Cornelioca espíritu santotami chasquirca

Cesarea llajtapica soldadocunata mandaj Cornelio runami causarca. Paica Jehová Diostaca punllantami mañaj carca. Pobrecunatapishmi ayudaj carca. Cornelio mana judío cajpipish judiocunaca respetajcunami carca. Shuj punllaca Diospaj ángel ricurishpami: ‘Can mañashcacunataca Diosca uyashcami. Cunanca Jope pueblomanta Pedrota pushamuchun cambaj runacunata cachai’ nirca. Chaita uyashpami chai rato quimsa runacunata cacharca. Paicunaca sur ladota rishpaca 50 kilometrocunatami purina carcacuna.

Jope pueblopi cashpaca Pedroca shuj muscuita shinami charirca. Paica judiocuna mana micuchun nishca animalcunatami ricurca. Qꞌuipaca: ‘Micuilla’ nishcatami uyarirca. Chaimi Pedroca: ‘Mapa animalcunataca nunca mana micushcanichu’ nirca. Shinapish chai rimashcaca: ‘Taita Dios chuyayachishcataca ama mapa nichu’ nircami. Qꞌuipaca: ‘Cantaca quimsa runacunami pungupi shuyacuncuna. Paicunahuan rilla’ nishcapishmi uyarirca. Chaimi Pedroca pungucama rishpa chai quimsa runacunataca imapaj shamushcata tapurca. Chashna tapujpimi paicunaca: ‘Soldadocunata mandaj Corneliomi cacharca. Paica paipaj huasiman shamuchunmi nin’ nirca. Chai tutaca Pedroca paihuan saquirichunmi paicunata mañarca. Cayandij punllaca Pedroca huaquin huauquicunandijmi Cesareaman rircacuna.

Pedro chayajpica Cornelioca paipaj ñaupajpimi cungurirca. Chaipimi Pedroca: ‘Jatari. Ñucapish can shinallataj runallami cani. Judiocunapuralla apanacujpipish Diosmi cambaj huasiman ñucata cacharca. Cunanca ñucataca imapaj cayashcata huillahuai’ nirca.

Cornelioca Pedromanca: ‘Chuscu punllacuna huashamanmi Diosta mañacurcani. Chaipimi shuj ángel ricurishpa canta cayachun mañarca. Cunanca Jehová Dios imalla nishcata huillahuai’ nircami. Shina nijpimi Pedroca: ‘Cunanmi intindini Diospaj ñaupajpica tucuicuna chashnallataj cashcata’ nirca. Shinallataj Pedroca Jesusmantami yachachirca. Qꞌuipaca Corneliopish, chaipi cajcunapishmi Diospaj espirituta chasquishpa bautizarircacuna.