Cuerpo Gobernante escribishca carta

Cꞌuyashca huauqui panicuna:

Jehová Diosta adorajcunaca Bibliataca achcatami cꞌuyanchij. Chaimantami Bibliapica mana llullashpa huillaj historiacunata, alli consejocunatapish tarinchij. Shinallataj Jehová Dios familiacunaman cꞌuyaita ricuchishcatapish yachanchij (Salmo 119:105; Lucas 1:3; 1 Juan 4:19). Ñucanchijca Diospaj Shimipi tiyaj valishca yuyaicunataca tucuicuna yachachunmi shungumanta munanchij. Chaimantami cai sumaj libro llujshishcata cushicushpa huillanchij. Cai libroca: “Bibliamanta yachana ñuca libro” nishcami can. Cai libro ima shina cashcatami huillasha ninchij.

Cai librotaca huahuacunapi yuyashpami rurashcanchij. Pero tucuicuna Bibliamanta yachanata munashpaca cai librohuanmi yachai tucunchij. Bibliaca tucuicunapaj cashcamantami cai libropi tiyaj yachaicunamantaca tucuicuna yachai tucunchij. Chashna rurashpaca cushillami causashun.

Cai libroca Bibliapi parlashca punta familiamanta callarishpami huillan. Caipi tiyaj sumaj historiacunataca jahualla, intindinallatami rurashcanchij. Ashtahuanpish casi tucui historiacuna ima shina pajtarishcatami callarishpa churashcanchij.

Cai libropica Bibliamanta japishca historiacuna, dibujocunaca ñaupa tiempopi Diosta sirvijcuna ima shina causashcata, ima shina sintirishcata yuyachunmi ayudan.

Bibliaca Diosta cazujcunamanta, mana cazujcunamantapishmi parlan. Cai libroca paicunamanta imata yachai tucushcata intindichunmi ayudan (Romanos 15:4; 1 Corintios 10:6). Cai libroca 14 partecunatami charin. Cada callari partepimi ashalla shimicunapi imata yachagrishcata huillacun.

Huahuacunata charishpaca paicunahuanmi shuj yachaita liyishca qꞌuipaca dibujocunamantapish parlanacui tucunguichij. Chai qꞌuipaca Bibliapi tiyaj versocunatapishmi liyi tucunguichij. Chashnami cancunapaj huahuacunamanca Biblia imata yachachishcata alli intindichun ayudanguichij. Jatuncunamanpish chashnallatajmi Bibliamanta yachachi tucunguichij.

Cai libro alli shunguta charij tucui gentecunata ayudachunmi munanchij. Chashnami Bibliapi yachachishcacunata paicunapaj causaipi pajtachi tucungacuna. Shinallataj paicunapish Jehová Diosta sirvijcunahuan tandalla adorai tucungacuna.