Jesusmi Lazarota causachirca

Jesusca Betaniapimi quimsa alli amigocunata charirca. Paicunaca Lázaro, Marta, Mariapishmi carca. Shuj punllaca Jesusca Jordán yacu chꞌimba ladopi cajpimi Martapish, Mariapish paicunapaj turi Lázaro ungushca cashcamanta chai rato shamuchun nishpa huillanaman cacharcacuna. Shinapish Jesusca ishqui punlla qꞌuipami paita catijcunataca: ‘Betaniaman jacuchij. Lazaroca dormicunmi. Paita rijchachinamanmi rigrini’ nirca. Chaimi apostolcunaca: ‘Dormicushpaca alliyangallami’ nircacuna. Chashna yuyacujpimi Jesusca: ‘Lazaroca huañushcami’ nirca.

Jesús Betaniaman chayajpica Lazaroca ñami chuscu punllacunata huañushca carca. Achcacunami Martata, Mariatapish cushichingapaj rishcacuna carca. Jesús chayashcata uyashpami Martaca callpashpa rirca. Tupashpaca: ‘Jesús, can caipi cashca cajpica ñuca turica mana huañunmanchu carca’ nircami. Chaimi Jesusca: ‘Cambaj turica causaringami. ¿Chaitaca cringuichu?’ nirca. Shina nijpimi Martaca: ‘Causarina punllapi causarinataca crinimi’ nirca. Chaimi Jesusca: ‘Ñucami causachijpish, causaiyujpish cani’ nirca.

Qꞌuipaca Martaca Mariapajman rishpami: ‘Jesusca caipimi’ nirca. Chaimi Mariaca Jesuspajman callpashpa rirca. Gentecunapish Mariata catishpami rircacuna. Ña chayashpaca paipaj ñaupajpi cungurishpami: ‘Jesús, can caipi cashca cajpica ñuca turica mana huañunmanchu carca’ nirca. María huacajta ricushpami Jesuspish llaquirishpa huacarca. Chaita ricushpami gentecunaca: ‘Lazarotaca yallitajmari cꞌuyashca’ nircacuna. Pero maijancunaca: ‘¿Paipaj amigotaca ima nishpashi mana salvarca?’ nircacunami. ¿Imatataj Jesusca ruragrirca?

Jesusca Lazarota churashca jutcumanmi rirca. Chai jutcu jatun rumihuan huichcashca cajpimi Jesusca: ‘Rumita anchuchichij’ nirca. Chaimi Martaca: ‘Ñamari chuscu punlla pasashca, ashnacungamari’ nirca. Rumita anchuchijpimi Jesusca: ‘Yayitu, ñuca mañashcata uyashcamanta pagui ninimi. Can uyaracuj cashcataca yachanimi. Pero can ñucata cachashcata gentecuna crichunmi chashna nini’ nirca. Qꞌuipaca: ‘¡Lázaro, chaimanta llujshimui!’ nishpami caparirca. Chashna nijpimi Lazaroca vendacunahuan pilluchishca llujshirca. Chaimi Jesusca: “Pai purichun vendacunata anchuchichij” nirca.

Chaita ricushpami achcacunaca Jesuspi crircacuna. Pero maijancunaca fariseocunaman huillanaman rircacuna. Chai punllamantami fariseocunaca Jesustapish, Lazarotapish huañuchisha nircacuna. Jesuspaj 12 apostolcunamanta Judas Iscariotemi fariseocunapaj maquipi entregasha nirca. Pacalla rishpa fariseocunataca: ‘¿Jesusta entregajpica imatataj cusha ninguichij?’ nishpami tapurca. Chaimi paicunaca: ‘30 monedacunatami cushun’ nircacuna. Paicuna chashna nijpimi Judasca Jesusta ima shina entreganata yuyaricurca.