Yayitu Diosca tucuicuna arrepintirichunmi munan

1. ¿Shungumanta arrepintirishcataca ima shinataj ricuchinchij?

IMA mana allita rurashpaca arrepintirinami canchij. Bibliapi nishca shinaca shungumanta arrepintiringapajca puntapica ñucanchij ruracushca juchatami pꞌiñana canchij. Chai huashaca chaita ruranata saquishpami ama cutin chaillapitaj urmangapaj esforzarina canchij (ashtahuan yachangapajca Traducción del Nuevo Mundo Bibliapi tiyaj diccionariopi “arrepintirina” nishca shimita mashcai).

2. ¿Imamantataj tucuicuna shungumanta arrepintirinamanta yachana canchij? (Nehemías 8:​9-11).

² ¿Imamantataj tucuicuna arrepintirinamanta yachana canchij? Adán y Evapaj huahuacuna cashcamantami tucuicuna juchayujcuna canchij. Chaimantami punllanta pandarinchij (Romanos 3:23; 5:12). Jehová Diosta alli sirvijcunapishmi juchapi ama urmangapaj sinchita esforzarishcacuna. Por ejemplo, apóstol Pablomi chaita rurarca (Romanos 7:​21-24). Pero ¿juchayujcuna cashcamanta tucui vidachu llaquirishpalla causana canchij? Mana. Jehová Diosca cꞌuyaj cashcamantami ñucanchijcuna cushilla causachun ayudasha nin. Nehemiaspaj punllacunapi causaj israelitacunapi yuyashun (Nehemías 8:​9-11-ta liyipai). Paicunaca ñaupa punllacunapica achcatami pandarishcacuna carca. Shinapish Yayitu Diosca paicuna ima shina pandarishcata yuyarishpalla causachunca mana munarcachu. Ashtahuanpish paita cushicuihuan sirvichunmi munarca. Shinashpaca ñucanchij juchacunamanta arrepintirishpaca cushillami causashun. Yayitu Diosca cꞌuyaj cashcamantami ñucanchijta perdonanga.

3. ¿Cai yachaipica imatataj yachashun?

³ Cai yachaipica juchacunamanta arrepintirinamantami yachashun. Puntapica arrepintirinamanta Jehová Dios israelitacunaman imata yachachishcatami yachashun. Chai qꞌuipaca gentecuna arrepintirichun Jehová Dios ima shina ayudashcatami ricushun. Tucuchingapajca Jesusta punta catijcuna arrepintirinamanta imata yachashcatami yachashun.

DIOSCA ARREPINTIRINAMANTAMI ISRAELITACUNAMANCA YACHACHIRCA

4. ¿Jehová Diosca arrepintirinamantaca israelitacunamanca imatataj yachachirca?

⁴ Jehová Dios israelitacunaman mandashcacunata cujpica paicunaca chai mandashcacunata cazunatami ari nircacuna. Chai ari nishcata pajtachijpica Jehová Diosca ‘cancunataca cuidashami, bendiciashami’ nircami. Shinallataj Yayitu Diosca: ‘Cunan ñuca cancunaman cushca mandashcacunaca jahualla pajtachinallamari, pipish pajtachi tucunllami. Cancunamanta mana carupichu’ nircami (Deuteronomio 30:​11, 16). Pero Jehová Diosca ‘ñucamanta caruyashpa rurashcalla dioscunata adorajpica cancunataca ña mana cuidashachu’ nircami. ¿Israelitacunaca Diospaj ñaupajpi cutin alli ricuringapajca imatataj rurana carca? Paicunaca Jehová Dios ima nishcata uyashpami paipajman tigrana carcacuna (Deuteronomio 30:​1-3, 17-20). Jehová Diosca ‘cancunapaj juchacunamanta arrepintirijpica ñucaca cancunapajman cꞌuchuyashpami cutin ayudasha’ nircami.

5. ¿Israelitacuna paimanta caruyajpica Jehová Diosca pacienciata charishcataca ima shinataj ricuchirca? (2 Reyes 17:​13, 14).

⁵ Jehová Dios agllashca puebloca paipaj contrami tucurca. Paicunaca rurashcalla dioscunata adorashpa, millai cosascunata rurashpami causarcacuna. Chaimantami llaquicunata aparcacuna. Pero Jehová Diosca paipajman tigrachunmi paicunata ayudashpa catirca. Chaimi profetacunata cacharca. Profetacunami israelitacuna paicunapaj juchacunamanta arrepintirishpa Jehová Diospajman tigrachun animarcacuna (2 Reyes 17:​13, 14-ta liyipai).

6. ¿Israelitacuna juchacunamanta arrepintirina importante cashcata intindichunca Jehová Diosca ima shinataj ayudarca? (Fotomantapish parlapai).

⁶ Jehová Diosca profetacunata cachashpami israelitacuna arrepintirichun ayudaj carca. Por ejemplo, Jehová Dios yuyaita cujpimi Jeremiasca, ‘mana cazuj Israel ñucapajman tigrari. Ñucaca ña mana ashtahuan pꞌiñarishpa llaquichishachu. Ñucaca llaquij Diosmari cani, mana huiñaita pꞌiñalla cashachu. Ñucatamari mana cazushpa pꞌinachircangui. Chai juchata rijsiyari’ nirca (Jeremías 3:​12, 13). Shinallataj Jehová Dios yuyaita cujpimi profeta Joelca, ‘llaquirishpa tucui shunguhuan ñucapajman cutirichij’ nishpa quillcarca (Joel 2:​12, 13). Cutin, profeta Isaiasca, “maillarichij, chuyayaichij. Ñuca ñaupajpi cancuna millaita rurashcata anchuchichij. Millaita ruranata saquichij” nircami (Isaías 1:​16-19). Jehová Diosca Ezequieltapish cashna nishpa quillcachunmi mandarca: ‘Ñucaca ñucata mana manchaj runa huañuchunca, mana munanichu. Millaita ruranata saquishpaca causanguichijmi’ nircami (Ezequiel 18:​23, 32). Jehová Diosca gentecuna huiñai huiñaita causachunmi munan. Chaimantami gentecuna arrepintirijpica cushilla sintirin. Pero ¿juchayujcuna arrepintirishpa paicunapaj causaita cambiajllapichu Jehová Diosca paicunataca ayudai callarin? Mana. Huaquin ejemplocunata ricushun.

7. ¿Jehová Diosca Oseasmanta, paipaj huarmimanta parlashpaca israelitacunamanca imatataj yachachirca?

⁷ Jehová Diosca profeta Oseasmanta, paipaj huarmi Gomermanta parlashpami ima shina perdonaj cashcata yachachirca. Oseaspaj huarmi Gomerca shujtaj cꞌaricunahuanmi huainayashca carca. ¿Jehová Diosca Gomerca mana nunca cambiangachu nishpachu yuyashcanga? Mana. Jehová Diosca cada unopaj shungu ima shina cashcatami yachan. Chaimantami Oseasmanca: ‘Shujtaj cꞌarihuan cꞌuyanacushpa huainayashpa causacuj cambaj huarmita cꞌuyagri. Israelitacunaca chai shinallatajmi Mandaj Diosta saquishpa shujtaj dioscunata adorancuna. Chashna cajpipish Mandaj Diosca cꞌuyanmi’ nirca (Oseas 3:1; Proverbios 16:2). Oseaspaj huarmica juchata ruranataca manaraj saquishcachu carca. Shinapish Jehová Diosca paita perdonashpa paihuan cutin alli tucuchunmi Oseastaca mandarca.a Chashna layallatajmi Yayitu Diosca israelitacuna achca juchacunata rurashca cajpipish paicunata cꞌuyanataca manataj saquirca. Ashtahuanpish paica paicunapaj juchacunamanta arrepintirishpa paipajman tigrachunmi ayudarca. Shinashpaca ¿shuj runa jatun juchata ruracujpipish Yayitu Diosca maquita chutaj shina paipaj juchamanta arrepintirichun ayudai tucunchu? (Proverbios 17:3).

¿JUCHATA RURAJCUNA ARREPINTIRICHUNCA JEHOVÁ DIOSCA IMA SHINATAJ AYUDAN?

8. ¿Jehová Diosca Caintaca ima shinataj ayudarca? (Génesis 4:​3-7; fotomantapish parlapai).

⁸ Adán Evapaj punta churi Cainca paicuna layallatajmi juchayuj carca. Bibliapi nishca shinaca paipaj ruraicunaca millaimi carca (1 Juan 3:12). Chaimantachari Caín shuj ofrendata cujpica Jehová Diosca mana chasquirca. Jehová Dios paipaj ofrendata mana chasquijpica Cainca paipaj yuyaita cambianapaj randica achcata pꞌiñarishpami yallitaj llaquilla sintirirca (Génesis 4:​3-7-ta liyipai). Chaita ricushpaca Yayitu Diosca cꞌuyaihuanmi Caintaca: ‘Allita rurajpica cantaca bendiciashami. Pero pꞌiñarinata mana saquishpaca mana alli ruraicunapimi urmangui’ nirca. Shinapish Cainca Yaya Diostaca mana uyasha nircachu. Paipaj juchacunamanta arrepintirichun Jehová Dios paita ayudachunpish mana saquircachu. Pero ¿Caín paita mana uyajta ricushpaca Jehová Diosca juchata rurajcunata ayudanatachu saquirca? Mana.

9. ¿Rey David arrepintirichunca Jehová Diosca ima shinataj ayudarca?

⁹ Jehová Diosca rey Davidtaca achcatami cꞌuyarca. Chaimantami “Davidmi ñuca shunguta cushichin” nirca (Hechos 13:22). Shinapish Davidca jatun juchacunapimi urmarca. Paica cazarashca huarmihuanmi huainayarca. Culpata mana charij runatapishmi huañuchirca. Moisesman cushca leypi mandashca shinaca Davidca chaita rurashcamantami huañuna carca (Levítico 20:10; Números 35:31). Shinapish Jehová Diosca cꞌuyaihuanmi David arrepintirichun ayudarca.b David arrepintirishca cashcata manaraj ricuchijpipish Jehová Diosca profeta Natantami paihuan parlachun cacharca. Natanca shuj ejemplota churashpami Davidpaj shunguman chayarca. Chaimi Davidca achcata llaquirishpa arrepintirirca (2 Samuel 12:​1-14). Chai qꞌuipaca arrepintirishca cashcata ricuchingapajmi shuj salmota quillcarca (Salmo 51-paj callari parte). Chai Salmota liyishpami maijancunaca paicunapaj juchacunamanta arrepintirishcacuna. ¿Jehová Dios David arrepintirichun ayudashcamantaca manachu cushilla sintirinchij?

10. ¿Jehová Dios pacienciata charij, perdonaj cashcata yachashpaca ima shinataj sintiringui?

¹⁰ Jehová Diosca tucui laya juchacunatami pꞌiñan (Salmo 5:​4, 5). Shinapish paica ñucanchijtaca achcatami cꞌuyan. Chaimantami juchapi urmajpica ñucanchijta ayudasha nin. Shinallataj Yayitu Diosca jatun juchacunata rurajcunatapish arrepintirichun, paipajman cꞌuchuyachunmi ayudasha nin. Chaita yachashpaca cushillami sintirinchij. Jehová Dios achca pacienciata charij, perdonaj cashcata yachashpaca paita cazungapajmi esforzarisha ninchij. Shinallataj ima juchata rurashpaca utca arrepintiringapajmi esforzarishun. Cunanca Jesús paita catijcunaman arrepintirinamanta imata yachachishcatami yachashun.

¿JESUSCA ARREPINTIRINAMANTA PAITA CATIJCUNAMANCA IMATATAJ YACHACHIRCA?

11, 12. ¿Jesusca Jehová Dios perdonaj cashcata yachachingapajca ima parlotataj parlarca? (Fotomantapish parlapai).

¹¹ Punta siglopica Mesías ricurina tiempomi chayashca carca. Yachai 31-pi yachashca shinaca Jehová Dios yuyaita cujpimi Bautizaj Juanpish, Jesuspish gentecuna paicunapaj juchacunamanta arrepintirina cashcata yachachircacuna (Mateo 3:​1, 2; 4:17).

¹² Jesusca cai Allpapi cashpaca Jehová Dios gentecunapaj juchacunata perdonangapaj listo cashcatami yachachirca. Caita alli intindichingapajca chingarishca churimantami shuj parlota parlarca. Chai churica huasimanta rishpaca mapa ruraicunata rurashpami causai callarirca. Shinapish “ña yuyaita japishpaca” paipaj yayapaj huasimanmi tigrarca. ¿Yayaca churita ricushpaca imatataj rurarca? Jesusca ‘churi caruta shamucujpirajmi yayaca paita ricushpa achcata llaquirirca. Chaimi paita tupanaman callpashpa rirca. Ña tupashpaca cꞌuyaihuanmi ugllashpa mucharca’ nircami. Churica paipaj yaya paita perdonachunca mana shuyarcachu. Chaimi, ‘¿cambaj huasipi sirvij shinalla trabajai tucunichu?’ nishpa tapurca. Shinapish yayaca ‘caimi ñuca cꞌuyashca churi’ nishpa cutin paipaj familiapi chasquirca. Shinallataj yayaca ‘ñuca churica chingarishcami carca, cunanca tigramushcamari’ nircami (Lucas 15:​11-32). Jesusca manaraj cai Allpaman shamushpaca juchata rurajcuna arrepintirijpi Yaya Dios ima shina cꞌuyaihuan perdonaj cashcatami ricushcanga. Chaimantami cai parlomanta parlashpa Jehová Dios yallitaj cꞌuyaj, llaquij cashcata intindichirca.

13, 14. a) ¿Pedroca Jehová Dios shungumanta perdonaj cashcataca ima shinataj yacharca? b) ¿Pedroca perdonanamantaca shujtajcunamanca ima shinataj yachachirca? (Fotomantapish parlapai).

¹³ Apóstol Pedroca arrepintirinamanta, perdonanamantami achcata yacharca. Pedro achca cutincuna pandarijpipish Jesusca siempremi paitaca cꞌuyaihuan perdonarca. Por ejemplo, Jesusta quimsa cutin negashca qꞌuipaca Pedroca yallitaj llaquillami sintirirca (Mateo 26:​34, 35, 69-75). Pero Jesusca causarishca qꞌuipaca Pedromanmi ricurirca. Chai ratoca Pedroca paillami cashcanga (Lucas 24:​33, 34; 1 Corintios 15:​3-5). Jesusca Pedroman ricurishpaca paita perdonashcatami huillarca. Shinallataj cꞌuyaihuanmi tranquilo sintirichun ayudarca (Marcos 16:7).

¹⁴ Pedroca arrepintirina, perdonana ima cashcataca allimi intindirca. Chaimantami shujtajcunamanpish chaita yachachi tucurca. Por ejemplo, Pentecostés fiesta qꞌuipaca Jehová Diosta mana cazuj judiocuna Mesiasta huañuchishcata intindichingapajmi shuj conferenciata curca. Paica cꞌuyaihuanmi judiocunamanca “arrepintirichij, cancunapaj mana alli ruraicunamanta tigrarichij. Chashna rurajpimi Jehová Diosca paillataj cancunapaj juchacunata perdonanga, sumaj causaitapish cancunapaj apamunga” nishpa yachachirca (Hechos 3:​14, 15, 17, 19). ¿Chaita nishpaca Pedroca imatataj nisha nirca? Shungumanta arrepintirijcunaca paicunapaj yuyaitami cambiana can. Chaipajca millai cosascunata mana rurana cashcata intindishpami chaita ruranata saquina can. Chai qꞌuipaca Jehová munashca shina causangapajmi esforzarina can. Shinallataj Pedroca Jehová Diosca ñucanchij juchacunata tucuita borraj shinami perdonan nircami. Achca huatacuna qꞌuipapish Pedroca ‘Jehová Diosca shujllapish ama chingarichun, ashtahuanpish tucuicuna arrepintirichunmi cancunamanca pacienciata ricuchin’ nircami (2 Pedro 3:9). Shinashpaca jatun juchacunata rurashca cajpipish shungumanta arrepintirijpica Yayitu Diosca ñucanchijta perdonangami. Chaita yachashcamantami cushilla sintirinchij.

15, 16. a) ¿Apóstol Pabloca Jehová Dios perdonaj cashcataca ima shinataj yacharca? (1 Timoteo 1:​12-15). b) ¿Catij yachaipica imatataj yachashun?

¹⁵ Manaraj Jesusta cati callarishpaca Pabloca achca mana allicunatami rurashca carca. Por ejemplo, paica Jesusta catijcunatami catirashpa llaquichishca carca. Chaimi Jesusta catijcunaca Pabloca nunca mana cambiangachu nishpa yuyashcangacuna. Shinapish Jesusca Pablo arrepintirishpa cambiai tucushcatami yacharca. Paipish, Jehová Diospish Pablo alli cualidadcunata charishcatami ricurcacuna. Chaimi Jesusca ‘ñucamanta huillachunmi Pablota agllashcani’ nirca (Hechos 9:15). Jesusca Pablo arrepintirichunca shuj milagrotapishmi rurarca (Hechos 7:58–8:3; 9:​1-9, 17-20). Pabloca arrepintirishca qꞌuipaca Jesustami cati callarirca. Chaimi Jesusca paitaca apóstol cachun nombrarca. Pabloca Jehová Diospish, Jesuspish paita perdonashcamanta achca agradecido cashcatami siempre nij carca (1 Timoteo 1:​12-15-ta liyipai). Shinallataj Pabloca, ‘Jehová Dios cancunata llaquishpa arrepintirichunmi ayudacun’ nircami (Romanos 2:4).

¹⁶ Corinto congregacionmanta shuj huauqui mapa ruraicunata ruracujpipish congregacionpi cachunmi saquishcacuna carca. ¿Chaita yachaj chayashpaca Pabloca imatataj rurarca? Chaitaca catij yachaipimi yachashun. Chashnami Jehová Dios disciplinashpapish cꞌuyaita ricuchij cashcata intindishun. Shinallataj juchata rurajcuna arrepintirijpi Jehová Dios paicunata llaquishpa ima shina ayudaj cashcatami yachashun.