Juanca shamuj punllapi imalla tucunatami ricurca

Apóstol Juanca mama cucha chaupipi tiyaj Patmos islapimi prezu carca. Chaipimi Jesusca 16 cutincuna shamuj punllacunapi imalla tucugrishcataca muscuicunapi shina Juanman ricuchirca. Chai muscuicunapica Juanca Diospaj shutita ima shina jatunyachinata, Jesús mandai callarinapaj imata ruranatami ricurca. Shinallataj jahua cielopi shinallataj cai allpapipish Diospaj munai ima shina pajtarinatami ricurca.

Shuj muscuipica Juanca jatun tiyarinapi Jehová tiyacujtami ricurca. Paipaj muyundijpica 24 ancianocunami tiyacurca. Paicunaca yuraj churanacunata, oro coronacunata churashcami carca. Chai jatun tiyarinamantaca rayocunami llujshirca, cꞌulun nishcacunapishmi uyarirca. Chai 24 ancianocunaca Jehovapaj ñaupajpi cungurishpami paita adorarcacuna. Shujtaj muscuipica Juanca tucui pueblocunamanta, tucui laya rimaicunamanta achca gentecuna Jehová Diosta adoracujtami ricurca. Jesús paicunata causaita cuj yacuman michishpa apashcatapishmi ricurca. Caishuj muscuipica Jesús 24 ancianocunahuan mandai callarijtami ricurca. Cutin chaishuj muscuipica Juanca shuj Dragontami ricurca. Chai Dragonca Diablomi can. Jesusca Diablohuan, demoniocunahuan macanacushpami paicunataca cielomanta cai allpaman shitarca.

Shujtaj muscuipica Sión urcupi Malta Ovejapish, 144.000 agllashcacunapish shayacujtami Juanca ricurca. Shinallataj shuj ángel muyundij allpata volacujtami ricurca. Chai angelca: ‘Diosta manchaichij, paita jatunyachichij’ nircami.

Caishuj muscuipica Armagedón nishca macanacuipi Jesuspish, paipaj soldadocunapish Diablopaj ruraicunata tucuchishcatami Juanca ricurca. Tucuri muscuipica cielopipish, allpapipish cajcuna sumajta causacushcata, Diablopish paita catijcunapish chꞌingarishcatami ricurca. Shinallataj tucuicuna Diospaj shutita alli nishpa paillata adoracushcatami ricurca.