¿Bibliamanta yachachicushpaca imatataj mana rurana cangui?

Ama canlla parlaichu. Yachachicushpaca mana canllachu parlana cangui. Jesusca paicunallataj yuyashpa cutichichunmi tapuicunata rurashpa yachachirca (Mt 17:24-27). Tapuicunahuan yachachishpaca imata crishcata, entendicushcata o mana entendicushcatami ricungui, yachacujpish cushicushpami yachanga (be-S pág. 253 párrs. 3, 4). Tapushpaca cutichichunmi shuyana cangui. Mana cutichi tucujpica ama canllataj cutichichu chaipaj randica shujtaj tapuicunata rurashpa paillataj yuyashpa cutichichun ayudai (be-S pág. 238 párrs. 1, 2). Mushuj yuyaita alli entendichunca ama utca parlaichu (be-S pág. 230 párr. 4).

Ama chai rato tucuita yachachichu. Yachacushca temamanta ama chai rato tucuita yachachichu (Jn 16:12). Parrafomanta shujtaj yuyaicunata parlana alli cajpipish, chaipi yachachishca yuyaillatami yachachina cangui. Mana chashna rurajpica parrafopi yachachishca yuyaitaca mana alli entendingachu (be-S pág. 226 párr. 4 a pág. 227 párr. 1; pág. 235 párr. 3). Yachacuj ña entendijpica shujtaj parrafoman pasanallami cangui.

Ama leyishpalla yachachichu. Leyishpalla yachachinapaj randica yachacushcata shungupi huaquichichunmi ayudana cangui (Lu 24:32). Diospaj Shimica paicunapaj causaitami cambiai tucun, chaimantami minishtishca versocunata leyina cangui (2Co 10:4; Heb 4:12; be-S pág. 144 párrs. 1-3). Entendirinalla chꞌimbapuraicunahuan yachachi (be-S pág. 245 párrs. 2-4). Yachacujcunaca chꞌican chꞌican crishcacunata, huaquin jarcaicunatapishmi charin, chaimantami paicunapi yuyashpa yachachina cangui. Cai tapuicunatapishmi rurai tucungui: “¿Cunan yachacushcamantaca imatataj yuyangui? ¿Jehová Diosmantaca imatataj yachachin? ¿Caipi yachashcata pajtachishpaca ima shinataj causangui?” (be-S pág. 238 párrs. 3-5; pág. 259 párr. 1).