Shuj gobiernoca shuj jatun yura shinami can

Shuj tutaca rey Nabucodonosorca shuj muscuita charishpami mancharirca. Chai muscui ima nisha nishcata yachangapajmi yachaj runacunata cayarca. Pero chaitaca ni pi mana huillai tucurcacunachu. Chaimantami reyca Danielhuan parlarca.

Reyca cashnami nirca: ‘Shuj yura cielocama huiñajtami ricurcani. Maimantapish ricunallami carca. Pꞌangacunaca sumajmi carca. Achca granotami charirca. Chai yura llandu ucupica animalcunami siricurcacuna. Ramacunapica pajarocunami causaj carca. Qꞌuipaca shuj ángel cielomanta uriyamushpami: “¡Yurataca pꞌitichij, ramacunatapish pꞌitichij! Saquirij troncotaca allpapi sapicunandij saquichijlla. Fierrohuan, cobrehuan rurashca cadenacunahuan huatashpa saquichij. Chai yurapaj shungu cambiashca cachun. Runapaj shunguta cunapaj randica shuj animalpaj shunguta cuchun. Siete tiempocunacamami chashna tucunga. Tucuicunami Dios Mandaj cashcata yachangacuna. Diosca pai munashcamanmi mandanataca cunga” nishpami caparirca’ nircami.

Chai muscui ima nisha nishcata Jehová Dios huillajpimi Danielca mancharirca. Chaimi Danielca reymanca: ‘Ñuca amito, can muscushcaca canta pꞌiñajcunapi pajtarijpichari alli canman. Pero canpimari pajtaringa. Pꞌitishca jatun yuraca canmari cangui. Mandaj canata saquishpami sacha animalcunahuan qꞌuihuata micushpa causangui. Pero angelca saquirij troncotaca sapindij saquichun nircami. Chaica can cutin mandanatami ricuchin’ nirca.

Shuj huata qꞌuipaca Nabucodonosorca paipaj palacio terraza jahuapimi puricurca. Babilonia llajtata ricushpami: ‘¡Cai jatun llajtataca ñucami rurarcani! ¡Jatun reymi cani!’ nirca. Chashna yuyacujpimi cielomanta shuj rimashca uyarishpaca: ‘¡Nabucodonosor, ña mana mandashpa catinguichu!’ nirca.

Chai ratomi Nabucodonosorca loco tucushpa sacha animal shina tucurca. Chaimi palaciomanta llujshichijpi animalcunahuan causanaman rirca. Paipaj ajchaca aguilapaj plumacuna shinami largota huiñarca. Sillucunapish pajarocunapaj sillu shina tucungacamami huiñarca.

Siete huatacuna qꞌuipaca Nabucodonosor cutin juiciota japijpimi Jehová Diosca cutin Babiloniata mandachun churarca. Chaimi reyca: ‘Jahua pachapi caj Mandaj Jehová Diostami alabani. Pailla Jatun Mandaj cashcataca cunanmi yachani. Paica pai munashcamanmi mandanataca cunga. Jatun tucushcacunatapish pingaipi churanllami’ nircami.