Alli decidingapaj Jehová Diospi confiashunchij

1. ¿Apóstol Pabloca imamantataj cushilla sintirirca?

APÓSTOL PABLOCA huañuna cashcata yachashpapish paipaj causaipi allicunata rurashcamantami cushilla sintirirca. Chaimantami paica: “Callpanatapish tucuchishcanimi. Crishcapipish catishcanimi” nirca (2 Timoteo 4:​6-8). Apóstol Pabloca Jehová Diosta sirvingapajmi paipaj causaitaca utilizarca. Chaimantami Jehová Dios paimanta cushilla cashtaca seguro carca. Ñucanchijcunapish Jehová Diosta cushichingapajca alli deciciocunatami japina canchij. ¿Chaitaca ima shinataj rurai tucunchij?

2. ¿2 Corintios 5:​7-pi nishca shinaca Pabloca imatataj yachachirca?

² Apóstol Pabloca paimanta Jehová Diosta catijcunamantaca caitami nirca: “Ñucanchijca crishcatami caticunchij, ñahuihuan ricushcataca mana caticunchijchu” (2 Corintios 5:7). Jehová Diospi mana feta charijcunaca imata ricushcata, imata uyashcata, imata yuyashcallata catishpami decisioncunata japincuna. Pero Jehová Diosta sirvijcunaca Diospaj munai maijan cashcata yuyarishpami imatapish decidincuna. Diospi confiashcamantami pai ayudanatapish crincuna. Shinallataj Bibliapi nishcacunata catina valishca cashcatami yuyancuna (Salmo 119:66; Hebreos 11:6).

3. ¿2 Corintios 4:​18-pi nishca shinaca imamantataj ricushcacunallata catishpa mana decidina canchij?

³ Maipica ñucanchij ricushcallata, uyashcallata, yuyashcallata catishpami imatapish decidinchij. Chashna decidijpica imapish mana alli llujshingachu. ¿Imamantataj chashna ninchij? Maipica ñucanchij ricushcacunapi, uyashcacunapi, yuyashcacunapimi pandarinchij. Ashtahuanpish Diospaj munaitapish, paipaj consejocunatapish mana catishunchu (Eclesiastés 11:9; Mateo 24:​37-39). Dios ñucanchijta pushachun saquishpaca pai munashca shinami imatapish decidishun (Efesios 5:10). Diospaj consejocunata catishpaca cunan pullacunapipish tranquilo, cushillami causashun. Shamuj punllacunapicarin huiñai causaitami charishun (Salmo 16:​8, 9; Isaías 48:​17, 18; 2 Corintios 4:​18-ta liyipai).

4. ¿Ima tapuicunapitaj yuyana canchij?

⁴ Cashna nishpa tapuri: “¿Ñuca imallata ricushcallata, yuyashcallata catishpachu decidini? o ¿Jehová Diospi, pai mandashcacunapi confiashpachu imatapish decidini?”. Cai yachaipica trabajota mashcacushpa, pihuan cazaranata mashcacushpa, Diospaj organizacionpi ima instruccioncunata chasquishpaca alli decidingapaj imata rurana cashcatami yachashun.

¿SHUJ TRABAJOTA MASHCACUSHPACA IMAPITAJ YUYANA CANCHIJ?

5. ¿Shuj trabajota mashcacushpaca imapitaj yuyana canchij?

⁵ Tucuicunami familiata mantiningapaj shuj trabajota charishun ninchij (Eclesiástes 7:12; 1 Timoteo 5:8). Huaquincunaca huasi ucupi imata ministishcata charingapaj, cullquita huaquichingapajmi shuj alli trabajota charincuna. Shujtajcunaca huasi ucupi imata ministishcata charingapajllami trabajancuna. Chaimantami shuj trabajota mashcacushpaca mashna cullquita ministishcapi yuyana canchij. Shinapish mana chaillata ricushpachu decidina canchij.

6. ¿Hebreos 13:​5-pi nishca shinaca trabajota mashcacushpaca imallapitaj yuyana canchij?

⁶ Shuj trabajota mashcacushpaca Jehová imata rurachun munashcapi, paipajman cꞌuchuyana cashcapimi yuyana canchij. Chaipajca cashna nishpami tapurina canchij: “¿Trabajopica Jehová mana munashcata rurachunchu ninga? ¿Trabajomantaca predicanata, reunioncunaman rinata, Bibliata yachanatachu saquisha? ¿Ñuca familiatachu achca tiempota saquishpa risha?” (Proverbios 6:​16-19; Filipenses 1:10). Caicunata pajtachingapaj jarcagrijta ricushpaca chai trabajotaca mana chasquinachu cangui. Trabajota manaraj japishpapish Jehová Dios tucuipi cuidanatami confiana cangui (Mateo 6:33; Hebreos 13:​5-ta liyipai).

7, 8. ¿Sudamericamanta huauqui Javierca ima shinataj Diospi confiashcata ricuchirca? (Fotomantapish parlapai).

⁷ Sudamericapi causaj huaqui Javiercaa Jehová Diospi confiangapajmi esforzaricurca. Paica: “Trabajota mashcacushpaca allita pagasha nishca trabajotami tarircani. Chaimantami cushilla sintirircani. Pero ñucaca precursor canatapishmi achcata munarcani. Ña chai gerente ñucata entrevistagrijpica Jehová Dios ñucata pushachunmi mañarcani. Precursor canata jarcaj trabajotaca manataj chasquisha nircanichu” nircami.

⁸ “Gerenteca achca horascunata trabajana cashcatami nirca. Chaimantami respetohuan: ‘Diosta sirvingapajpishmi tiempota minishtini. Cai trabajotaca mana chasquishachu’ nircani. Ishqui semana qꞌuipaca precursormi tucurcani. Tiempo qꞌuipapish semanapi huaquin punllacunata trabajangapajmi shuj trabajota japircani. Chashnami Jehová Diosca ñuca mañashcata cutichirca. Cunancarin precursor cashcamanta, huauqui panicunahuan tiempota pasashcamantami cushilla sintirini” nircami.

9. ¿Huauqui Tresormantaca imatataj yachanchij?

⁹ Ñucanchij trabajo Jehová Diosta sirvichun jarcajpica, ¿imatataj rurana canchij? Congo llajtamanta Trésor shuti huauquimanta parlashunchij. Paica: “Ñuca munashca trabajotami japircani, achca cullquitapishmi ganaj carcani. Achcacunami ñucataca respetaj carca” nircami. Shinapish achca horascunata trabajana chashcamantami reuniocunamanca mana rij carca. Chai trabajopica mana allicunata pacangapajmi llullacunata nichun nij carca. Chai huauquica: “Chaimi trabajota saquinata yuyarircani. Pero trabajo illaj saquirinatami manchaj carcani. Habacuc 3:​17-19-pi nishcata yuyarishpami Jehová Dios cuidana cashcata intindircani. Chaimi chai trabajota saquinata decidircani. Achca jefecunaca, ‘empleadocunaca alli pagashca trabajota charingapajca imatapish rurancunallami’ nishpami yuyancuna. Por ejemplo, empleadocunaca maipica familiahuan tiempota pasanata, Diosta sirvinatami saquishcacuna. Pero ñucaca Jehová Diosta, ñuca familiata mana saquishcamantami cushilla sintirini. Chai trabajota saquishca shuj huata qꞌuipaca Jehová Diosca ñuca familiata mantiningapaj, paitapish alli sirvingapajmi shuj alli trabajota japichun ayudarca. Jehová Diosta punta lugarpi churashcamantami huaquinpica ashalla cullquita charishun. Pero pai cuidanataca manataj cungarinachu canchij” nircami. Chaimantami imata ricushcallata, yuyashcallata catinapaj randica Jehová Diospi confiashpa trabajota mashcana canchij. Chashnami Jehová Diosca bendicianga.

¿PIHUAN CAZARANATA MASHCACUSHPACA IMACUNALLAPITAJ YUYANA CANCHIJ?

10. ¿Cazarasha nishpaca maipica imacunapitaj yuyanchij?

¹⁰ Cazaranaca Jehová cushca regalomi can. Chaimi maipica cazarana munaita charinchij. Tal vez shuj pani cazarasha nishpaca pai imata ricushcallapichari yuyacun. Por ejemplo, chai huauqui ima shina cashcata, shujtajcuna paita ima shina ricuj cashcata, cullquita charij cashcata, familiata mantini tucushcata, paita ima shina trataj cashcatachari ricun.b Cazarangapaj chaicunta ricuna cashpapish mana chaicunallatachu ricuna can.

11. ¿Cazarasha nishpaca ima shinataj Diospi confiascataca ricuchinchij? (1 Corintios 7:39).

¹¹ Cazarasha nij huauqui panicuna Diospaj consejota catijpica paica achcatami cushicun. Por ejemplo, paica yallitaj huambraraj cashpa casarachunca mana munanchu (1 Corintios 7:36). Shinallataj shuj alli cusa, shuj alli huarmi ima shina cana cashcatami Bibliapi alli intidichin (Proverbios 31:​10-13, 26-28; Efesios 5:33; 1 Timoteo 5:8). Ashtahuancarin Diosta sirvijcunapuralla cazarachunmi mandan (1 Corintios 7:​39-ta liyipai). Cai consejocunata pajtachishpaca Jehová Diospi confiashcatami ricuchincuna. Paimi cushilla causachun ayudanga (Salmo 55:22).

12. ¿Pani Rosapaj experienciamantaca imatataj yachai tucunchij?

¹² Colombiamanta caj pani Rosamanta parlashun. Paica precursorami can. Paipaj trabajopica Diosta mana sirvij runatami rijsirca. Chai runa paita alli tratai callarishcamantami pani Rosaca paimanta enamorari callarirca. Paica: “Alli cꞌari laya, vecinocunatapish ayudajmi carca. Ñucatapish alli tratashcamantami alli cusa cana cashcata yuyarcani. Pero paica Diosta mana sirvijchu carca. Ñuca sololla sintirishcamanta, cazarangapaj shuj turita mana tarishcamanta, chai runamanta enamorari callarishcamantami mana ninaca shinchi carca” nircami. Shinapish pani Rosaca pai imata yuyashcallata, ricushcallata catinapaj randica Jehová Dios imata munashcapimi yuyarca. Jehovamanta ama caruyangapajca chai runahuanpish ña mana apanacujchu carca, Diosta sirvinapimi ashtahuan ocuparirca. Qꞌuipacarin paitaca Escuela para Evangelizadores del Reinomanmi invitarca. Cunanca precursora especial shinami sirvicun. Pani Rosaca: “Ñuca causaipica Jehová Diosca achcatami cushichishca” ninmi. Enamorarishca cashpaca Jehová Dios munashcata ruranaca maipica mana jahuallachu can. Pero pihuan cazaranata mashcacushpa Dios pushachun saquishpaca mana llaquicunapi urmashunchu.

¿INSTRUCCIONCUNATA CHASQUISHPACA IMALLAPITAJ YUYANA CANCHIJ?

13. ¿Diospaj pueblopi instruccioncunata chasquishpaca maipica imatataj yuyanchij?

¹³ Ancianocunapish, superintendentecunapish, Cuerpo Gobernantemanta huauquicunapishmi huaquin instruccioncunata cuncuna. Maipica chai instruccioncunata mana tucuita intindinchijchu. ¿Chaipica imatataj rurashun? ¿Chai instruccioncuna juchayuj huauquicunamanta samushcatachu yuyashun?

14. ¿Diospaj pueblopi instrucccioncunata cazungapajca imatataj rurana canchij? (Hebreos 13:17).

¹⁴ Ñucanchij ricushcallapi, yuyashcallapi confianapaj randica Jehová Dios paipaj pueblota ñaupajman pushacushcapimi confiana canchij. Chaimantami mana quejarishpa utca cazuna canchij (Hebreos 13:​17-ta liyipai). Cazujcuna cashpaca congregación ucupi tandalla cachunmi ayudashun (Efesios 4:​2, 3). Pushaj huauquicuna juchayuj cajpipish cazunami canchij. Chaimi Jehová Diosca achcata bendicianga (1 Samuel 15:22). Paipaj pueblopi imata corregina cashpaca Jehová Diosllatajmi chaitaca ruranga (Miqueas 7:7).

15, 16. ¿Kevinca instruccioncunata cazungapajca imatataj yuyarirca? (Fotomantapish parlapai).

¹⁵ Instruccioncunata cazuna valishca cashcata yachangapajca Perú llajtapi ima tucushcata yachashun. Chai llajtapica achcacunami quechua shimita rimancuna. Achca huatacunatami huauqui panicunaca quechuata parlajcunata mashcashpa achcata purijcuna carca. Pero qꞌuipaca pushaj huauquicunaca ama mashcashpa purichunmi mandarca. Chaimi huaquincunaca: “¿Quechuata parlaj gentecunataca ima shinataj tarishun?” nishpa tapurircacuna. Shinapish cazujcuna cashcamantami Jehová Diosca quechuata parlaj gentecunata tarichun bendiciarca.

¹⁶ Quechua congregacionta pushaj huauqui Kevinpajca chai instruccioncunata cazunaca sinchimi carca. Paica: “¿Cunanca quechuata parlaj gentecunata ima shinashi tarishun?” nishpami tapurij carca. Kevinca: “Proverbios 3:​5-pi nishcatapish, Moisespaj ejemplotapishmi yuyarircani. Jehová Diosca israelitacunata Egiptomanta llujchishpa, Puca mama cuchaman pushachunmi Moisesmanca mingarca. Chaipi mana quishpirina laya cajpipish Moisés cazushcamantami, Jehová Diosca shuj jatun milagrota rurashpa quishpichirca. Chaita yuyarishpami ñucapish cazunata decidircani” nircami (Éxodo 14:​1, 2, 9-11, 21, 22). ¿Cazushcamantaca imataj tucurca? Kevinca: “Jehová Diosca achcatami bendiciashca. Ñaupaca quechua shimita parlajcunata taringapajca achcatami purijcuna carcanchij. Pero cunanca achca gentecuna quechuata parlaj ladomanmi predicanaman rinchij. Chaimantami achcacunahuan parlai tucunchij, revisitacunatapish, Bibliamanta yachacujcuntapishmi charinchij. Shinallataj achcacunami reunioncunaman ricuncuna” ninmi.

17. ¿Cai yachaipica imatataj yacharcangui?

¹⁷ Cai yachaipica imatapish decidingapajca Diospi confiana cashcata, paita cazuna cashcatami yachashcanchij. Por ejemplo, maipica ima shina divirtirinata, imata estudianata, huahuacunata ima shina huiñachinatami decidina canchij. Alli decidingapajca Diospaj consejocunapi, pai ñucanchijta cuidana cashcapipishmi confiana canchij. Chaimanta ñucanchij ricushcallata, yuyashcallata catinapaj randica Jehová Diosllata huiñai huiñaita cazushpa causashunchij (Miqueas 4:5).