Millai ungüi japijpi

71 huatacunata charij Linda shuti huarmica: “Doctorpajman rijpica pulmonpipish colonpipish cancerta charishcatami nirca. Ña huañui ñanpi cashca shinami carca. Pero huasiman tigrashpaca: ‘Bueno, cashna ungunataca mana yuyarcanichu, pero ñaupajman catingapajmi esforzarina cani’ nishpami yuyarcani” ninmi.

49 huatacunata charij Elisaca: “Enfermedad nerviosa nishca ungüita charishcamantami ñuca lluqui lado ñahuica dimastij nanachini. Maipica chashna nanaihuan cashcamantami achcata desanimarini. Ñuca sololla cashcata sintishcamantami huañunatapish yuyashcani” ninmi.

Shuj ungushca runami silla de ruedaspi cashpapish paipaj familiahuan cushilla can

SHUJ cꞌuyashca familiata o ñucanchijllatataj shuj millai ungüi japijpimi yallitaj sustarinata pudinchij. Shinallataj yuyaipipish yallitajmi shaicushca sintiri tucunchij. Doctorcunapajman cutin cutin rina cashcamanta, jambicunata randina cashcamanta, chai jambicuna shujtaj laya unguchijpimi yallitaj sustarishca cai tucunchij.

¿Shuj millai ungüita charishpaca imatataj rurai tucunchij? Bibliapi animachij versocunata liyishpa, Yaya Diosta mañashpami tranquilo sintiri tucunchij. Shinallataj familiacuna, amigocuna cꞌuyaihuan ayudajpimi ña mana tanto sustari tucunchij.

¿HUAQUINCUNACA IMATATAJ RURASHCA?

58 huatacunata charij Robertoca: “Shuj millai ungüita charishpaca Yaya Diospi confiangui, paimi ñaupajman catichun ayudanga. Can ima shina sintirishcata paiman parlai. Shinallataj, ‘ñuca familiamanta ahuantangapaj, cai ungüimanta ama dimastij sustaringapaj cambaj espíritu santota cuhuai’ nishpa Yaya Diosta mañangui” ninmi.

Robertoca cashnapishmi nin: “Familiacuna cꞌuyaihuan ayudachunmi minishtinchij. Ñucataca cada punllami ima shina cashcata tapungapaj shuj familia cayan. Shujtaj ladocunamanta amigocunapishmi ñucata animachincuna. Chaimanta alli sintirishpami ñaupajman catisha nini”.

¿Shuj ungushca amigota visitanata yuyacunguichu? Lindaca: “Gentecunaca ungushca cashpapish mana ungushca shinami causashpa catisha nincuna. Chaimantami paipaj ungüimantaca mana siempre parlasha ninga. Shina cajpica shujtaj cosascunamantami parlana canchij” ninmi.

Yaya Dios fuerzata cujpi, Bibliapi animachij versocunata liyishpa, familiacuna amigocuna cꞌuyaihuan ayudajpimi shuj millai ungüita charishpapish ñaupajman cati tucunchij.

Bibliapi tiyaj valishca consejocuna

Diosta mañai

“Mandaj Diostami mashcarcani, paica ñucata uyahuarcami. Tucui ñuca manchaimantami ñucataca quishpichirca. Cai huajcha runaca caparircami, Mandaj Diosca uyarcami” (Salmo 34:4, 6).

Lindaca: “Yaya Dios ñuca ungüita alliyachichunca mana mañanichu. Ashtahuanpish cai ungüita ahuantangapaj fuerzata cuhuai nishpami mañani” ninmi.

Bibliata liyishpa animari

“Caipi causajcunaca: ‘Ungushcami cani’ nishpa pi mana ningacunachu” (Isaías 33:24).

Yaya Dios sumaj causaita cusha nishcata yuyari. Chaipi confiashpami ahuantashpa catingui.

Familiacuna amigocuna ayudachun mañai

“Alli apanacuj runaca paihuan apanacujtaca, tucui causaipimi cꞌuyan. Ima llaqui japijpipish, quiquin huauqui shinami llaquin” (Proverbios 17:17).

Elisaca: “Cambaj amigocuna ayudachun saqui. Maipica sololla sintirishcata, can mañashcacunata Dios mana uyashcatachari yuyangui, pero shujtajcunamantaca amataj caruyaichu” ninmi.