Huañuna yuyaicuna shamujpi
¿CANPISH yallitaj llaquilla sintirishcamanta huañunata yuyashcanguichu? Adrianapish tucuimanta sustarishca cashpami yallitaj llaquilla carca. Doctorpajman rijpica sinchi depresión ungüita charishcatami nirca.
Japón llajtamanta Kaoru shuti runapish paipaj mayorlla yaya mamatami cuidana carca. Paica: “Chai punllacunapica trabajopi caita chaita rurachun nijpimi shaicushca sintirircani. Tiempohuanca micunatapish dorminatapish mana valircanichu. Ama chashna llaquihuan sufringapajmi huañunata munarcani” ninmi.
Nigeria llajtamanta Ojebode shuti runapish: “Siempremi llaquilla carcani, imamantapish huacajllami carcani. Huañunatapishmi yuyaj carcani” ninmi. Adriana, Kaoru, Ojebodepish mana huañurcacunachu. Pero mundo enteropica cada huatami casi 800 mil gentecuna yallitaj llaquilla cashcamanta paicunallataj huañuncuna.
SHUJTAJCUNA AYUDACHUN MAÑAI
Paicunallataj huañuj gentecunamantaca achcacunaca cꞌaricunami can. Chaicunaca pingaimantami shujtajcuna ayudachunca mana mañan. Pero, Jesucristoca, ungushcacunami jambijcunataca mashcancuna nircami (Lucas 5:31). Can yallitaj llaquilla cashpaca mana pingashpami shujtajcuna ayudachun mañana cangui. Depresión ungüita charij achca gentecunaca doctorcuna mandashcata rurashpami alliyashcacuna. Ojebode, Kaoru, Adrianapish doctorcunapajman rishpami cunanca ña alli sintirincuna.
Depresión ungüita alliyachingapajca doctorcunaca huaquin jambicunatami cuncuna. Mana cashpaca psicologopajman richunmi mandancuna. Ungushcacunaca familiacuna, amigocuna paicunata intindichun, pacienciata ricuchishpa ayudachunmi minishtincuna. Pero ashtahuantajca Jehová Diosmi ñucanchij alli amigo can. Paica Bibliahuanmi ñucanchijtaca animachin.
¿IMA HORACA CUSHILLA CAUSASHUNCHU?
Depresión ungüimanta alliyangapajca achca tiempomi minishtirin. Chaimantami ungushcacunaca paicunapaj causaipica huaquin cambiocunata rurana can. Pero, depresión ungüita charishpapish shamuj punllacunapi cushilla causanatami tucui shunguhuan cri tucungui. Ojebode runapish chaitami crin. Paica: “Isaías 33:24 nishcacuna pajtarichunmi shuyacuni. Cai versoca paraíso Allpapica ña ni pi, ‘ungushcami cani’ mana ningachu” ninmi. Yaya Diosca shuj “mushuj allpa pachatami” cusha nin. Chaipica nanaipish, yallitaj llaquilla cana, yallitaj sustarinapish ña mana tiyangachu. Caita yachashpami cushilla cai tucungui (Apocalipsis 21:1, 4). Depresión ungüi, chai laya shujtaj ungüicunapish ña mana ashtahuan tiyangachu. Yallitaj llaquilla, yallitaj sustarishca canataca ña mana yuyarishunllapishchu (Isaías 65:17).