diospaj angelmi Ezequiasta cuidarca

Asiriocunaca Israelpi tiyaj llajtacunatami ña dueñoyashcacuna carca. Cunanca Asiriapaj rey Senaqueribca Judapi caj llajtacunatapishmi dueñoyasha nirca. Chaimantami cada llajtata llaquichishpa dueñoyacurca. Pero ashtahuantajca Jerusalén llajtatami dueñoyasha nirca. Shinapish Senaqueribca Jehová Dios chai llajtata cuidacushcataca mana yacharcachu.

Jerusalenta ama llaquichichunmi Ezequiasca Senaqueribman achca cullquita pagarca. Cullquita chasquishca jahuapish llaquichinaman richunmi paipaj soldadocunata cacharca. Soldadocuna cꞌuchuyamucujpica Jerusalenpi causajcunaca achcatami mancharircacuna. Chaimantami Ezequiasca: ‘Asiriocunataca ama manchaichijchu. Jehová Diosmi ñucanchijman fuerzata cushpa ayudanga’ nirca.

Senaqueribca Jerusalenpi causajcunamanta burlarichunmi Rabsaqué runata cacharca. Jerusalén canllamantami Rabsaqué runaca: ‘Ezequías pandachichunca ama saquichijchu. Jehová Diosca mana ayudai pudingachu. Ñucanchijmantaca maijan diospish mana quishpichi tucungachu’ nishpa caparirca.

Ezequiasca imata ruranatami Diosta tapurca. Chaimi Jehová Diosca: ‘Rabsaqué nishcataca ama manchaichijchu. Senaqueribca Jerusalentaca mana llaquichingachu’ nirca. Qꞌuipaca Senaqueribca huaquin cartacunatami Ezequiasman cacharca. Chai cartacunapica: ‘Jerusalenman yaicuchun saquichijlla. Jehová Diosca mana quishpichingachu’ nircami. Chaimi Ezequiasca: ‘Tucuicuna canlla Dios cashcata yachachun quishpichihuayari’ nishpa mañarca. Chashna mañajpimi Diosca: ‘Asiriocunaca manataj yaicungachu, ñuca pueblotaca cuidashami’ nirca.

Senaqueribca Jerusalenta dueñoyashataj nishpami yuyashcanga. Pero shuj tuta Dios shuj angelta cachajpimi paica asirio soldadocunapaj carpa huasicunaman rirca. Chaipimi 185.000 soldadocunata huañuchirca. Senaqueribca alli soldadocunata pirdishcamantami paipaj huasiman tigrarca. Chashnami Jehová Diosca Ezequiastapish, paipaj pueblotapish cuidarca. ¿Can Jerusalenpi cashca cashpaca Jehovapi confianguimanchu carca?