Shujtajcunata ayudashpami cushilla causashun

1, 2. ¿Jehová Diosca imamantataj shujtajcunaman cushpa cushilla sintirichun ñucanchijcunataca rurashca?

JEHOVÁ DIOSCA gentecunataca shujtajcunata ayudashpa cushilla sintirichunmi rurarca (Hechos 20:35). Shuj regalota chasquishpaca cushillami sintirinchij. Pero shujtajcunaman imatapish cushpaca ashtahuanmi cushicunchij. ¿Jehová Diosca imamantataj ñucanchijtaca chashna rurashcanga?

² Jehová Diosca cushilla causangapaj esforzarishpa catichunmi ñucanchijcunataca rurashca. Chaimantami cushilla causasha nishpaca shujtajcunata ima shina ayudanata mashcana canchij. ¿Yayitu Dios ñucanchijta chashna rurashcamantaca manachu cushilla sintirinchij? (Salmo 139:14).

3. ¿Jehová Diosca imamantataj ‘cushi Dios’ can?

³ Bibliapi nishca shinaca shujtajcunaman imatapish cushpami cushilla sintirinchij. Shinallataj Bibliapi nishca shinaca Jehová Diosca ‘cushi Diosmi’ can (1 Timoteo 1:11). Jehová Diosrajmi ñucanchijcunamanca allicunata curca. Pai shina cujca pi mana tiyanchu. Apóstol Pablo nishca shinaca “pai causaita cujpimi causanchij, purinchij, paillamantatajmi tiyanchij” (Hechos 17:28). Ashtahuanpish “tucui alli regalocunapish, ima ashtahuan allicunapish” Jehová Diosmantami shamun (Santiago 1:17).

4. ¿Ashtahuan cushicungapajca imatataj rurana canchij?

⁴ Tucuicunami shujtajcunata ayudashpa cushicunata munanchij. Chaipajca Jehová Diospaj ejemplotami catina canchij (Efesios 5:1). Cai yachaipica Jehová Diospaj sumaj ejemplomantami yachashun. Shinallataj shujtajcunata ayudashcamanta mana agradicijpica imata rurana cashcatami ricushun. Caicunata yachashpami shujtajcunaman imatapish cushpaca ashtahuan cushilla sintirishun.

JEHOVÁ DIOS SHINA CUJCUNA CASHUNCHIJ

5. ¿Jehová Diosca ñucanchijcunamanca imallatataj cun?

⁵ ¿Jehová Diosca cuj cashcataca ima shinataj ricuchin? Por ejemplo, paica ñucanchijcuna imalla minishtishcacunatami cun. Mana achca cosascunata charishpapish Jehová Dios ayudashcallamantami la mayoriaca micunata, churanata, maipi causanatapish charinchij (Salmo 4:8; Mateo 6:​31-33; 1 Timoteo 6:​6-8). ¿Pero Jehová Diosca cuna cashcallamantachu ñucanchijcuna imalla minishtishcacunataca cun? Mana. Imamanta chaicunata cushcatami cunanca yachashun.

6. ¿Mateo 6:​25, 26-pica imatataj yachanchij?

⁶ Jehová Diosca ñucanchijta cꞌuyashcamantami tucui imata minishtishcata cun. Mateo 6:​25, 26-pi Jesús imata nishcata ricushun (cai versocunata liyipai). Jesusca pajaritocunamanta parlashpaca cashnami nirca: “Paicunaca mana tarpunchu, mana tandanchu, granocunatapish mana huaquichinchu. Shinapish jahua pachapi caj cancunapaj Yayaca paicunamanca caranllami. ¿Manachu cancunacarin chai pajarocunatapish yalli valishca canguichij?” nircami. ¿Caimantaca imatataj yachanchij? Jehová Diosca animalitocunamanca paicuna imalla minishtishcacunatami cun. Ñucanchijcunaca animalitocunata yallimi valishca canchij. Chaimantami Yayitu Dios ñucanchijtapish cuidanata seguros canchij. Paica yallitaj cꞌuyaj Yaya cashcamantami paipaj huahuacunamanca tucui imalla minishtishcata cun (Salmo 145:16; Mateo 6:32).

7. ¿Jehová Dios shina cujcuna cashcataca ima shinataj ricuchinchij? (Fotomantapish parlapai).

⁷ Ñucanchijpish shujtajcunata cꞌuyashcamantami Yayitu Dios shina paicuna imalla minishtishcata cuna canchij. Por ejemplo, ¿maijan huauqui o pani micunata, churanata minishtishcata yachaj chayashpaca imatataj rurana canchij? Jehová Diosca llaquipi cajcunata ayudachunmi canmanca yuyaita cui tucun. Diosta sirvijcunaca llaquipi cajcunata ayudashcamantami rijsishca canchij. Por ejemplo, COVID-19 pandemia punllacunapica huauqui panicunaca micunitata, churanata, shujtaj cosascunatapishmi paicunapura convidanacurcacuna. Cutin shujtajcunaca shungumantami Diospaj obra ñaupajman catichun cullquita cushpa ayudarcacuna. Chai cullquihuanmi muyundij Allpapi llaquicunata apacuj huauqui panicunata ayudai tucurcanchij. Huauqui panicunaca chashna ayudashpami Hebreos 13:​16-pi nishcacunata pajtachircacuna. Chaipica: “Shujtajcunapaj allita ruranata, cancuna imalla charishcata shujtajcunaman cunatapish ama cungarichijchu. Cai ruraicunaca shuj sacrificio shinami can. Chai sacrificiomantami Diosca achcata cushicun” ninmi.

8. ¿Jehová Dios fuerzasta cushcamantaca imallatataj rurai tucunchij? (Filipenses 2:13).

⁸ Jehovami poderta cun. Paica cushillami paita sirvijcunamanca fuerzasta cun (Filipenses 2:​13-ta liyipai). ¿Jehová Diostaca tentacioncunapi ama urmangapaj, o shuj jatun llaquita ahuantangapajca ayudahuai nishpachu mañashcangui? Huaquinpicarin punllapi ruranacunata rurangapaj fuerzasta cuchunpishmi mañashcanchij. Jehová Dios ñucanchij mañashcacunata cutichijta ricushpaca apóstol Pablo shinachari sintirircanchij. Paica: “Dios poderta cujpimi ñucaca tucuita rurangapaj fuerzata charini” nircami (Filipenses 4:13).

9. ¿Jehová Dios ñucanchijman cushca fuerzahuanca ima shinataj shujtajcunata ayudai tucunchij? (Fotomantapish parlapai).

⁹ Ñucanchijca Jehová Dios shinaca mana tucui poderta charinchijchu. Chaimi shujtajcunamanca mana poderta cui tucunchij. Pero Jehová Dios ñucanchijman cushca fuerzahuanmi shujtajcunata ayudai tucunchij. Por ejemplo, yuyajlla, ungushca huauqui panicunatami mandadocunata rurashpa o paicunapaj huasicunata pꞌichashpa ayudai tucunchij. Pudishpaca Tandanacuna Huasita pꞌichashpa, allichishpapishmi ayudai tucunchij. Chashna ayudajpimi huauqui panicunaca cushilla sintiringacuna.

10. ¿Ñucanchij rimashcacunahuanca ima shinataj shujtajcunata ayudai tucunchij?

¹⁰ Ñucanchij rimashcacunahuanpishmi shujtajcunamanca fuerzasta, animota cui tucunchij. ¿Canca pitataj alaja shimicunahuan felicitai o animai tucungui? ¿Paitaca ima shinataj ayudai tucungui? Tal vez paita visitanaman rishpa, telefonopi cayashpa, shuj tarjetitata o shuj mensajeta cachashpami animai tucungui. Achca shimicunata nishpa animanaca mana minishtirinchu. Ashtahuanpish shungumanta ashalla shimicunata nishpami paitaca animai tucungui. Chashna ayudajpimi chai huauqui panica Jehová Diosmanta ama caruyangapaj, llaquicunatapish ahuantashpa catingapaj fuerzasta charinga (Proverbios 12:25; Efesios 4:29).

11. ¿Jehová Diosca alli yachaitaca ima shinataj ñucanchijmanca cun?

¹¹ Jehová Diosca alli yachaitami cun. Santiagoca: “Cancunamanta maijanpish alli yachaita minishtishpaca Diosta cutin cutin mañachun. Chashna mañashpaca chasquingami. Diosca mana mitsashpa, mana rimashpami tucuicunaman chai yachaitaca cun” nishpami quillcarca (Santiago 1:5). Cai versopi nishca shinaca ñucanchijcuna alli yachaita cuchun paita mañajpica Diosca “mana mitsashpa, mana rimashpami” alli yachaita cun. Ashtahuanpish Yayitu Diosca alli yachaita mashcashpa catichunmi ñucanchijtaca animan (Proverbios 2:​1-6).

12. ¿Ñucanchij imalla yachashcataca picunallamantaj yachachi tucunchij?

¹² Ñucanchijpish Jehová Dios shinami ñucanchij imalla yachashcataca shujtajcunaman yachachina canchij (Salmo 32:8). ¿Ñucanchij imalla yachashcataca ima shinataj shujtajcunaman yachachi tucunchij? Por ejemplo, mushuj publicadorcunamanmi ima shina huillanata yachachi tucunchij. Anciano huauquicunapish pacienciahuanmi siervo ministerialcunaman, shujtaj huauquicunamanpish congregacionpi ima shina ayudanata yachachina can. Construccionmanta yachajcunapish shujtajcunamanmi Tandanacuna Huasicunata ima shina shayachinata, ima shina cuidanata yachachina can.

13. ¿Shujtajcunaman yachachicushpaca ima shinataj Jehová Diospaj ejemplota cati tucunchij?

¹³ Shujtajcunaman yachachijcunaca Jehová Diospaj ejemplota catishpami yachachina can. Jehová Diosca mana mitsashpami tucuita yachachin. Ñucanchijpish mana mitsashpami tucui ñucanchij imalla yachashcata mushujcunaman yachachina canchij. “Tucuita yachachishpaca ñuca trabajotami quichunga” nishpaca mana yuyanachu canchij. Shinallataj maijancunaca, “ñucataca pi mana yachachircachu” nishpami shujtajcunataca mana yachachisha nin. Pero Yayitu Diosca chaita rurachunca mana munanchu. Ashtahuanpish ñucanchij tucui imalla yachashcata shujtajcunaman cushilla yachachingapajmi esforzarina canchij (1 Tesalonicenses 2:8). Chashna yachachishcamantami paicunapish “shujtajcunata yachachingapaj allichirishca cangacuna” (2 Timoteo 2:​1, 2). Shinallataj shujtajcunaman ñucanchij imalla yachashcata yachachishcamantami paicunapish, ñucanchijpish alli yachaita japishun. Ashtahuancarin cushillami causashun.

¿AYUDASHCAMANTA MANA AGRADICIJPICA IMATATAJ RURANA CANCHIJ?

14. ¿Huauqui panicunata ayudajpica paicunaca ima shinataj sintiringacuna?

¹⁴ Huauqui panicunata ayudajpica paicunaca casi siempremi agradicishcata ricuchingacuna. Maipica shuj cartitata cachashpa o shujtaj ruraicunahuanmi agradecidos cashcata ricuchingacuna (Colosenses 3:15). Paicunata ayudashcamanta agradicijpica ñucanchijca cushillami sintirishun.

15. ¿Shujtajcuna mana agradicijpica imatataj yuyarina canchij?

¹⁵ Shujtajcunata ayudangapajca maipica ñucanchij tiempota, fuerzata, cullquitami utilizashun. Pero paicunata ayudangapaj sinchita esforzarijpipish maijancunaca manachari agradicingacuna. ¿Chashna pasajpica ama llaquilla sintiringapajca imatataj rurana canchij? Cai yachaipaj versotami yuyarina canchij. Hechos 20:​35-pi nishca shinaca shujtajcuna mana agradicijpipish paicunata ayudashcamantami cushilla sintirina canchij. ¿Pero chashna sintiringapajca imatataj yuyarina canchij?

16. ¿Jehová Dios shina ayudajcuna cashcataca ima shinataj ricuchinchij?

¹⁶ Shujtajcunata ayudashpaca Jehová Diospaj ejemplota caticushcata yuyari. Paica gentecuna agradicijpipish o mana agradicijpipish tucuicunamanmi allicunata cun (Mateo 5:​43-48). Jehová Diosca: ‘Imatapish japinaraicullaca ama ayudaichijchu. Chashna rurashpami jatun bendicioncunata chasquinguichij’ ninmi (Lucas 6:35). Shinashpaca shujtajcuna mana agradicijpipish mana llaquirinachu canchij. Ashtahuanpish shujtajcunata cushilla ayudashcamanta Jehová Dios ñucanchijta bendicianatami yuyarina canchij (Proverbios 19:17; 2 Corintios 9:7).

17. ¿Lucas 14:12 al 14-pica imatataj yachachin?

¹⁷ Jehová Dios shina ayudajcuna cangapajca Jesús Bibliapi ima nishcatami yuyarina canchij (Lucas 14:​12-14-ta liyipai). Ñucanchijtapish tigra ayudai tucujcunata ayudanaca allimi can. ¿Pero imata japinaraiculla shujtajcunata ayudacushcata cuentata cushpaca imatataj rurana canchij? Chaipica Jesús ima nishcatami pajtachina canchij. Pai nishca shinaca paicunata ayudashcamanta imahuan mana pagai tucujcunatapishmi ayudana canchij. Chaita rurashpaca Jehová Diospaj ejemplota caticushcamantami cushilla sintirishun. Shinallataj paicunata ayudashcamanta maijancuna mana agradicijpipish mana llaquilla sintirishunchu.

18. ¿Ayudashcamanta ñucanchijta mana agradicijpica imatataj rurana canchij?

¹⁸ Shujtajcuna mana allicuna cashcamanta ñucanchijta mana agradicishcataca mana yuyanachu canchij (1 Corintios 13:7). Ayudashcamanta ñucanchijta mana agradicijpica: “¿Paica mana alli cashcamanta o cungarishcallamantachu mana agradicirca?” nishpami tapurina canchij. Maijancunaca paicunata ayudajpica agradecidosmi sintirincuna. Pero ima shina agradicinataca mana yachancunachu. Tal vez ñaupaca paicunami shujtajcunata ayudajcuna carca. Pero cunanca paicunata ayudajta ricushpaca asha pingaitachari charincuna. Ima laya cajpipish ñucanchij huauqui panicunata cꞌuyashcamantami paicunamantaca mana allicunataca mana yuyana canchij. Ashtahuanpish cushicushpami paicunataca ayudashpa catina canchij (Efesios 4:2).

19, 20. ¿Shujtajcunata ayudashpaca imamantataj pacienciata charina canchij? (Fotocunamantapish parlapai).

¹⁹ Pacienciata chari. Shujtajcunata ayudanamanta parlashpaca rey Salomonca: “Cambaj tandataca yacupi cacharilla. Ña unipica, cutin japinguillami” nircami (Eclesiastés 11:1). Cai versopi nishca shinaca maijancunaca achca tiempo qꞌuipami paicunata ayudashcamanta agradicingacuna. Achca huatacuna huashaman shuj panihuan chashna tucushcata ricushun.

²⁰ Achca huatacuna huashamanca shuj superintendentepaj huarmica cunanlla bautizarishca panimanmi shuj sumaj cartata cacharca. Paipaj cartapica Jehová Diosmanta ama caruyachunmi animarca. Chai cartata chasquij panica ocho huatacuna qꞌuipami cashna nishpa superintendentepaj huarmiman quillcarca: “Cai huatacunapica canca mana cuentata cushpapish ñucataca achcatami ayudashcangui. Chaita parlangapajmi cai cartitata cachasha nircani. Can cachashca cartaca alajami carca. Pero ashtahuantajca chai cartapi can quillcashca versomi ñucataca animarca. Chai versotaca siempremi yuyaipi charircani” nircami.a Ima llaquicunallahuan chꞌimbapurashcata parlashca qꞌuipaca chai panica cashnapishmi quillcarca: “Achca llaquicunata charishcamantami maipica Jehová Diosmanta caruyanata yuyarcani. Pero can quillcashca versota yuyarishpami Jehová Diosmanta ama caruyangapaj fuerzasta japishcani. Cai ocho huatacunapica can quillcashca cartita, can quillcashca versopish tucuimanta yallimi valishca cashca” nishpami quillcarca. Chai superintendentepaj huarmica achca huatacuna qꞌuipa chai cartata chasquishcamantaca dimastij cushillami sintirirca. Ñucanchijtapish tal vez achca huatacuna qꞌuipami ayudashcamantaca agradicingacuna.

21. ¿Imamantataj Jehová Dios shina shujtajcunata ayudasha ningui?

²¹ Caipi yachashca shinaca Jehová Diosca shujtajcunata ayudashpa cushilla sintirichunmi ñucanchijcunataca rurashca. Pi ñucanchijman imata cujpica cushillami sintirinchij. Ayudashcamanta agradicijpicarin ashtahuanmi cushicunchij. Pero ñucanchijta agradicijpipish o mana agradicijpipish allita rurashcamantami cushicuna canchij. ‘Jehová Diosca ñucanchijcuna cushcatapish yallimi ñucanchijmanca cunga’. Chaitaca manataj cungarinachu canchij (2 Crónicas 25:9). Shinashpaca shujtajcunata ayudajpica Jehová Diosca ñucanchijtaca achcatami bendicianga. Chaita yachashcamantami cushilla sintirinchij. Chaimanta Jehová Dios shina shujtajcunata ayudashpa catishunchij.