Jesusca pai huañushcata yuyarichunmi mandarca

Judiocunaca tucui huatacunami 14 de nisán quillapi Pascuata rurajcuna carca. Egiptomanta Jehová Dios llujchishcata, pai cusha nishca Allpaman pushashcatapish yuyaringapajmi Pascua fiestataca rurajcuna carca. Huata 33-pica Jerusalenpimi Jesuspish, apostolcunapish shuj huasi jahua pisopi Pascuata yuyarircacuna. Qꞌuipami Jesusca: ‘Cancunamantaca shujmi ñucata huañuchichun entreganga’ nirca. Chaimi apostolcunaca: ‘¿Pitaj paica?’ nircacuna. Jesusca: ‘Tandata ñuca pimanmi cuni, paimi can’ nircami. Qꞌuipaca Judas Iscariotemanmi tandata curca. Judasca chai ratomi jatarishcahuan rirca.

Qꞌuipaca Jesusca Diosta mañashpami paihuan saquirij apostolcunamanca tandata chaupishpa curca. Paicunataca: ‘Micuichij, caica ñuca cuerpotami ricuchin. Caitami cancunamanca cusha’ nircami. Copata japishpapish Diosta mañashpami: ‘Cai copamanta ubyaichij. Cai vinoca achcacunapaj juchacunata perdonangapaj ñuca yahuartami ricuchin. Cancunami ñucahuan jahua pachapi mandanguichij. Tucui huatacuna ñucata yuyarishpa catinguichijlla’ nircami. Jesusta catijcunaca pai huañushcata yuyaringapajca chai fechallapitaj ña tutayagrijpimi tandanacunchij. Chai tandanacuitaca Jesús huañushcata yuyarina tandanacui nishpami rijsinchij.

Qꞌuipaca apostolcunaca paicunapuramanta maijan ashtahuan importante cashcatami litunacui callarircacuna. Chaimi Jesusca: ‘Cancunapurapi maijan importante casha nijca mana importante caj shinami cana canguichij’ nirca.

Shinallataj Jesusca: ‘Ñuca amigocunami canguichij. Chaimantami ñuca Yaya imata nishcataca tucuita huillani. Ñallami cielopi caj ñuca Yayapajman tigrasha. Pero cancunaca caipimi saquiringuichij. Ima shinami cancunata cꞌuyarcani. Chashnallataj cancunapurapish caishuj chaishuj cꞌuyanacuichij. Chashnami ñucata catijcuna cashcata yachangacuna’ nircami.

Ña tucuchingapajca Jehová Dios tucui discipulocunata cuidachun, shuj shinalla sumajta causachunmi Jesusca mañarca. Diospaj shutipish alli nishca cachunmi mañarca. Qꞌuipaca Jesuspish, apostolcunapish Jehová Diosta alabashpami cantarcacuna. Chai huashaca llujshircacunallami. Contracuna Jesusta japichunca asha horascunallami faltarca.