JESÚS SHINA CAUSASHUNCHIJ
Chꞌican chꞌican shimicunapi tandalla huillashunchij
Propio shimipi uyashpami Diosmanta huillajpica gentecunaca cushilla sintirincuna. Chaimantami Jehová Diosca huata 33-pi Pentecostés fiestapica tucui llajtacunapi causashca judiocuna hebreo, griego shimita intindijcuna cajpipish, alli huillaicunata paicunapaj propio shimipi uyachun ayudarca (Hch 2:5, 8). Cunan punllacunapish tauca congregacioncunami chꞌican chꞌican shimicunapi chai ladocunallapitaj huillacuncuna. ¿Yangamanta tiempota, fuerzata ama pirdingapaj, gentecunata ama molestangapajpish congregacioncunaca imatataj rurai tucuncuna?
Alli parlanacuna (Pr 15:22): Superintendente de servicio huauquicuna tandanacushpami cada congregación ima laya huillanata ricuna can. Shujtaj shimita parlaj congregacioncunapi sirvij huauqui panicunaca paicuna huillacushca huasicunapica manachari huillachun ningacuna. Pero achca gentecunaman huillana cashcamanta mana avanzashpaca, tucui huasicunapi callarishpa huillachun, pipish Bibliamanta yachasha nijpi utca yachaj chayachichunchari mañangacuna (od-S pág. 93 párr. 37). Mana cashpaca paicunapaj shimipi parlaj gentecunata mashcashpa ayudachunchari mañangacuna. Chashnami maijan huasicunapi huillana cashcata yachangacuna (km-S 7/12 pág. 5, recuadro). Shuj huasillapitaj ishqui o ashtahuan shimicunata parlaj gentecunami tiyanga. Ashtahuanpish gentecuna maipi causashcata, ima shuti cashcata, ima shimita parlashcatapish anotangapajca leycunatami pajtachina canchij.
Shujlla shina ayudarina (Ef 4:16): Superintendente de servicio huauqui nishcatami catina canchij. ¿Shujtaj shimita parlajcunaman ñucanchij shimipi Bibliamanta yachachicunchijchu? Gentecuna ashtahuan intindichunca paicunapaj shimipi shuj huauqui o pani yachachichunmi mañana canchij.
Alli prepararina (Pr 15:28; 16:1): Shujtaj shimita parlaj gentecunata tupashpaca, paicunamanpish huillangapajmi esforzarina canchij. Alli prepararishca cangapajca ima shimicunallata ñucanchij causashca llajtapi parlashcatami yachana canchij. Bibliata, videocunatapishmi chai shimicunapi descargai tucunchij. Shinallataj JW Language aplicacionpimi huaquin palabracunata saludangapaj yachai tucunchij.