Alli yachachijcuna tucushunchij: Yachachin librota saquishun

Imamantataj caita rurana canchij. ¿Bibliaca imatataj yachachin? nishca librohuanmi achca gentecunaman Bibliamanta yachachinchij. Gentecunaman Bibliamanta yachachingapajca puntapica cai librotami paicunaman saquina canchij. Chaimantami huillacushpaca cai librota ima shina saquinata alli yachana canchij (Prov. 22:29). Cai librota saquingapajca achca yuyaicunami tiyan. Shinapish ñucanchij huillacushca llajtapi, maijan yuyai ashtahuan alli cashcata ricushpami agllai tucunchij.

Ima shinataj caita rurai tucunchij:

Libropaj shuj capitulomanta gentecuna ashtahuan yachana munaita charichun shuj tapuita rurai. Cada capitulomi tapuicunahuan callarin. Chai tapuicunamanta shuj tapuita agllashpami parlai tucungui. Gentecuna ima nishcata uyashca qꞌuipaca Bibliamanta shuj versota rezai. Chai tapuita cutichingapajca ashalla minutocunapi libromanta shuj parrafota yachachi.
Shujtaj yuyai, gentecuna ashtahuan yachana munaita charichunca, página 3 a 6-pimi chꞌican chꞌican yuyaicuna tiyan. Chai yuyaicunamanta Biblia imata yachachishcata libropi ricuchi. Quimsa yuyaicunata ricushun: 1) Noticiacunapi uyashca shuj llaquimanta parlai. Qꞌuipaca libropaj página 3-pi tiyaj tapuicunata ricuchishpa, achca gentecunami cashna tapurin nishpami parlai tucungui. 2) Shamuj punllacunapica alhaja sumaj causai tiyanatami cambaj vecinocunahuan parlacunchij nishpami callari tucungui. Qꞌuipaca página 4, 5-pi tiyaj dibujocunata ricuchishpa: “¿Cai dibujocunamantaca maijantaj ashtahuan pajtarichun munangui?” nishpa tapui. 3) Tucui gentecunahuanmi minishtirishca tapuicunamanta ashallata parlacunchij nishpami callari tucungui. Qꞌuipaca página 6-pi ricurij tapuicunata ricuchispa, maijan tapuitataj yachasha ningui nishpa tapui.
Punta visitapi Bibliamanta yachachishpa callaringapajca, cashnami ni tucungui: “Bibliamanta yachachunmi cai librota tucui vecinocunaman saquicunchij, ¿cai librota rijsinguichu? [Cutichichun saqui.] Ashalla minutocunapimi cai librohuan ima shina Bibliamanta yachai tucushcata ricuchisha nini”.

Cai quillapi caita rurashunchij:

Familiahuan Diosta adorana tutapi cai librohuan ima shina huillanata yachaichij.
Congregacionmanta shujtaj huillajcunahuan huillacushpaca yachachin librota ima shina saquigrishcata parlai (Prov. 27:17). Gentecuna mana uyanata munajpica shujtaj presentacionhuan parlai.