Jehová Dios canta cushichichun saqui

1. ¿Babiloniaman prezu apashca judiocunaca ima shinataj causarcacuna?

¿BABILONIAMAN prezu shina apashca judiocunaca ima shinataj sintirishcangacuna? Paicunaca Jerusalén llajtata ima shina tucuchishcatami ricurcacuna. Paicunapaj juchacunamanta, paicunapaj yaya mamacunapaj juchacunamantami paicunataca prezu shina aparcacuna (2 Crónicas 36:​15, 16, 20, 21). Judiocunaca Babiloniapica mana tanto esclavocuna shinachu causajcuna carca (Jeremías 29:​4-7). Paicunaca Babilonia llajtaman rinataca mana agllashcacunachu carca. Chaimantami chaipi causanaca sinchi cashcanga. Babiloniapi causaj shuj judioca: “Babilonia llajta jatun yacucuna cꞌuchu uricunapi tiyarishpami, Sionta yuyarishpa huacaj carcanchij” nircami (Salmo 137:1). Babiloniaman prezu shina apashca judiocunaca cushichichunmi minishtircacuna. ¿Pero paicunataca pitaj cushichirca?

2, 3. a) ¿Jehová Diosca Babiloniaman apashca judiocunataca ima shinataj ayudarca? b) ¿Cai yachaipica imatataj yachashun?

² Jehová Diosca “tucuipi cushichij Diosmi” can (2 Corintios 1:3). Paica paihuan apanacusha nijcunatami cꞌuyan. Chaimantami paicunataca cushichisha nin. Jehová Diosca huaquin judiocuna paicunapaj juchacunamanta arrepintirishpa cutin paita alli adoranatami yacharca (Isaías 59:20). Chaimantami israelitacuna Babiloniaman prezu shina ringapaj 100 huatacuna faltajpiraj Isaías librota quillcachirca. Isaiasca cashnami nirca: “‘¡Cushichichij, cushichichij ñuca agllashcacunata!’ ninmi cancunapaj Taita Diosca” (Isaías 40:1). Shinashpaca Jehová Diosca Babiloniaman prezu shina apashca judiocunata cushichingapajmi Isaías librota quillcachirca.

³ Ñucanchijpish maipica cushichichunmi minishtinchij. Chaimantami cai yachaipica Jehová Dios Babiloniaman apashca judiocunata ima shina cushichishcata ricushun: 1) Diosca, “arrepintirijcunataca perdonashami” nircami, 2) paita alli sirvijcunamanca shuj esperanzatami curca y 3) judiocunataca manchaita ama charichunmi ayudarca. Cai quimsa yuyaicunata yachacushpaca cunan punllacunapi Jehová Dios ñucanchijta ima shina cushichicushcatapishmi yachashun.

DIOSCA LLAQUISHPA PERDONAJMI CAN

4. ¿Jehová Diosca yallitaj llaquij cashcataca ima shinataj ricuchirca? (Isaías 55:7).

⁴ Jehová Diosca “yallitaj llaquij Yayami” can (2 Corintios 1:3). Babiloniaman apashca judiocuna arrepintirijpi perdonanata huillashpami paica yallitaj llaquij cashcata ricuchirca (Isaías 55:​7-ta liyipai). Yaya Diosca: “Huiñaipaj llaquishpami cantaca cꞌuyaigrini” nircami (Isaías 54:8). ¿Chashna llaquij cashcataca ima shinataj ricuchirca? Judiocuna Jehová Diosta mana cazushcamantami achca huatacunata Babiloniapi prezu shina causana carcacuna. Shinapish Jehová Diosca mana para siempre chaipi saquirina cashcatami huillarca. Paicunaca Babiloniamanta llujshishpa cutinmi Jerusalenman tigrana carcacuna (Isaías 40:2). Paicunapaj juchacunamanta arrepintirij judiocunaca chaita uyashpaca achcatami animarishcangacuna.

5. ¿Jehová llaquij cashcataca imamantataj seguros canchij?

⁵ ¿Caimantaca imatataj yachanchij? Jehová Diosca ñucanchijtaca tucui shunguhuanmi perdonasha nin. Babilonia llajtapi caj judiocunaca Jehová Dios perdonaj cashcataca segurosmi carcacuna. Pero ñucanchijca ashtahuan segurosmi canchij. Jehová Dios perdonaj cashcata Isaías parlashcamantaca achca huatacunami pasarca. Chai huashaca Diosca paipaj Churitami arepintirijcunamanta huañuchun cai Allpaman cacharca. Jesús huañushcamantami Jehová Diosca ñucanchij juchacunata por completo chingachinga (Hechos 3:19; Isaías 1:18; Efesios 1:7). Caipi ricushca shinaca Jehová Diosca yallitaj llaquijmi can.

6. ¿Jehová Dios yallitaj llaquij cashcataca imamantataj yuyarina canchij? (Fotocunamantapish parlapai).

⁶ Imapi pandarishcamanta ña arrepintirishca cashpapish huaquinpica llaquillami sintirishpa catishun. Chashna sintiricushpaca Isaías 55:​7-pi nishcatami yuyarina canchij. Maijancunaca imapi pandarishcamanta llaquicunata apacushcamantami llaquilla sintirincuna. Pero paicunapaj juchacunata ña huillashca cashpa, chaillapitaj ama cutin urmangapaj esforzaricushpaca Jehová Dios paicunata perdonashcatami seguros cana can. Paica ñucanchijta perdonashca qꞌuipaca ñucanchij juchacunataca mana yuyaricunllachu (Jeremías 31:​34-tapish ricui). Ñucanchijpish chaicunapica mana yuyacunallachu canchij. Jehová Diosca ñaupa punllacunapi imapi pandarishcallata ricunapaj randica cunan punllacunapi paimanta imata ruracushcatami ricun (Ezequiel 33:​14-16). Ashtahuanpish Yayitu Jehová Diosca ñucanchij juchacunamanta apacushca llaquicunataca ñallami tucuchinga.

7. ¿Ñucanchij juchacunata mana manchashpa huillangapajca imatataj rurana canchij?

⁷ Jatun juchata rurashca qꞌuipa upalla saquirishpaca llaquillachari sintirishun. ¿Chashna sintiricushpaca imatataj rurana canchij? Bibliaca ñucanchij juchacunata ancianocunaman huillachunmi animan (Santiago 5:​14, 15). Chaita ruranaca mana jahuallachu canga. Pero Jehová Dios ñucanchijta ayudachun ancianocunata churashcatami yuyarina canchij. Shungumanta arrepintirijcunata Jehová Diospish, ancianocunapish cꞌuyaihuanmi ayudancuna. Chaita yuyarishpaca mana manchashpami ancianocunahuan parlashun. Jehová Dios Arthur shuti huauquita llaquishpa ima shina ayudashcata ricushun.a Paica: “Más o menos shuj huatatami pornografiata ricurcani. Pero alli concienciata charinamanta shuj conferenciapi yachachijpimi ñuca huarmimanpish, ancianocunamanpish pornografiata ricushcata huillarcani. Chaita rurashcamantami asha tranquilo sintirircani. Pero ñuca pandarishcacunata yuyarishpaca maipica llaquillami sintirij carcani. Anciano huauquicunaca cꞌuyaihuanmi Jehová Diospaj ñaupajpi cutin alli ricurishcata, ashtahuanpish Jehová Dios ñucata cꞌuyashcamanta corregishcata yuyachircacuna. Chaita uyashpami llaquilla sintirinata saquircani” nircami. Huauqui Arthurca cunanca precursor regular, siervo ministerialpishmi can. Ñucanchij juchacunamanta arrepintirijpi Jehová Dios perdonaj cashcata yachashpaca ¿manachu cushilla sintirinchij?

JEHOVÁ DIOSCA ESPERANZATAMI CUN

8. a) ¿Jehová Diosca judiocunamanca ima esperanzatataj curca? b) ¿Judiocunaca esperanzata charishcamantaca ima shinataj sintirircacuna? (Isaías 40:​29-31).

⁸ Babiloniocunaca esclavocunataca mana cacharijcunallachu carca. Chaimantami judiocunapajca Jerusalenman cutin tigranaca mana crina laya carca (Isaías 14:17). Shinapish Jehová Diosca “cancunataca cacharishami” nirca. Jehová Dios nishcacuna pajtarichunca pi mana jarcai tucurcachu (Isaías 44:26; 55:12). Jehová Diospaj ñaupajpica babiloniocunaca polvo shinallami carca (Isaías 40:15). Ima shinami polvoca shuj pꞌucuillapi chingarin, chashnallatajmi Jehová Diosca israelitacunataca rato quishpichigrirca. Chaita yachashcamantami judiocunaca cushilla sintirishcangacuna. Ashtahuanpish Isaiasca: “Mandaj Diospi shunguta churajcunaca mushuj fuerzatami charingacuna” nishpami quillcarca (Isaías 40:​29-31-ta liyipai). Chai esperanzata charishcamantami judiocunaca ‘aguilacuna shina jataringapaj’ fuerzasta japircacuna.

9. ¿Judiocunaca Diospica imamantataj confiarcacuna?

⁹ Judiocunaca Jehová Dios tucui imalla nishcacuna pajtarishcata ricushcamantami paipi confiarcacuna. Por ejemplo, Jehová Dios huillashca shinami asiriocunaca Israelmanta 10 jatun familiacunahuan macanacushpa esclavocunata shina paicunata apashcacuna carca (Isaías 8:4). Babiloniocuna Jerusalenta tucuchishpa chaipi causajcunata apashpa rishcatapishmi ricushcacuna carca (Isaías 39:​5-7). Babiloniata mandaj Sedequiasta ciegota rurashpa Babiloniaman prezuta shina apashcatapishmi ricurcacuna (Jeremías 39:7; Ezequiel 12:​12, 13). Shinaca Jehová Dios tucui imalla nishcacunami pajtarirca (Isaías 42:9; 46:10). Chaimantami judiocunaca Jehová Dios paicunata cacharichinata seguros carcacuna.

10. ¿Jehová Dios cusha nishcacunata japina yuyailla causangapajca imatataj rurana canchij?

¹⁰ ¿Caimantaca imatataj yachanchij? Desanimados cashpaca Jehová Dios cusha nishcacunapi yuyashpami fuerzata japishun. Sinchi punllacunapi causacushpapish, millai gentecuna llaquichisha nijpipish mana yallitaj desanimarinachu canchij. Ashtahuanpish Jehová Dios cusha nishcacunata japina yuyaillami causana canchij. Shuj ventana mapa cajpica canllapi tiyaj sumaj paisajetaca mana ricui tucunchijchu. Chashna layallatajmi Dios cusha nishcacunata yuyaipi mana charishpaca shuj mapa ventanamanta canllapi tiyaj sumaj paisajeta mana ricui tucushca shinami canga. ¿Pero chai mapa ventanata limpiaj shina Dios cusha nishcacunata japina yuyailla causangapajca imatataj rurana canchij? Paraisopi causana ima shina canata yuyangapajmi tiempota surcuna canchij. Sumaj articulocunata, publicacioncunata liyishpa, videocunata ricushpa, Diosmanta yachachij cantocunata uyashpami ñucanchij esperanzata sinchiyachishun. Shinallataj Jehová Diosmanmi ima bendicioncunata chasquisha nishcata huillana canchij.

11. ¿Juliaca fuerzasta japingapajca imatataj ruran?

¹¹ Pani Juliataca millai ungüimi japirca. Shinapish paica Dios cusha nishca esperanzapi yuyashpami animarishca. Paica: “Ñuca llaquicunata ña mana ahuantai tucushcata yuyashpaca shunguta pascashpami Yayitu Diosman ñuca ima shina sintirishcata huillani. Pai ñucata intindij cashcataca seguromi cani. Yayitu Diosca fuerzasta cushpami ñuca mañashcacunata cutichishca” nircami (2 Corintios 4:7). Shinallataj pani Juliaca paraisopi ña causacushcata yuyashpami animarin. Chaipica “ungushcami cani” pi mana ningachu (Isaías 33:24). Ñucanchijpish animota japingapajca Yayitu Diosmanmi ima shina sintirishcata huillana canchij. Pai cusha nishcacunapipishmi yuyana canchij.

12. ¿Dios cusha nishcacuna pajtarinataj cashcataca imamantataj crinchij? (Fotocunamantapish parlapai).

¹² Babiloniaman apashca judiocuna shinami ñucanchijpish Jehová Dios cusha nishcacunapi confiai tucunchij. Cunan punllacunapi huaquin profeciacuna ña pajtaricushcata yuyashun. Por ejemplo, Bibliapi huillashca shinami Inglaterra, Estados Unidos llajtacunaca achca poderta charishpapish ‘ashaca sinchi, ashaca urmanalla’ can (Daniel 2:​42, 43). Shinallataj cunan punllacunapica tucui ladocunapimi allpa chujchuicuna tiyan. Alli huillaicunatapishmi ‘muyundij allpapi huillacunchij’ (Mateo 24:​7, 14). Cai profeciacuna, shujtaj profeciacunapish ña pajtaricujta ricushpaca achcatami animarinchij. Shinallataj shujtaj profeciacunapish pajtarinataj cashcatami seguros canchij.

YAYITU DIOSCA MANCHAITA AMA CHARICHUNMI AYUDAN

13. a) ¿Judiocunaca Babiloniamanta ñalla llujshigrishpaca ima llaquicunatataj apana carcacuna? b) ¿Isaías 41:10 al 13-pi nishca shinaca Jehová Diosca judiocunataca ima shinataj sinchiyachirca?

¹³ Jehová Diosca judiocunataca sumaj esperanzata cushpami cushichirca. Pero Babiloniamanta ñalla llujshigrishpaca paicunaca achca llaquicunatami apana carcacuna. Achca poderta charij mandajmi chai cꞌuchullapi tiyaj llajtacunatapish, Babiloniatapish mishashpa dueñoyana carca (Isaías 41:​2-5). Chashna tucuna cajpipish judiocunaca mana manchanachu carca. Achca huatacuna huashamanmi Jehová Diosca paicunata sinchiyachingapajca sumaj shimicunata quillcachirca. Paica: “Ñuca canhuan cashcamanta ama manchaichu, ama shaicurichu. Ñucami canman fuerzata cuj Taita Dios cani” nircami (Isaías 41:​10-13-ta liyipai). Jehová Diosca ‘ñucami cambaj Dios cani’ nishpaca paita adorana cashcallataca mana nicurcachu. Ashtahuanpish paicunata ayudangapaj paicunapaj cꞌuchullapi cashcatami yuyachisha nirca (Salmo 118:6).

14. ¿Diosca judiocunataca ima shinataj animarca?

¹⁴ Diosca judiocunata sinchiyachingapajca pailla tucuita yachaj cashcata, pailla mana tucurij poderta charishcatapishmi yuyachirca. Shinallataj ‘huichilla ricushpa ñuca rurashca estrellacunata ricuichigari. Ñucaca chaicunataca mana rurarcanillachu. Ashtahuanpish paicunapaj shuticunapimi cada unota cayani’ nircami (Isaías 40:​25-28). ¿Jehová Diosca manachu paita sirvijcunapish cada uno ima shuti cashcata yachan? Ashtahuanpish tucui estrellacunata rurangapaj poderta charishcata ricushpaca paita sirvijcunata ayudangapajpish poderta charishcatami cuentata cunchij. Shinaca judiocunaca imata mana manchanachu carca.

15. ¿Judiocuna allichirishca cachunca Jehová Diosca ima instruccioncunatataj curca?

¹⁵ Jehová Diosca judiocuna allichirishca cachunmi instruccioncunata curca. Isaías capítulo 26-pica Jehová Diosca: “Ñuca agllashcacunalla richij, cancunapaj huasiman yaicurichij. Pai alli tucungacama punguta huichcarishpa pungu huashapi ashacama miticuichij” nircami (Isaías 26:20). Cai versopi nishcacunaca mandaj Ciro Babiloniata dueñoyajpimi pajtarishcanga. Ñaupa Grecia llajtapi causaj runaca: “Mandaj Ciroca Babiloniaman yaicushpaca paipaj soldadocunataca canllapi puricujcunata huañuchichunmi mandarca” nircami. Chaita ricushpami babiloniocunaca achcata mancharishcangacuna. Shinapish judiocuna Jehová Dios cushca instruccioncunata pajtachishcamantami mana huañushcangacuna.

16. ¿Jatun llaqui punllacuna ñalla chayamunata yachashpapish imamantataj mana mancharina canchij? (Fotomantapish parlapai).

¹⁶ ¿Caimantaca imatataj yachanchij? Ñallami nunca mana tiyashca jatun llaqui punllacuna callaringa. Chai punllacuna callarijpica gentecunaca achcatami mancharingacuna. Shinapish Jehová Dios ñucanchij cꞌuchullapi cashcamantami imata mana manchashun. Ashtahuanpish ‘ñucanchijta quishpichina punlla chayamucushcata’ ricushpaca cushillami sintirishun (Lucas 21:28). Achca llajtacunapish tandanacushpami ñucanchijta llaquichisha ningacuna. Pero paicuna llaquichisha nijpipish Jehová Diospimi confiashpa catishun. Jehová Diosca angelcunahuanmi ñucanchijta cuidanga. Shinallataj ama huañuchunmi instruccioncunata cunga. ¿Ima shinataj chai instruccioncunataca cunga? Tal vez congregacioncunami ñucanchijpajca miticuna ucucuna shina canga. Shinashpaca jatun llaqui punllacunapaj allichirishca cangapajca huauqui panicunamantaca mana caruyanachu canchij. Jehová Dios cushca instruccioncunatapishmi mana pꞌiñarishpa cazuna canchij. Jehová Dios paipaj organizacionta pushacushcatapish tucui shunguhuanmi crina canchij (Hebreos 10:​24, 25; 13:17).

17. ¿Jehová Dios ñucanchijta cushichichunca imatataj rurana canchij?

¹⁷ Babiloniapi causaj judiocunaca achca llaquicunahuanmi chꞌimbapurarcacuna. Shinapish Jehová Diosmi paicunata cushichirca. Paica ñucanchijtapishmi cushichisha nin. Chaimanta, shamuj punllacunapi ima tucujpipish cushichij Jehová Diosmantaca ama caruyashunchij. Paica yallitaj llaquij Diosmi can. Pai yallitaj llaquij cashcata, shinallataj ñalla pai cusha nishca bendicioncunata chasquigrishcatapish amataj cungarishunchij. Jehová Dios ñucanchij cꞌuchullapi cashcata yuyaipi charishpaca imata mana manchashunchu.