“Cai macanacuica Jehová Diospajmi can”

1993-huatamanta 1996-huatacamaca Franciapaj gobiernoca Testigocuna cushca donacioncunamantami shuj impuestota pagachun nirca. 1999 huatapica chai impuestotami cobrasha nircacuna. Yallitaj achca cullquita yangamanta cobrasha nishcamantami Franciapaj juezcunapaj ñaupajman rircanchij. Chai juiciota pirdishcamantami Tribunal de Apelacionespi caj shujtaj juezcuna ayudachun mañarcanchij. Chai juiciopipish cutinmi pirdircanchij. Chaimi gobiernoca Testigocunapaj sucursalta 6.300.000 dolarcunata quichurcacuna. Chai cullquita yangamanta quichushcamantami Tribunal Europeo de Derechos Humanospi caj juezcuna ayudanata yuyashpa ayudachun mañarcanchij. Paicunaca juicio punlla manaraj chayajpimi ñucanchijtapish, Francia gobiernopaj abogadocunatapish chai problemata allichingapaj Tribunal Europeopaj shuj secretariahuan tandanacuchun mañarcacuna.

“Tribunal Europeopaj secretariaca ashtahuan cullquita pagachunmi ninga” nishpami yuyarcanchij. Shinapish ima cullquita mana pagana cashcatami cuentata curcanchij. Huauqui panicuna cushca donacioncunaca Yayitu Diospajmi carca, mana Francia gobiernopajchu carca. Chaimantami shuj centavollatapish mana pagana cashcata intindircanchij (Mateo 22:21). Chaita intindishpapish Tribunal Europeopi cajcunata respetashcamantami chai tandanacuiman rircanchij.

Shuj alaja salapimi tandanacurcanchij. Chai tandanacui callarijpica Tribunal Europeopaj secretariaca: “Franciapaj gobierno mañashca impuestocunataca ashallatapish paganami canguichij” nircami. Paita uyashca huashaca Diospaj espíritu santo yuyachijpimi ñucanchijca: “¿Franciapaj gobierno ña 6 millón yalli dolarcunata quichushcataca yachanguichu?” nishpa tapurcanchij.

Chai secretariaca cullquita quichushcataca mana yacharcachu. Chaimi Francia gobiernopaj abogadocunataca: “¿Chaica ciertochu can?” nishpa tapurca. Ari nijpimi paica dimastij pꞌiñarishpa, paicunata sinchita rimashpa chai rato chai tandanacuita tucuchirca. Chaita ricushpami mana yuyashcapi Jehová Dios ayudashcata cuentata curcanchij. Chaimantami chai tandanacuimantaca dimastij cushilla llujshircanchij.

30 de junio de 2011 huatapica Tribunal Europeo de Derechos Humanospi caj juezcunaca juiciotami ñucanchijta ganachircacuna. Paicunaca: “Franciapaj gobiernoca Testigocunataca ima impuestota mana cobranachu can” nishpami decidircacuna. Quichushca cullquitapish intereshuan pagachunmi nircacuna. Chai ganashca juicioca Franciapi caj huauqui panicunatami Jehová Diosta sirvishpa catichun cunancama ayudashca. Chai juiciota ima shina ganashcata yuyarishpami David nishcacuna cierto cashcata cuentata curcanchij. Jehová Diosllatajmi paipaj espíritu santohuan secretariata chashna tapuchun ñucanchijman yuyaita curca. Chai tapuica Goliatta umapi huajtashpa huañuchishca rumi shinami carca. Chaimantami David Goliatta nishca shinallataj “cai macanacuica Jehová Diospajmi can” nishpa ñucanchijpish cushicurcanchij (1 Samuel 17:​45-47).

Chꞌican chꞌican llajtacunapica achca poderta charij gobiernocunapish, religionta pushajcunapish achca jarcaicunatami churashcacuna. Chashna jarcajpipish cunan camaca 70 llajtacunapimi 1.225 juiciocunata ganashcanchij. Chai juiciocunata ganashcamantami chꞌican chꞌican gobiernocunaca Diosta sirvingapaj ña mana jarcaicunata churancuna. Maipi cashpapish huillachunmi saquishcacuna. Himno nacionalta cantachun, banderapaj ñaupajpi cumurichun, hospitalcunapi yahuarta churachichunpishmi ña mana obligancuna.

Shinapish callaripica ñucaca Brooklin, Estados Unidos llajtapimi Betelpi sirvij carcani. Chai huashaca ¿ima shinataj abogado tucurcani? ¿Juiciocunapipish ima shinataj huauqui panicunata difindi callarircani? Chaitami cunanca parlagrini.

ÑUCA YAYA MAMACA ÑUCAMANMI ALLI EJEMPLOTA SAQUIRCACUNA

Ñuca yayitu George, ñuca mamita Lucilleca Escuela de Galaadpaj clase 12-manmi rishcacuna carca. 1956 huatapica Etiopía llajtapimi sirvicurcacuna. Chai huatallapitajmi ñucapish huacharircani. Ñucataca alli huillaita huillaj Felipepaj shutipimi shutichircacuna (Hechos 21:8). 1957 huatapica gobiernoca Testigocunatami jarcai callarirca. Ñucaca uchillaraj cashpapish ñuca familiahuan pacalla tandanacuicunaman rij cashcata, pacalla huillaj cashcatami yuyarini. Jarcaicunata charishpapish ñuca yaya mama Diosta sirvishcata ricushpami ñucapish cushilla sintirircani. Shinapish 1960 huatapica gobiernoca Etiopía llajtamanta ñucanchijta llujchishpami cacharcacuna.

Ñuca familiahuanca Estados Unidospi saquirij Kansas llajtapimi causanaman rircanchij. Ñuca yaya mamaca misionerocuna shina huillanata munachunmi yachachircacuna. Shinallataj ñucatapish, ñuca punta pani Judytapish, ñuca qꞌuipa huauqui Leslietapish Diosta alli sirvichunmi yachachircacuna. Quimsandijmi Etiopía llajtapi huacharircanchij. Ñucaca 13 huatacunallata charishpami bautizarircani. Quimsa huata qꞌuipacarin Perupi saquirij Arequipa llajtapi causanamanmi rircanchij. Chaipica huillajcuna minishtirin lugarpimi sirvircanchij.

1974 huatapica ñuca 18 huatacunata charijpimi ñucatapish, shujtaj chuscu huauquicunatapish precursores especiales cachun agllarcacuna. Cordillera Central de los Andes nishca urcucunapimi punta cutin huillachun cacharcacuna. Chaipica quechua y aimara nishca shimicunata parlaj gentecunamanmi huillai tucurcanchij. Chai lugarcunataca shuj carropimi viajaj carcanchij. Chai carroca shuj jatun caja layami carca. Chaimi chaillapitaj causajcuna carcanchij. Ñucaca cꞌuyaihuanmi gentecunamanca ungüicunata, huañuita, huajcha causaitapish Yayitu Jehová Dios ñalla tucuchinata huillaj carcani (Apocalipsis 21:​3, 4). Chai lugarcunapi huillashcamantami achca gentecunaca Diosta sirvi callarircacuna.

CENTRAL MUNDIALPI SIRVICHUNMI INVITARCACUNA

1977 huatapica Cuerpo Gobernantepi sirvij Albert Schroeder huauquimi Perú llajtapi visitanaman rirca. Paica Central Mundialpi sirvichunmi shuj solicitudta jundachichun ñucata animarca. Chai solicitudta cachashca huashallami 17 de junio de 1977-pica Brooklyn Betelman invitarcacuna. Chaipica edificiocunata pꞌichashpa, allichishpami chuscu huatacunata trabajaj carcani.

Junio de 1978 huatapica Luisianapi saquirij Nueva Orleans llajtapimi shuj asamblea internacional tiyarca. Chaipica Elizabeth Avallone nishca shuti panitami rijsircani. Paipaj yaya mamapish ñuca yaya mama shinami Yayitu Diosta alli sirvijcuna carca. Elizabethca chuscu huatacunatami precursora regular cashcarca. Tucui vidami Yayitu Diostapish tiempo completopi sirvinata munarca. Chaimi paihuan parlanacushpa catircanchij. Asha tiempo qꞌuipacarin dimastijmi enamorarircanchij. Chai huashaca 20 de octubre de 1979-pimi cazararcanchij. Cazarashca huashaca tandallami Betelpi sirvi callarircanchij.

Qꞌuipaca Brooklynpi saquirij español congregacionpimi ñuca huarmisitahuan sirvi callarircanchij. Chaipi caj huauqui panicunaca cꞌuyaitami ricuchircacuna. Caishuj quimsa congregacioncunapipishmi tauca huatacunata sirvicushcanchij. Chaipi caj huauqui panicunapish cꞌuyaihuanmi Betelpi sirvishpa catichun animashcacuna. Paicunatapish, shujtaj amigocunatapish, familiacunatapishmi ñucanchij yuyajlla yaya mamata cuidashpa ayudashcamanta shungumanta agradicinchij.

ABOGADO CANGAPAJMI ESTUDIARCANI

Enero de 1982 huatapica Departamento de Asuntos Legalespi trabajachunmi cacharcacuna. Quimsa huatacuna huashacarin universidadpi abogadopaj titulota surcuchunmi cacharcacuna. Universidadpi estudiacushpaca testigo de Jehovacuna ganashca juiciocunamantami achca horascunata yachajcuna carcanchij. Chai juiciocunata ganashcamantami Estados Unidos llajtapi, shujtaj llajtacunapipish gentecunaca paicuna imata rurasha nishcata agllai tucuncuna.

1986 huatapica ñuca 30 huatacunata charijpimi Departamento de Asuntos Legalespaj superintendente cachun agllarcacuna. Ñucapi achcata confiashcata ricushpami cushilla sintirircani. Chaita pajtachina sinchi cashcamantami manchaihuanpish carcani.

1988 huatapimi abogado shina graduarircani. Shinapish universidadpica canllapi yuyachun, shujtajcunata yalli cachunmi yachachincuna. Chaimantami ñucapish chashnallataj yuyai callarircani. Shinapish Yayitu Diosmanta caruyacushcataca mana cuentata cushcarcanichu. Chaimi ñuca huarmisita Elizabethca ñucata ayudarca. Ñuca huarmisita ayudashcamantami ñaupa punllacunapi shinallataj Yayitu Diosta cutin sirvingapaj esforzarircani. Tiempo qꞌuipacarin yachaj canata, jatun canata mashcanapaj randica Yayitu Diospaj alli amigo cana, huauqui panicunatapish, Jehová Diostapish shungumanta cꞌuyana tucuimanta yalli valishca cashcatami intindircani.

ALLI HUILLAICUNATA HUILLASHPA CATINGAPAJMI AUTORIDADCUNAPAJ ÑAUPAJPI DIFINDINCHIJ

Graduarishca qꞌuipaca Testigocuna huillashpa catichunmi paicunata difindishpa Betelpi trabajarcani. Chaipi trabajanataca achcatami munarcani. Shinapish tauca cambiocunami tiyarca. Por ejemplo, 1990 huatapica publicacioncunata cushcamanta cullquita ña mana cobrana cashcatami nircacuna. Chaita rurangapajca ñucanchijcunaca huaquin instruccioncunatami preparana carcanchij. Chai cambio tiyashcamantami gobiernocunaca ñucanchijtaca ña mana yangamanta impuestocunata cobrarcacuna. Publicacioncunamanta ña mana cobrashcamantami Betelpipish, congregacioncunapipish ima cuentasta ña mana rurana carcacuna. Shinapish huaquincunaca: “Publicacioncunata rurangapajca cullquica ña mana pajtangachu. Gentecunapish publicacioncunataca ña mana chasquingacunachu” nishpami yuyarcacuna. Chashna yuyajpipish 1990 huatamanta cunancamaca ashtahuan ashtahuan testigo de Jehovacunami mirarishca. Shinallataj gentecunapish imata mana pagashpami achca publicacioncunata chasqui tucushcacuna. Jehová Dios Cuerpo Gobernantepi caj huauquicunata bendiciashcamantami cai cambiocunaca tucui alli llujshishca (Éxodo 15:2; Mateo 24:45).

Juiciocunataca ñucanchij abogadocunallamantaca mana ganashcanchijchu. Ashtahuanpish shujtajcunaman respetota, cꞌuyaita ricuchishcamantami ganashcanchij. Por ejemplo, 1998 huatapica Cuerpo Gobernantepi sirvij quimsa huauquicunaca paicunapaj huarmisitacunandijmi Cuba llajtapi tiyaj shuj jatun tandanacuiman rircacuna. Paicunaca autoridadcunamanmi cꞌuyaita, respetota ricuchircacuna. Chaita ricushpami autoridadcunaca testigo de Jehovacuna politicapi mana chagrurishcata cuentata curcacuna.

Shinapish huaquinpica alli huillaicunata huillashpa catingapajmi juiciocunapi huauqui panicunata difindina canchij (Filipenses 1:7). Por ejemplo, achca huatacunatami Europa llajtapi, Corea del Sur llajtapica autoridadcunaca ñucanchij huauquicunataca ejercitoman richun obligasha nircacuna. Ñucanchij huauquicuna shujtaj trabajota mingachun mañajpipish autoridadcunaca mana ayudasha nircacunachu. Chaimantami Europa llajtapica 18.000 huauquicunata carcelpi churarcacuna. Cutin Corea del Sur llajtapica 19.000 yalli huauquicunatami carcelpi churarcacuna.

7 de julio de 2011 huatapica Bayatyan contra Armenia nishca juiciomi tiyarca. Chaipica Tribunal Europeo de Derechos Humanospi caj juezcunaca tucui Europa llajtapi ejercitoman richun jovencunata mana obligana cashcatami decidircacuna. Chaipaj randica shujtaj trabajota jovencunaman mingachunmi mandarcacuna. 28 de junio de 2018 huatapica Tribunal Constitucional de Corea del Surpi caj juezcunapish chashnallatajmi decidircacuna. Chai llajtacunapi caj joven huauquicuna ejercitoman mana rishcamanta, Diosta cazushcamantami chai juiciocunata ganarcanchij.

Central Mundialpaj, sucursalcunapaj Departamento de Asuntos Legalespi caj huauqui panicunaca alli huillaicunata huillashpa catingapajmi juiciocunapi difindishpa trabajancuna. Juiciocunata ganashpapish o pirdishpapish achca autoridadta charijcunaman, juezcunaman, shujtaj gentecunamanpishmi Bibliamanta huillai tucushcanchij (Mateo 10:18). Paicunaca juiciocunapaj ñucanchij rurashca documentocunapi tiyaj versocunatami liyi tucuncuna. Juicio horaspipish ñucanchijca paicunapaj ñaupajpimi Bibliapaj huaquin versocunamanta parlanchij. Chaicunata uyashpami alli shungu gentecunaca testigo de Jehovacuna Bibliata cazujcuna cashcata yachaj chayashcacuna. Shujtajcunacarin Yayitu Diostami sirvi callarishcacuna.

JEHOVÁ DIOSTAMI AGRADICINI

Ñuca causaipica achca bendicioncunata chasquishcamantami dimastij cushilla causashcani. Cai tucuri 40 huatacunatami Departamento de Asuntos Legalespi trabajashcani. Chꞌican chꞌican tribunalcunapimi juiciocunaman rishcani. Achca autoridadta charij runacunahuanpishmi parlashcani. Chashna huauqui panicunata ayudanaca dimastij valishcami cashca. Shinallataj muyundij Allpapi tiyaj Departamento de Asuntos Legalespi trabajaj huauqui panicunatapishmi tucui shunguhuan cꞌuyani.

Ñuca huarmisita Elizabethcarin alli horaspipish, llaqui horaspipish 45 huatacunatami ñucata apoyacushca. Paica ungushca cashcamantami maipica fuerza illaj sintirin. Shinapish ñucata ayudanata manataj saquishcamantami tucui shunguhuan agradicini.

Davidca: ‘Mandaj Diosca pai agllashcacunapaj paca tucuna pircami’ nircami (Salmo 28:8). David nishca shinaca Jehová Dios ñucanchijta ayudashcamantami achca juiciocunata ganashcanchij. Chaimantami ñucanchijpish “cai macanacuica Jehová Diospajmi can” ni tucunchij.