Ancianocuna, juchata rurajcunata llaquishpa cꞌuyaihuan trataichij

1. ¿Romanos 2:​4-pica imatataj yachachin?

YACHAI 33-pica Corinto congregacionpi shuj runa jatun juchata rurashpa causacushcatami yacharcanchij. Apóstol Pabloca chai runa mana arrepintirisha nishcamantami congregacionmanta llujshichichun mandarca. Shinapish Romanos 2:​4-pi nishca shinaca Jehová Diosca juchata rurajcuna arrepintirichunmi ayudai tucun. Chaipajca ancianocunatami utilizan.

2, 3. a) ¿Shuj huauqui o pani jatun juchata rurashcata yachaj chayashpaca imatataj rurana canchij? b) ¿Imamantataj chaitaca rurana canchij?

² ¿Maijan huauqui o pani jatun juchata rurashcata yachaj chayashpaca imatataj rurana canchij? Ancianocunaca chai huauqui o pani jatun juchata rurashcata mana yachashpaca paitaca mana ayudai tucungacunachu. Chaimantami ancianocunapaj ayudata mashcachun paitaca animana canchij (Isaías 1:18; Hechos 20:28; 1 Pedro 5:2).

³ Pero ¿juchata ruraj huauqui o pani ancianocunahuan mana parlasha nijpica imatataj rurana canchij? Ñucanchijllatajmi chai huauqui o pani imata rurashcata ancianocunaman huillana canchij. Ancianocuna paita ayudai tucushcata yachashcamantami chaitaca rurana canchij. Juchata ruraj huauqui o pani ayudata mana chasquishpaca Jehová Diosmantaca ashtahuanmi caruyanga. Shinallataj congregaciontami pingaipi churanga. Chaimantami mana manchashpa pai imata rurashcata ancianocunaman huillana canchij. Chashnami Jehová Diostapish, chai huauquita o panitapish cꞌuyashcata ricuchishun (Salmo 27:14).

¿ANCIANOCUNACA JUCHATA RURAJCUNATACA IMA SHINATAJ AYUDANCUNA?

4. ¿Ancianocunaca jatun juchata rurajhuanca imamantataj tandanacuncuna?

⁴ ¿Maijan huauqui o pani jatun juchata rurajpica ancianocunaca imatataj rurancuna? Congregacionmanta tucui ancianocuna tandanacushpami paicunapuramanta quimsa ancianocunata chai huauquita ayudachun agllancuna. Chai quimsa ancianocunataca comité de ancianosa nishpami rijsinchij. Chai ancianocunaca humildesmi cana can. Shinallataj juchata ruraj arrepintirichun paita mana obligai tucushcatapishmi yuyarina can (Deuteronomio 30:19). Rey Davidca shungumantami paipaj pandarishcacunamanta arrepintirirca. Shinapish mana tucuicunachu pai shina arrepintiringacuna. Ancianocunaca chaitapishmi yuyaipi charina can (2 Samuel 12:13). Tal vez maijancunaca Jehová Dios cunashcataca mana chasquisha ningacunachu (Génesis 4:​6-8). Chashna cajpipish juchata ruraj arrepintirichun ayudangapajmi esforzarina can. ¿Anciano huauquicunaca juchata rurajhuan tandanacushpaca imatataj yuyaipi charina can?

5. ¿Ancianocunaca juchata rurajhuan tandanacushpaca paitaca ima shinataj tratana can? (2 Timoteo 2:​24-26; fotomantapish parlapai).

⁵ Juchata rurajcunaca Jehová Diospaj ñaupajpica chingarishca ovejitacuna shinami can. Paicunaca paipajca achca valishcami can (Lucas 15:​4, 6). Chaimantami ancianocunaca juchata rurajhuan tandanacushpaca paitaca mana sinchi shimicunahuan rimana can. Shinallataj paitaca mana maipishcachun tratanachu can. Paicunata ayudangapaj obligadollamanta tandanacuna cashcatapish mana yuyanachu can. Chaipaj randica sumaj cualidadcunatami ricuchina can (2 Timoteo 2:​24-26-ta liyipai). Ancianocunaca mana pꞌiñarishpa, cꞌuyaihuan, alaja shimicunahuanmi juchata rurajpaj shunguman chayangapaj esforzarina can.

6. ¿Ancianocunaca juchata rurajhuan manaraj tandanacushpaca imatataj rurana can? (Romanos 2:4).

⁶ Ancianocunaca juchata rurajhuan tandanacungapajmi alli allichirina can. Apóstol Pablo nishcatapishmi yuyarina can. Paica: “¿Dios canta llaquishpa arrepintirichun ayudacushcataca manachu cuentata cungui?” nircami (Romanos 2:​4-ta liyipai). Shinallataj ancianocunaca Jesús churashca michijcuna cashcatami yuyarina can. Chaimantami Jesuspaj ejemplota catingapaj esforzarina can (Isaías 11:​3, 4; Mateo 18:​18-20). Juchata rurajhuan manaraj tandanacushpaca comité de ancianospi caj ancianocunaca Jehová Diostami: “Juchata ruraj arrepintirichun ayudangapaj ayudahuai” nishpa mañana can. Shinallataj Bibliapi, publicacioncunapi juchata rurajta ima shina ayudanata estudiashca qꞌuipaca alli yachaita charingapajmi Yaya Diosta mañana can. Chai qꞌuipaca juchata rurajpaj causai ima shina cashcatami intindina can. Chashnami chai huauqui o pani imamanta juchapi urmashcata intindingacuna (Proverbios 20:5).

7, 8. ¿Ancianocunaca Jehová Diospaj ejemplota caticushcataca ima shinataj ricuchincuna?

⁷ Ancianocunaca Jehová Dios shinami pacienciata ricuchina can. Paicunaca juchata rurajcunata Jehová Dios ima shina trataj cashcatapishmi yuyarina can. Por ejemplo, Jehová Diosca pacienciahuanmi Caintaca: ‘Cambaj yuyaita cambiashpaca ñuca ñaupajpica allimi ricuringui. Pero mana cambiashpaca llaquicunatami charingui’ nishpa advirtirca (Génesis 4:​6, 7). Shinallataj Jehová Diosca Davidta consejachunmi profeta Natanta cacharca. Natanca shuj chꞌimbapuraita churashpami David arrepintirichun ayudarca (2 Samuel 12:​1-7). Israelitacuna paimanta caruyajpipish Jehová Diosca ‘huashan huashan’ profetacunata cachashpami paicunataca ayudarca (Jeremías 7:​24, 25). Jehová Diosca paipaj pueblo manaraj arrepintirijpipish shungumanta arrepintirichunmi paicunataca ayudashpa catirca.

⁸ Anciano huauquicunaca juchata rurajcunataca Jehová Dios shinami cꞌuyaihuan tratana can. Shinallataj 2 Timoteo 4:​2-pi nishca shinaca ‘pacienciatami’ ricuchina can. Juchata rurajtaca paipaj yuyaita cambiachun ayudasha nishpaca ancianocunaca mana rato pꞌiñarishpami ayudana can. Rato pꞌiñarijpi o sinchi shimicunahuan rimajpica juchata rurajca manachari uyasha ninga. Arrepintirinatapish manachari munanga.

9, 10. ¿Ancianocunaca juchata ruraj mana allita rurashcata cuentata cuchunca paitaca ima shinataj ayudana can?

⁹ Ancianocunaca juchata ruraj huauqui o pani imamanta juchapi urmashcatami intindina can. Por ejemplo, ¿Bibliata estudianata saquishcamanta, predicacionman llujshinata saquishcamantachu Diosmantaca asha asha caruyarca? ¿Yaya Diosta punllanta mañanatachu saquirca? ¿Jehová Diostaca jahua jahuallachu mañan? ¿Mapa ruraicunapi ama urmangapajchu esforzarinata saquirca? ¿Diversioncunata, pihuan apanacunatapish mana alli yuyashpa agllashcamantachu paipaj yuyaita cambiarca? ¿Mana alli ruraicunata rurashcamanta, mana alli decisioncunata japishcamanta Diospaj ñaupajpi mana alli ricurishcatachu reconocin?

¹⁰ Juchata rurajca imamanta Jehová Diosmanta caruyashcatami intindina can. Chaipajca ancianocunaca paitaca tapuicunatami rurana can. Pero paipaj causaipi mana yallitaj satirishpami alli yuyashpa imatapish tapuna can (Proverbios 20:5). Shinallataj mana allita rurashcata cuentata cuchunca Natán shinami alaja chꞌimbapuraicunata churashpa intindichi tucuncuna. Ancianocuna punta cutin juchata rurajhuan tandanacujpica tal vez paica juchata rurashcamantami llaquilla sintiri callaringa. Mana cashpaca chai punta tandanacuillapitajmi tal vez shungumanta arrepintiringa.

11. ¿Jesusca juchayujcunataca ima shinataj tratarca?

¹¹ Ancianocunaca Jesuspaj ejemplota catingapajmi esforzarina can. Por ejemplo, Jesusca alli yuyashpami Saulotaca shuj tapuita rurarca. Paica: “Saulo, Saulo, ¿ima nishpataj ñucataca catirashpa llaquichicungui?” nishpami tapurca. Chai tapuita rurashpami Jesusca Saulo mana allita ruracushcata cuentata cuchun ayudarca (Hechos 9:​3-6). Cutin Jezabel huarmimanta parlashpaca Jesusca: ‘Arrepintirichunmi paimanca tiempota curcani’ nircami (Apocalipsis 2:​20, 21).

12, 13. ¿Ancianocunaca juchata rurajta arrepintirichun ayudangapajca imatataj rurai tucuncuna? (Fotomantapish parlapai).

¹² ¿Ancianocunaca Jesús shinaca imatataj rurana can? Paicunaca: “Cai huauqui, cai panica paipaj juchacunamantaca manataj arrepintiringachu” nishpaca mana yuyanachu can. Maijancunaca ancianocuna punta cutin paicunahuan tandanacujpimi ña shungumanta arrepintirincuna. Cutin shujtajcunaca arrepintiringapajca ashtahuan tiempotachari minishtingacuna. Chaimantami ancianocunaca juchata rurajta ayudangapajca cutin paihuan tandanacui tucuncuna. Ancianocunahuan cutin tandanacungacamaca juchata rurajca tal vez ancianocuna punta tandanacuipi imata nishcapi yuyangapajmi tiempota charinga. Shinallataj humilde shunguhuanmi Yayitu Diosta paita perdonachun mañai tucun (Salmo 32:5; 38:18). Chaita rurashcamantami tal vez qꞌuipa tandanacuipica juchata rurajca paipaj yuyaita cambiashcata ricuchinga.

¹³ Shinallataj ancianocunaca juchata rurajta arrepintirichun ayudangapajca paita alli intindishpami cꞌuyaihuan ayudana can. Ancianocunaca paicunata ayudachun, juchata ruraj mana allita rurashcata intindishpa arrepintirichunpishmi Yayitu Diosta mañana can (2 Timoteo 2:​25, 26).

14. ¿Juchata rurajcunaca ancianocuna ayudashcallamantachu arrepintirincuna?

¹⁴ Juchata ruraj arrepintirijpica tucuicunami achcata cushicunchij (Lucas 15:​7, 10). Pero ¿ancianocuna ayudashcallamantachu paica arrepintirirca? Mana. Apóstol Pabloca juchata rurajcunamanta parlashpaca: “Paicunaman arrepintirina yuyaita Dios cungapishchari” nircami (2 Timoteo 2:25). Shinashpaca juchata rurajcunaca mana gentecuna ayudashcallamantachu paicunapaj yuyaita cambiashpa arrepintirincuna. Ashtahuantajca Jehová Diosmi shungumanta arrepintirichun paicunataca ayudan. Shinallataj apóstol Pabloca juchata rurajcuna arrepintirishpa ima bendicioncunallata chasquinatami nirca. Por ejemplo, paicunaca Diosmanta yachashpa catina oportunidadtami charingacuna. Shinallataj paicunapaj yuyaita cambiashcamantami Diablopaj trampacunapica ña mana urmangacuna (2 Timoteo 2:26).

15. ¿Juchata ruraj arrepintirijpica ancianocunaca paitaca ima shinataj ayudashpa catincuna?

¹⁵ Juchata ruraj arrepintirishpapish paipaj feta sinchiyachishpami catina can. Diablopaj trampacunapi ama urmangapajpish esforzarishpami catina can. Chaipajca ancianocunaca paita ayudangapajmi visitashpa catina can. Chashnami paica allita rurangapaj esforzarishpa catinga (Hebreos 12:​12, 13). Shinapish ancianocunaca juchata ruraj imallata rurashcataca shujtajcunamanca mana huillanachu can. Pero ¿congregacionca tal vez imatataj yachanata minishtinga?

“TUCUICUNAPAJ ÑAUPAJPI SINCHITA CUNANGUI”

16. ¿1 Timoteo 5:​20-pi “tucuicunapaj ñaupajpi sinchita cunangui” nishpaca picunamantataj parlacun?

¹⁶ (1 Timoteo 5:​20-ta liyipai). Apóstol Pabloca Timoteotaca: ‘Juchata rurajtaca tucuicunapaj ñaupajpi sinchita cunangui’ nishpami mandarca. Shinashpaca ¿juchata rurajcunaca siemprechu tucui congregacionpaj ñaupajpi cunashca cana can? Chaita ruranaca huaquinpica mana minishtirinchu. Por ejemplo, ¿maijancunalla chai huauqui o pani juchata rurashcata ricushca cajpi, o juchata rurajllataj ima juchata rurashcata shujtajcunaman huillashca cajpica ancianocunaca imatataj rurana can? Ancianocunaca paicunallamanmi juchata ruraj huauquihuan o panihuan ña parlashcata, shinallataj paita ña corregishcata huillana can.

17. a) Maipica shuj huauqui o pani jatun juchata rurashcataca achcacunachari ña yachancuna. Mana cashpaca juchata rurashcataca tal vez achcacunami yachaj chayangacuna. ¿Chashna tucujpica ancianocunaca imatataj rurana can? b) ¿Ancianocunaca imamantataj chaitaca rurana can?

¹⁷ Maipica shuj huauqui o pani jatun juchata rurashcataca achcacunachari ña yachancuna. Mana cashpaca juchata rurashcataca tal vez achcacunami yachaj chayangacuna. Chashna tucujpica shuj ancianomi juchata rurajta ancianocuna ña sinchita cunashcata congregacionman huillana can. ¿Ancianocunaca imamantataj chaitaca rurana can? Apóstol Pabloca: “Chashna rurajpimi caishujcunapish juchata ruranata manchangacuna” nircami.

18. ¿Manaraj 18 añosta bautizarishcacuna jatun juchata rurajpica ancianocunaca imatataj rurana can? (Fotomantapish parlapai).

¹⁸ ¿Manaraj 18 añosta charij bautizarishcacuna jatun juchata rurajpica ancianocunaca imatataj rurana can? Tucui ancianocuna tandanacushpami juchata rurajta ayudachun ishqui ancianocunata agllana can. Chai ishqui ancianocunaca juchata rurajhuan, paipaj yaya mamahuanpishmi tandanacuna can. Ancianocunaca juchata rurajpaj yaya mamataca paicunapaj huahua arrepintirichun ima shina ayudacushcatami tapuna can. Juchata ruraj paipaj yaya mamapaj consejocunata uyashpa cambiocunata ruracushcata ricushpaca chai ishqui ancianocunaca paipaj yaya mamalla paita ayudashpa catichunmi decidi tucungacuna. Bibliapi nishca shinaca Jehová Diosca yaya mamacunamanmi paicunapaj huahuacunata disciplinashpa alli huiñachichun mingashca (Deuteronomio 6:​6, 7; Proverbios 6:20; 22:6; Efesios 6:​2-4). Paicunahuan parlanacushca qꞌuipaca ancianocunaca maijan ratoca yaya mamatami huahuata ayudacushcata ricungapaj tapungacuna. Pero shuj menor de edad manataj arrepintirisha nijpi o millaita rurashpa catijpica shuj comité de ancianosmi paihuan, paipaj yaya mamahuanpish tandanacungacuna.

‘JEHOVÁ DIOSCA YALLITAJ CꞌUYAJ, LLAQUIJMI CAN’

19. ¿Ancianocunaca Jehová Diospaj ejemplotaca ima shinataj catincuna?

¹⁹ Comité de ancianos nishcacunapi ayudaj ancianocunaca congregacionpi mapa ruraicuna ama tiyachunmi ayudancuna. Jehová Diosmi chaita rurachun mandashca (1 Corintios 5:7). Shinallataj paicunaca juchata rurajcuna arrepintirichun ayudangapajmi sinchita esforzarincuna. Chai ancianocunaca juchata rurajcuna manataj cambiai tucushcataca mana yuyancunachu. Ashtahuanpish paicunaca Jehová Diospaj ejemplota catishpami ‘yallitaj cꞌuyajcuna, llaquijcuna’ cangapaj esforzarincuna (Santiago 5:11). Apóstol Juanca cꞌuyaihuanmi: “Ñuca huahuacunalla, juchata ama rurachunmi caicunataca quillcani. Maijanpish juchata rurajpica shuj ayudajtami charinchij. Paica Yaya Diospaj cꞌuchupi caj cashcata ruraj Jesucristomi” nirca (1 Juan 2:1).

20. ¿Catij yachaipica imatataj yachashun?

²⁰ Shinapish maijan huauqui o pani paipaj juchacunamanta mana arrepintirisha nijpica congregacionmantami llujshichishca cana can. ¿Chashna pasajpica ancianocunaca imatataj rurana can? Chaitaca catij yachaipimi yachashun.