YACHAI 36
CANTO 103 Michijcunaca Dios cushca regalomi
“Congregacionmanta ancianocunata cayachun”
“Congregacionmanta ancianocunata cayachun” (SANTIAGO 5:14).
CAITAMI YACHASHUN
¿Minishtishca horaspi ancianocunata ayudata mañanaca imamantataj importante can?
1. ¿Jehová Diosca huauqui panicunata cuidangapajca imatataj rurashca?
JEHOVÁ DIOSCA congregacionpi caj huauqui panicunata achcata cꞌuyashcamantami paipaj Churipaj yahuarhuan randirca. Chaimantami huauqui panicunataca michina ovejitacunata shina ricun. Paicunata cuidangapajca cada congregacionpimi michij ancianocunata churashca (Hechos 20:28). Shinallataj Jehová Diosca Jesustami congregacioncunata pushachun churashca. Paicunaca ancianocuna huauqui panicunata cꞌuyaihuan alli tratachunmi munancuna. Chaimi ancianocunaca Diosta alli sirvichun huauqui panicunata cuidancuna (Isaías 32:1, 2).
2. ¿Jehová Diosca picunatataj cuidasha, ayudasha nin? (Ezequiel 34:15, 16).
2 Huaquin huauqui panicuna pandarishpaca chaqui pꞌaquirishca ovejitacuna shinami sintirincuna. Chaimi Jehová Diosca paicunamanta preocuparishpa ayudasha nin. Paicunata cuidachunmi ancianocunata churashca (Ezequiel 34:15, 16-ta liyipai). ¿Jehová Dios ñucanchijta ayudachunca imatataj rurana canchij? Dios ayudachunmi mañana canchij. Michij, yachachij ancianocunatapish ñucanchijta ayudachunmi mashcana canchij. Jehová Diosca chaita rurachunmi munan (Efesios 4:11, 12).
3. ¿Cai yachaipica ima tapuicunallamantataj yachashun?
3 Cai yachaipica cai catij tapuicunatami yachashun: ¿ancianocunapaj ayudataca ima horastaj mashcana canchij?, ¿ancianocunapaj ayudataca imamantataj mashcana canchij?, ¿ancianocunaca ima shinataj ñucanchijta ayudancuna? Cai tapuicunamanta yachashpami juchapi manaraj urmashpa ancianocunapaj ayudata mashcana cashcata yachashun.
¿ANCIANOCUNAPAJ AYUDATACA IMA HORASTAJ MASHCANA CANCHIJ?
4. ¿Jatun juchapi urmajcunaca ungushcacuna shinaca imatataj rurana can? (Santiago 5:14-16, 19, 20). (Fotomantapish parlapai).
4 Santiagoca: “¿Cancunapurapica maijanca ungushcachu can? Chashna cashpaca congregacionmanta ancianocunata cayachun” nircami (Santiago 5:14-16, 19, 20-ta liyipai). Maijanca jatun juchata rurashpaca shuj ungushca shinami pi ayudachun minishtin. Ñucanchijcuna ungurishpaca doctorpajmanmi rinchij. Paimanca ima shina sintirishcatami huillanchij. Alli tucungapajpish pai ima nishcatami pajtachinchij. Chai shinallatajmi jatun juchapi urmashpaca ancianocuna ayudachun mashcana canchij. Paicunamanmi imata mana pacashpa tucuita huillana canchij. Shinallataj paicuna cushca consejocunatami pajtachina canchij. Chashnami Jehová Diosca ñucanchij juchacunata perdonanga. Pai perdonashcamantami ungüimanta jambirishca runa shina cushilla sintirishun.
Ungushcacunaca doctorcuna ayudachunmi minishtin. Juchapi urmajcunapish ancianocuna ayudachunmi minishtincuna. (Párrafo 4-ta ricui)
5. ¿Diosmanta ama caruyangapajca imatataj cuentata cuna canchij?
5 Juchapi manaraj urmashpami ancianocuna ñucanchijta ayudachun mañana canchij. Maipica Yayitu Dioshuan alli apanacushcatachari yuyanchij. Shinapish cuidadotami charina canchij (Santiago 1:22). Sardis congregacionpi sirvijcunaca Diosta alli sirvicushcatami yuyarcacuna. Pero Jesusca Diosmanta caruyacushcatami nirca (Apocalipsis 3:1, 2). ¿Ñucanchijpish Diosmanta ama caruyangapajca imatataj cuentata cuna canchij? Bautizarishca punllamanta cunancama Jehová Diosta tucui shunguhuan sirvicushcata o mana sirvicushcatami cuentata cuna canchij (Apocalipsis 2:4, 5). Chaipajca cashna nishpa tapurishunchij: “¿Bibliata liyishpaca cushillachu sintirini?, ¿imata liyishcapi yuyashpa ashtahuan yachangapajchu esforzarini?, ¿tucui tandanacuicunamanchu rini? ¿tandanacuicunaman manaraj rishpa ima yachagrishcatachu alli estudiani?, ¿predicanataca punta lugarpichu churani?, ¿ashtahuan cullquita charinallapi, paseanallapichu yuyani?” nishpami tapurina canchij. Chashna tapurishpaca imapi mejorana cashcatami yachashun. Chaita yachashpaca mejorangapajmi esforzarina canchij. Shinapish mejoranata mana pudishpaca manaraj juchapi urmashpami ancianocuna ayudachun mashcana canchij.
6. ¿Shuj huauqui o shuj pani arrepintirishca cashcata ricuchingapajca imatataj rurana can?
6 ¿Shuj huauqui o shuj pani jatun juchapi urmashpaca imatataj rurana can? Hechos 26:20-pi nishca shinaca ‘ruraicunahuanmi arrepintirishcata’ ricuchina can. Chaipajca jatun juchapi urmashcataca shuj ancianomanmi huillana can (1 Corintios 5:11-13). Chashnami ancianocunaca Jehová Dioshuan cutin tigra alli apanacuchun ayudai tucunga. Jehová Diospish paitami perdonanga.
7. ¿Mana alli munaicunamanta jarcarichunca ancianocunaca ima shinataj ayudanga?
7 Huaquin huauqui panicunaca Yayitu Diosta manaraj rijsishpaca drogarishpa, pornografiata ricushpa mana alli causaitami charircacuna. Chaimantami paicunaca Yayitu Diosta sirvicushpapish mana alli munaicunahuan chꞌimbapurashpa catingapaj esforzarincuna. Esforzarishpapish maipica Diosmanta caruyanatami manchancuna. Can chashna sintirishpaca ama manchaichu. Mana canllachu cangui. Chai mana alli munaicunamanta jarcarichunca cantaca ancianocunami ayudanga. Chaimi can ima shina sintirishcataca shuj ancianoman huillanalla cangui (Hechos 20:35). Paica canta alli uyashpami alli consejocunata cunga. Chai anciano canta ayudajpipish chai mana alli munaicunata charishpa catishcamantachari desanimado sintiringui. Shinapish mana alli munaicunamanta can jarcaringapaj esforzaricujta ricushpaca ancianoca cantami felicitanga. Humilde cashcamanta Jehová Diospaj ñaupajpi alli ricurishcatapishmi yuyachinga (Eclesiastés 4:12; 1 Corintios 10:12).
8. ¿Shuj anciano ayudachun manaraj mañashpaca maipica imatataj ñucanchijraj rurana canchij?
8 Ancianocunamanca tucui ñucanchij pandarishcacunataca mana huillanachu canchij. Caipi yuyashun. Canca yallitaj pꞌiñarishca cashcamantachari shuj huauquita sinchita rimarcangui. Chashna tucushpaca mana shuj ancianohuan parlanachu cangui. Ashtahuanpish Jesús nishca shinaca chai huauquihuan cutin alli tucungapajmi esforzarina cangui (Mateo 5:23, 24). Shinallataj ñucanchij publicacioncunapimi manso shungu cangapaj, mana rato colerangapaj, pacienciata charingapaj imata rurana cashcata estudiana cangui. Chai tucuita rurashca jahuapish chai problemata mana allichi tucushpaca shuj ancianopaj ayudata mashcai. Bibliapi nishca shinaca Evodiapish, Sintiquepish paicunapaj problemacunataca mana allichi tucurcacunachu. Chaimantami apóstol Pabloca congregacionta pushaj shuj anciano paicunata ayudachun mañarca. Chai shinallatajmi cambaj congregacionmanta shuj ancianopish canta ayudai tucunga (Filipenses 4:2, 3).
¿ANCIANOCUNAPAJ AYUDATACA IMAMANTATAJ MASHCANA CANCHIJ?
9. ¿Ancianocunapaj ayudata mashcanataca imamantataj mana pingana canchij? (Proverbios 28:13).
9 Mana alli munaicunamanta jarcarina sinchi cajpica ancianocuna ayudachunmi mashcana canchij (Salmo 94:18). Shinallataj shuj jatun juchata rurashca cashpaca Jehová Dios perdonachunmi ancianocunapaj ayudata mashcana canchij. Mana allita ruranatapishmi saquina canchij (Proverbios 28:13-ta liyipai). Shinapish maipica ima tucushcata ancianocunaman huillanatami pinganchij. Pingaita mishangapajca Jehová Diospimi confiana canchij. Paica ancianocuna ñucanchijta ayudachunmi paicunata churashca. Ancianocunapaj ayudata mashcashpaca Diosta cazushcatami ricuchishun.
10. ¿Ñucanchij juchacunata pacashpa, ancianocunaman mana huillashpaca imataj tucushun?
10 Ñucanchij juchacunata pacashpa, ancianocunaman mana huillashpaca ashtahuan llaquipimi urmashun. Mandaj Davidpi yuyashunchij. Paica paipaj juchacunata pacashcamantami manchaihuan, llaquilla sintirirca. Diosmanta caruyashcatapishmi cuentata curca (Salmos 32:3-5). Caitapish yuyashun. ¿Cambaj rigra mucu llujshishcata mana utca doctorman ricuchishpaca imataj tucungui? Achcatami nanachingui, mana utca alli tucunguichu. Chashnallatajmi shuj jatun juchata rurashpa, mana utca ancianocunaman huillashpaca ashtahuan llaquilla sintiringui, Jehová Diosmantapish caruyangui. Chaimantami Jehová Diosca ancianocunapaj ayudata mashcachun munan. Chaita rurashpallami Jehová Dioshuan cutin alli apanacui tucungui (Isaías 1:5, 6, 18).
11. ¿Juchacunata pacashpa mana huillajpica congregación ucupica imataj tucunga?
11 Ñucanchij juchacunata pacashpa, ancianocunaman mana huillashpaca shujtajcunatapishmi llaquichishun. Tal vez ñucanchij culpamantami Jehová Diosca paipaj espíritu santohuan congregacionta mana bendicianga. Chaimantachari congregación ucupica ashtahuan llaquicuna tiyanga (Efesios 4:30). Shinallataj shuj huauqui o shuj pani shuj jatun juchata rurashcata yachaj chayashpaca ancianocunahuan parlachunmi consejana canchij.a Ñucanchijcuna upalla saquirishpaca ñucanchijpishmi culpayuj tucushun (Levítico 5:1). Chai huauqui o chai pani ancianocunaman imata mana huillajpica Jehová Diosta cꞌuyashcamantami ñucanchijllataj ancianocunaman huillana canchij. Chaita rurashpami congregacionpi caj shujtaj huauqui panicunapish juchapi ama urmachun cuidashun. Juchata rurajtapish Jehová Dioshuan cutin alli apanacuchunmi ayudashun.
¿ANCIANOCUNACA IMA SHINATAJ ÑUCANCHIJTA AYUDANCUNA?
12. ¿Shuj jatun juchata rurashca cajpica ancianocunaca ima shinataj cantaca ayudanga?
12 Ancianocunaca juchata rurajtaca shuj ungushcata ayudaj shinami sinchiyachincuna (1 Tesalonicenses 5:14). ¿Paicunahuan parlajpica ancianocunaca ima shinataj cantaca ayudanga? Paicunaca can imata yuyashcata, ima shina sintirishcata yachangapajmi chꞌican chꞌican tapuicunata ruranga (Proverbios 20:5). Cambaj culturamanta o pingaita charishcamantachari can ima shina sintirishcata huillanaca cambajca sinchi canga. Shinapish ancianocuna canta ayudachunmi tucuita paicunaman huillana cangui. Canca llaquilla sintirishcamantachari maipishcachun, mana alli imatapish cutichinguiman (Job 6:3). Chashna nijpipish ancianocunaca canta intindishpami cꞌuyaihuan ayudashpa catinga. Paicunaca cantaca allimi uyangacuna. Can ima tucushcata alli intindingapajpishmi esforzaringacuna. Chai huashaca cꞌuyaihuanmi canta consejangacuna (Proverbios 18:13). Shinallataj canta alli ayudangapajca ashtahuan tiempotachari minishtingacuna. Chaimi canhuan cutin shujtaj punllapish parlasha ningacuna.
13. ¿Ancianocunaca ñucanchijta ayudangapajca imallatataj rurangacuna? (Fotomantapish parlapai).
13 Ancianocunaca canhuan parlacushpaca canta alli sintichingapajmi esforzaringacuna. Chaimantami canhuan cashpaca canmanta Diosta mañangacuna. Canmanta mañashpami shuj ungushca runata alli tucuchun ayudaj shina canta sinchiyachingacuna. Shinallataj shuj jambij aceiteta churaj shinami Diospaj Shimihuan canta cushichingacuna, valishca consejocunatapishmi canman cunga (Santiago 5:14-16). Ancianocunata uyashpaca Jehová Diosta uyacuj shinami canga. Jehová Diosca cantaca: ‘Caimari ñan, caillapi puringui’ ningami (Isaías 30:21). Chaimantami ancianocuna ayudachun saquina cangui. Chashnami Yayitu Jehová Dioshuan cutin alli apanacui tucungui. Allita rurashpa catingapajpishmi fuerzasta japingui (Isaías 57:18).
Ancianocunaca Bibliahuanmi ñucanchijta cushichishpa ayudangacuna. (Párrafo 13, 14-ta ricui)
14. ¿Ancianocunaca cꞌuyaihuan corregingapajca imatataj rurancuna? (Gálatas 6:1; fotomantapish parlapai).
14 (Gálatas 6:1-ta liyipai). Cai versopi nishca shinaca shuj huauquica ‘mana cuentata cushpachari mana allita’ rurai tucun. Qꞌuipacarin jatun juchapichari urmai tucun. Chaimantami ancianocunaca ‘Diospaj espíritu ayudajpi cꞌuyaihuan paita alli ñanman tigrachun ayudana can’. ¿Ancianocunaca ima shinataj cꞌuyaihuan corregina can? Cambaj rigra mucu llujshishcapi yuyai. Can alli tucungapajca shuj alli doctorpajmanmi ringuiman. Chai doctorca cambaj mucutaca mana tanto nanachishpa, allimanta cuyuchishpami chaillapitaj churanga. Chashnallatajmi ancianocunaca juchapi urmashca huauquitaca cꞌuyaihuan ayudancuna. Ama yallitaj llaquirichunpishmi cꞌuyaihuan consejancuna. Chashnami shuj doctor shuj mucuta allimanta cuyuchishpa chaillapitaj churaj shina ancianocunapish congregacionpajman cutin tigrachun cꞌuyaihuan ayudanga. Shinapish ancianocuna consejacushpaca paicunapish juchayujcuna cashcatami yuyarina cancuna. Chaita yuyarishpami ancianocunaca mana jatun tucushpa, mana maipishcachun rimashpa, cꞌuyaihuan consejangacuna (1 Pedro 3:8).
15. ¿Problemacunata charishpaca imamantataj ancianocuna ayudachun mañana canchij?
15 Congregacionta pushaj ancianocuna ñucanchijta alli ayudana cashcapimi confiana canchij. ¿Imamantataj paicunapi confiana canchij? Ancianocunaca paicunaman parlashcata cutin tigra mana nina cashcatami alli yachancuna. Shinallataj paicunapaj yuyashcallata ninapaj randica Biblia yachachishcacunahuan consejanatami yachashcacuna. Qꞌuipacarin ñucanchijta ayudanata, cushichinatapish mana saquincunachu (Proverbios 11:13; Gálatas 6:2). Ancianocunaca cada uno chꞌican chꞌicanmi cancuna. Maijancunaca achca experienciatami charincuna. Chaimi maijan ancianomanpish ayudachun mañai tucungui. Shinapish can munashca shina consejangacama mana tucui ancianocunaman parlashpachu purina cangui. Chaipaj randica shuj anciano Bibliahuan consejajpica chai consejota pajtachingapajmi esforzarina cangui (2 Timoteo 4:3). Shinapish shuj ancianoca alli consejangapajca puntapica cantaca: “¿Ñachu shujtaj ancianohuan parlashcangui? ¿Paica ima consejotataj cushca?” nishpachari tapunga. Shinallataj pai humilde cashcamantachari mana pailla canta consejanga. Shujtaj ancianohuanpishmi canta ayudanga (Proverbios 13:10).
¿IMATATAJ CADA UNO RURANA CANCHIJ?
16. ¿Imatataj cada uno rurana canchij?
16 Punllantami ñucanchij rimashcacunahuan, rurashcacunahuanca cada uno Jehová Diosta cꞌuyashcata ricuchina canchij. Chaita rurajpica Jehová Diosllatajmi paita alli sirvichun ayudanga (Romanos 14:12). Chaimantami ancianocunaca ñucanchijta cꞌuyashcamanta Diospaj shimihuan alli consejocunata cushpa ayudancuna. Chai huashaca ancianocunaca cada uno imata ruranata agllachunmi saquin. Chashnami ‘ima alli cashcata, ima mana alli cashcata yachashpaca ñucanchijllataj imata ruranata agllashun (Hebreos 5:14).
17. ¿Imamantataj ancianocunapaj ayudata mashcanalla canchij?
17 Jehová Diosca michina ovejitacunata alli cuidacuj shinami ñucanchijtapish cꞌuyaihuan cuidacun. Jesuspish Jehová Dios shinami ‘alli michij’ can. Chaimi Jehová Diosca ñucanchijta quishpichingapajca paipaj Churi Jesusta cacharca. Jesús huañushcamantami ñucanchijcunaca huiñaita causana oportunidadta charinchij (Juan 10:11). Shinallataj Jehová Diosca: “Chaipi cancunata michichunca, ñuca shungu munashca michijcunatami churasha. Paicunamari alli yachaihuan, alli yuyaihuan michingacuna” nircami. Chaimantami congregacioncunapica alli michij ancianocunata churashca (Jeremías 3:15). Alli michij ancianocunaca Dios cushca regalomi can. Paicunaca ñucanchijcuna ungushca o irqui ovejitacuna shina cajpica ñucanchijtami ayudan. Chaita yachashcamantami imata mana manchashpa, mana pingashpa ancianocunapaj ayudata mashcanalla canchij.
CANTO 31 Dioshuan purishpa catingui
a Ancianocunahuan parlachunmi shuj tiempota cuna canchij. Chai tiempo tucurijpi imata mana huillajpica ñucanchijllatajmi ancianocunaman huillana canchij.