¿Bibliapi punta yachashcacunamantaca imatataj ashtahuan yachai tucunchij?

1. ¿Bibliamanta yachai callarishpaca imallatataj yacharcangui?

BIBLIAMANTA yachai callarishpaca Diospaj shutitami rijsircanchij. Jehovapaj shutita yachashcamantami paipaj alli amigo cai tucurcanchij (Salmo 68:4). Huañushcacunapish ña mana sufricushcata yachashcamantami tranquilo sintirircanchij (Eclesiastés 9:10). Shamuj punllacunapi Paraíso Allpapi huiñai huiñaicama causai tucushcata yachashpacarin achcatami cushicurcanchij. Shuj Paraíso tiyanata yachashcamantami shamuj punllacunamanta ña mana achcata preocuparinchij (Salmo 37:29; 90:10).

2. ¿Diosta achca huatacunata sirvicushpapish imamantataj Bibliapi callari yachashcacunata mana cungarina canchij?

² Apóstol Pedro causashca tiempopi caj huauqui panicunaca Bibliamanta punta yachashcacunapimi alli sinchiyarishca carcacuna (2 Pedro 1:​12, 13-ta liyipai). Chashnapish apóstol Pedroca llulla yachachijcuna, millai gentecuna paicunata ama pandachichunmi huauqui panicunata sinchiyachisha nirca (2 Pedro 2:​1-3). Yayitu Jehová Diosta huauqui panicuna sirvishpa catichunmi Pedroca paipaj segunda cartapica Bibliamanta punta yachashcacunata yuyachirca. Ñucanchijpish Yayitu Diosta achca huatacunata sirvicushpapish Bibliamanta punta yachashcacunataca mana cungarinachu canchij. Chai yachashcacunaca achca valishcami can.

3. ¿Achca experienciata charij yanuj runa shinaca Diosta sirvijcunaca imatataj rurana canchij?

³ Caipi yuyashun. Yanunata yachacuj shuj runaca shuj mishqui micunatami yanunata yachan. Cutin achca experienciata charij yanuj runaca chꞌican chꞌican micunacunata, hasta mushuj micunacunatami yanunata yachan. Chai shinallatajmi Bibliamanta yachai callarijcunaca Biblia yachachishca callari yachaicunamanta yachancuna. Cutin achca tiempota Diosta sirvij huauqui panicunaca chai callari yachashcacunamantaca mushuj yachaicunatami yachashpa catincuna. ¿Imamantataj mushuj yachaicunata yachashpa catincuna? Paicuna bautizarishca punllamantami paicunapaj causaipica achca cambiocuna tiyashcanga. Diosta ashtahuan sirvingapajpishmi achcata esforzarishcacuna. Chaimantami Bibliapi punta yachashcacunapi yuyashpaca mushuj yachaicunata yachai tucuncuna. Cai yachaipica Bibliapi yachashca quimsa callari yachaicunamantami parlashun. Chai quimsa yachaicunamantaca imata ashtahuan yachai tucushcatami ricushun.

JEHOVÁ DIOSCA TUCUITA RURAJMI CAN

4. ¿Jehová Dios Tucuita Ruraj cashcamantaca imatataj ashtahuan yachai tucunchij?

⁴ Hebreos 3:​4-pica: “Tucui imalla tiyajcunataca Diosmi rurarca” ninmi. Jehová Diosca Tucuita Ruraj cashcamantami tucuita yachaj, tucui poderta charij Dios can. ¿Jehová Dios Tucuita Ruraj cashcamantaca imatataj ashtahuan yachai tucunchij? Jehová Diosca ñucanchijta ruraj cashcamantami ñucanchijtaca alli rijsin, achcata cꞌuyan. Ashtahuancarin ñucanchijta cꞌuyashcamantami alli causachun yachachin. Caicunata intindishpaca achcatami cushicunchij.

5. ¿Jehová Dios Tucuita Ruraj cashcata yachashpaca imamantataj humildes cana canchij? (Isaías 45:​9-12).

⁵ ¿Jehová Dios Tucuita Ruraj cashcamantaca imatataj ashtahuan yachai tucunchij? Profeta Isaiasca: ‘Lodoca allpamanta imatapish rurajtaca: “¿Imatataj ruragringui imamí?” nishpaca mana tapui tucunchu’ nircami (Isaías 45:​9-12-ta liyipai). Profeta Isaías nishca shinaca Jehová Dios Tucuita Ruraj cashcamantami ñucanchijcunaca humildes cana canchij. Jobpi yuyashun. Paica achca llaquicunata charishpaca ima culpata mana charishcata, ima mana allita mana rurashcata nishpami difindiri callarirca. Chaimi Jehová Diosca pai Tucuita Ruraj, cꞌuyaj, alli Dios cashcata yuyachirca. Chashnami Jobmanca humilde cana cashcata yachachirca (Job 38:​1-4).

6. ¿Ñucanchijllapi ama confiangapaj, humilde cangapajpish imatataj yuyarina canchij? (Fotocunamantapish parlai).

⁶ Achca huatacunata Diosta sirvishcamantachari shuj huauquica Bibliapi nishcacunata mashcanapaj randica pai rurasha nishcacunallapi confiai callaringa (Job 37:​23, 24). Shinapish ¿ama paillapi confiangapaj, cutin humilde cangapajca imatataj yuyarina can? Jehová Dios paita yalli yachaj, Tucuita Ruraj cashcatapishmi yuyarina can (Isaías 40:22; 55:​8, 9). Chaita yuyarishpami paillapi confianapaj randi humilde cana cashcata cuentata cunga.

7. ¿Rahela shuti panica pushaj huauquicuna nishcata cazungapajca imatataj yuyarirca?

⁷ Esloveniamanta Rahela shuti panipi yuyashun. Paica: “Pushaj turicuna imata decidijpica maipica paicunata cazunaca ñucapajca sinchimi cashca. Por ejemplo, 2023 huatapaj Cuerpo Gobernante huillashcacuna (parte 8) nishca videopica pushaj turicunaca turicuna barbasta huiñachichun saquina cashcatami nircacuna. Chaita decidishca huashaca barbasyuj shuj turi conferenciata cucujta ricushpami mana alli sintirircani. Chaimi chai cambiota cazungapaj Jehová Dios ayudachun mañarcani. Qꞌuipacarin Jehová Dios Tucuita Ruraj cashcata, paipaj pueblota alli pushaj cashcatapishmi yuyarircani” ninmi. ¿Cai panicitapaj ejemplomantaca imatataj yachanchij? Yayitu Jehová Dios tucuita yachaj, tucuita rurai tucuj, paipaj pueblota alli pushaj cashcatapishmi yuyarina canchij. Chaita yuyarishpami pushaj huauquicuna nishcacunataca humildadhuan cazushun (Romanos 11:​33-36).

JEHOVÁ DIOSCA LLAQUICUNATACA ÑALLAMI TUCUCHINGA

8. ¿Jehová Dios ñalla llaquicunata tucuchinata yachashpaca ima shinataj sintirinchij?

⁸ Huaquin gentecunaca llaquicuna imamanta tiyashcata mana yachashcamantami Yayitu Dioshuan pꞌiñarincuna, mana cashpaca paipica mana crincunachu (Proverbios 19:3). Shinapish ñucanchijcunaca Jehová Dios llaquicunata mana cachashcatami intindishcanchij. Ashtahuanpish juchayuj cashcamantami chai llaquicunataca charinchij. Shinallataj Yayitu Jehová Dios ñalla tucui llaquicunata tucuchinatami yachashcanchij. Shinapish chaicamaca Jehová Diosca pacienciatami ricuchicun. Jehová pacienciata charishcamantami achca millón gentecunaca Yayitu Diosta rijsi tucushcacuna (2 Pedro 3:​9, 15). Caicunata alli intindishpami cushilla sintirinchij, Diospajmanpishmi ashtahuan cꞌuchuyanchij.

9. ¿Llaquicunata charishpaca imatataj yuyarina canchij?

⁹ Ñucanchijca ima llaquita charishpa o shuj cꞌuyashca familia huañujpica, “¿Jehová Diosca imamantataj llaquicunataca manaraj tucuchishca?” nishpachari tapurinchij (Habacuc 1:​2, 3). Chashna yuyai callarishpaca Yayitu Dios imamanta llaquicuna tiyachun saquishcatami yuyarina canchij (Salmo 34:19).a Tucui llaquicunata Yayitu Dios ñalla tucuchigrishcapipishmi yuyana canchij. Shinapish chaicamaca pacienciahuan shuyashpami catina canchij.

10. ¿Paipaj mamita huañujpica pani Anaca imatataj yuyarirca?

¹⁰ Llaquicunata ahuantangapajca Jehová Dios llaquicunata ñalla tucuchinatami yuyarina canchij. Mayotte nishca islamanta pani Anapi yuyashun. Paica: “Asha huatacuna huashamanca ñuca mamitami huañurca. Chaipica dimastij llaquillami sintirircani. Chashna sintirishpaca Yayitu Dios llaquicunata cachanapaj randi tucui llaquicunata tucuchinatami yuyarircani. Ñuca mamitatapish causachina cashcatami yuyarircani. Caicunata yuyarishpami llaqui, huacai canapaj randica cushilla sintirini” ninmi.

11. ¿Jehová Dios pacienciata charishcata yachashpaca imatataj rurashun ninchij?

¹¹ Jehová Diosca gentecunata cꞌuyashcamantami manaraj llaquicunata tucuchishpaca paita rijsichun oportunidadta tucuicunaman cucun. Chashnami paica pacienciata ricuchicun. ¿Chaita yachashpaca ñucanchijpish imatataj rurana canchij? Apóstol Pedroca: “¡Ima laya gentecuna cana cashcata yuyarichij! Cancunaca jucha illajmi cana canguichij. Diosta tucui shunguhuan adoracushcatapish ruraicunahuanmi ricuchina canguichij” nircami (2 Pedro 3:11). ‘Diosta adoracushcata ruraicunahuan ricuchingapajca’ gentecunamanmi huillana canchij. Cai millai mundo manaraj tucurijpirajmi ñucanchij causan ladopi gentecunata cꞌuyashcamanta Diosta rijsichun ayudashun ninchij. Paicunapish Paraíso Allpapi causachunmi munanchij (1 Corintios 3:9).

‘TUCURI PUNLLACUNAPIMI’ CAUSACUNCHIJ

12. ¿Bibliapi nishcacuna pajtaricushcata ricushpaca imatataj yachanchij?

¹² Bibliapica cai ‘tucuri punllacunapi’ gentecuna ashtahuan millaita rurashpa catina cashcatami nin (2 Timoteo 3:​1-5, 13-15). Tucui chaicuna pajtaricushcata ricushpami tucuri punllacunapi causacushcata crinchij. Diospaj Shimipi confiai tucushcatapishmi yachanchij.

13. ¿Tucuri punllacunapi causacushcamantaca ima tapuicunapitaj yuyarina canchij? (Lucas 12:​15-21).

¹³ Lucas 12:​15-21-pica Jesusca Yayitu Diosta sirvingapaj ñucanchij tiempota alli utilizana cashcatami yachachirca (Chai versocunata liyipai). Jesús nishca shinaca charij runaca ashtahuan charinacunallapimi ocuparirca. Diosta sirvingapajca tiempotaca mana surcurcachu. Chaimantami Jehová Diosca chai runataca: “Yuyai illaj, cunan tutallatajmari huañugringui” nirca. ¿Jesús nishcacunamantaca imatataj yachanchij? Ñucanchijpish tucuri punllacunapi causacushcamantami Diosta sirvingapaj tiempota surcuna canchij. Cashna tapuri: “¿Ñucapish, ñuca huahuacunapish Diosta ashtahuan sirvingapajchu esforzaricunchij? ¿Cullquillata mashcanapaj randica Diosta sirvina yuyaillachu causani?” Tucuri punllacunapi causacushcamantami cai tapuicunapi alli yuyarina canchij.

14. ¿Pani Miki rurashca shinallataj tucuri punllacunapi causacushcata yuyarishpaca ñucanchijpish imatataj rurana canchij?

¹⁴ Miki shuti panipi yuyashun. Paica: “Colegiota tucuchishca huashaca universidadpimi animalitocunamanta yachanata munarcani. Shinallataj precursora regular canata, shujtaj ladopi huillagrinatapishmi munarcani. Chaimi achca experienciata charij huauqui panicunaca ñucataca: ‘Tucuri punllacunapi causacushcatami yuyarina cangui. Universidadman rishpaca precursora cangapajca tiempotaca mana charinguichu. Paraíso Allpapica animalitocunamanta yachangapajca ashtahuan tiempotami charingui’ nishpami consejarcacuna. Paicuna consejashcata catishpami shuj trabajota japingapajca shuj cursota catircani. Chaimi precursora regular cangapaj tiempota charircani. Qꞌuipacarin Ecuador llajtapi huillanamanmi rircani” ninmi. Cunanca paipaj cusaca superintendente de circuitomi can. Ishquindijmi Ecuador llajtapi congregacioncunata visitashpa sirvicuncuna. Ñucanchijpish tucuri punllacunapi causacushcata yuyarishpami Diosta sirvinapi ashtahuan ocuparina canchij.

15. ¿Santiagopaj ejemplomantaca imatataj yachanchij? (Fotocunamantapish parlapai).

¹⁵ Jesuspaj lahuauqui Santiagopi yuyashun. Paica Jesús milagrocunata rurashcata, tucuicunamanta yalli alli yachachij cashcatapishmi ricurca. Chaicunata ricushpapish achca huatacunataca Jesuspi mana feta churarcachu. Jesús causarishca huashami Santiagoca paipi feta churarca. Diosta sirvingapajpishmi achcata esforzarirca (Juan 7:5; Gálatas 2:9).b Ñucanchij familiapish caicamaca Yayitu Diosmanta manachari yachasha nincuna. Shujtaj gentecunapish manachari ñucanchij huillashcata uyasha nincuna. Chashna cajpipish mana desanimarinachu canchij. Santiago shina paicunapish cambiai tucushcatami yuyarina canchij. Tucuri punllacunapi causacushcamanta mana shaicurishpa gentecunaman huillashpa catingapaj ashtahuan esforzarishunchij. Paicunaca jatun llaqui punllacuna callarishca huasha ñucanchij huillashcacunata yuyarishpa Diosta sirvinata agllangacunapishchari.c

JEHOVÁ YACHACHISHCACUNAMANTA AGRADICISHUNCHIJ

16. ¿Mana Testigocunaman ñucanchij yachachishca yachaicunaca ima shinataj ñucanchijtapish ayudan? (“Shujtajcunata ayudana yuyailla cashunchij” nishca recuadrota ricui).

¹⁶ Fin de semana tandanacuipi uyashca conferencia, jw.org-pi llujshishca videocuna, shujtaj yachaicuna, huaquin revistacunapish mana Testigo gentecunapajmi can. Shinapish chaicunamanta yachashpaca ñucanchijpishmi achcata yachai tucunchij. Jehová Diosta ashtahuan cꞌuyanata, ñucanchij feta sinchiyachinata, gentecunaman ima shina huillanatapishmi yachai tucunchij (Salmo 19:7).

17. ¿Bibliapi punta yachashcacunamantaca cai yachaipica imatataj yachashcanchij?

¹⁷ Achca huatacunata Diosta sirvishpaca mushuj yachaicunata yachashpami cushilla sintirinchij. Shinapish Bibliapi punta yachashcacunamanta yachashcamantapishmi achcata agradicinchij. Cai yachaipica chai callari yachaicunamantaca valishca yuyaicunatami yachashcanchij. Por ejemplo, Diospaj pueblo ucupi ima cambio tiyajpica humildadhuanmi chai cambiocunata cazuna canchij. Jehová Dios paipaj pueblota pushacushcata ñucanchijta yalli yachaj cashcata, tucui poderta charij cashcatapishmi yuyarina canchij. Shinallataj ima llaquita charishpaca pacienciatami ricuchina canchij. Jehová Dios llaquicuna tiyachun imamanta saquishcatapishmi yuyarina canchij. Tucuri punllacunapi causacushcata yachashcamantami cullquillata mashcanapaj randica Diosta sirvinapi ashtahuan ocuparina canchij. Chaimanta Diosta sirvishpa catingapajca Jehová yachachishcacunamanta yachashpa catishunchij.