Llaquicunata charishpapish cushillami causai tucushun

1. ¿Cushilla causangapajca imatataj rurana canchij?

¿CUSHILLA causangapajca imatataj rurana canchij? Imata mana charishcamanta pꞌiñarinapaj randica charishca cosascunamanta agradicishpami cushilla causana canchij. Shinallataj congregacionpi sirvingapaj huaquin mingashcacunata mana utca chasquishpapish Yayitu Diosta ashtahuan sirvingapaj esforzarishpami cushicuna canchij (Romanos 12:1; 1 Timoteo 3:1).

2. ¿Charishca cosascunallahuan mana contento cashcamantaca huaquincunaca imatataj rurashcacuna?

² Charishca cosascunallahuan mana cushicushpaca mana alli decisioncunatami agllai callarishun. Huaquincunaca ashtahuan cullquita charisha nishpami achca horascunata trabajai callarishcacuna. Chaimi achca llaquicunapi urmashcacuna. Huaquin huauqui panicunapish paicuna munashcata charisha nishcamantami hasta cullquita shuhuashcacuna. “Cullquita qꞌuipaman tigrachisha” nishpa shuhuashpapish Yayitu Diospaj ñaupajpica mana alli ricurincunachu (Proverbios 30:9). Cutin shujtajcunaca congregacionpi ima mingashcacunata mana chasquishcamantami Jehová Diosta sirvinata saquishcacuna (Gálatas 6:9).

3. Filipenses 4:​11, 12-pi nishca shinaca ¿llaquicunata charishca jahuapish imatataj yachana canchij?

³ Apóstol Pabloca carcelpi cashpapish: “Ima tiyajpipish, ima illajpipish cushilla canatami yachashcani” nircami (Filipenses 4:​11, 12-ta liyipai). Ñucanchijpish apóstol Pablo shinami ima llaquita charishpapish, ima jarcaicunata charishpapish cushilla causai tucunchij. Maipica cushilla canaca mana facilchu canga. Shinapish cushilla canatami yachai tucunchij. ¿Llaquicunata charishca jahuapish cushilla causangapajca imatataj rurana canchij?

AGRADECIDOSMI CANA CANCHIJ

4. ¿Cushilla causangapajca imamantataj agradecidos cana canchij? (1 Tesalonicenses 5:18).

⁴ Charishca cosascunamanta agradecidos cashpaca cushillami sintirishun (1 Tesalonicenses 5:​18-ta liyipai). Minishtirishca cosascunata charishcamanta agradecidos sintirishpaca mana charishca cosascunamantaca mana preocuparishunchu. Shinallataj Yayitu Jehová Dios mingashcacunata tucui shunguhuan pajtachishpaca mana mingashcacunamantaca mana preocuparishunchu. Chaimantami Bibliapica Jehová Dios cushca cosascunamanta, paita sirvichun saquishcamantapish agradicichun yachachin. Chashna shungumanta agradicishpaca imamanta preocuparinapaj randica tranquilosmi sintirishun (Filipenses 4:​6, 7).

5. ¿Israelitacunaca quejarinapaj randica imamantataj Jehová Diosta agradicina carcacuna? (Fotomantapish parlapai).

⁵ Israelitacunapi yuyashun. Israelitacuna Egipto llajtapi esclavocuna cajpica paicunataca yallitajmi llaquichircacuna. Chaimi Jehová Diosca paicunata quishpichirca. Puntapica israelitacunata quishpichingapajmi Egipto llajtamanca diez llaquicunata cacharca. Chai huashaca israelitacunaca cullquita, orota, ropatami egipciocunata quichushpa llujshircacuna (Éxodo 12:​35, 36). Qꞌuipaca egipciocuna israelitacunata llaquichingapaj Puca mama cuchacama catijpica Jehová Diosca Puca mama cuchata ishquipi chaupishpami israelitacunata quishpichirca. Chaquishca pambata ricushpaca israelitacunaca achca jarcaicunatachari charishcangacuna. Chashnapish Jehová Diosca paicunamanca maná nishca micunatami punllanta caraj carca. Jehová Dios chashna carajpipish israelitacunaca: ‘Egipto llajtapimi ashtahuan alli micunata charircanchij. Caipica ima micunata mana charinchijchu’ nishpami quejarircacuna (Números 11:​4-6). ¿Imamantataj chashna quejari callarircacuna? Paicunaca Yayitu Jehová Dios paicunata ima shina quishpichishcataca mana yuyarircacunachu. Minishtirishca cosascunata charishpapish chaicunahuanca mana cushilla, mana agradecidos carcacunachu.

6. ¿Agradecidos cangapajca imatataj rurana cangui?

⁶ ¿Agradecidos cangapajca imatataj rurana cangui? Puntapica, cushilla causangapaj Jehová Dios canman imallata cushcapi yuyari (Lamentaciones 3:​22, 23). Ishquipica, canta ayudajcunatami agradicina cangui. Jehová Diostacarin punllantami agradicina cangui (Salmo 75:1). Quimsapica, quejarij amigocunata charinapaj randica agradecidos caj amigocunatami charina cangui. Chashnami canpish paicuna shina cai tucungui (Deuteronomio 1:​26-28; 2 Timoteo 3:​1, 2, 5). Pagui nijcuna cashpaca ima cosascunata mana charishpapish, llaquicunahuan cashpapish ashtahuan cushillami causashun.

7. ¿Pani Aliciaca Yayitu Diosta agradicingapajca imallatataj yuyarirca?

⁷ Indonesia llajtamanta pani Aliciapi yuyashun. Paica: “COVID-19 millai ungüi ricurijpica ñucaca shujtajcunata yalli llaquicunata charishcatami yuyai callarircani. Chaimantami llaquilla sintiri callarircani” nircami (Gálatas 6:4). ¿Pani Aliciaca chashna yuyashpa ama catingapajca imatataj rurarca? Paica: “Jehová Dios cushilla causangapaj imallata ñucaman cushcatami punllanta yuyari callarircani. Diospaj pueblo ucupi cashcamantapish imalla bendicioncunata charishcatami yuyari callarircani. Chai tucuita yuyarishcamantami Yayitu Diostaca shungumanta pagui nircani. Chashna Yayitu Jehová Diosta agradicishcamantami dimastij cushilla sintirircani” ninmi. Canpish llaquicunata charishcamanta llaquilla sintiri callarishpaca pani Alicia shinami rurai tucungui.

HUMILDESMI CANA CANCHIJ

8. ¿Barucca imatataj mashcai callarirca?

⁸ Barucca profeta Jeremiaspaj secretariomi carca. Paica israelitacuna Jehová Diosta mana cazushcamanta paicunahuan ima tucunatami huillana carca. Shinapish Barucca Jehová Dios mingashcata pajtachina yuyailla canata saquishpami jatun tucunata mashcacurca. Chaimantami Jehová Diosca Barucmanca: ‘Canca cambajmi jatun cosascunata mashcashpa puricungui. Chai cosascunata mashcanata saqui’ nichun Jeremiasta cacharca (Jeremías 45:​3-5). Chaita nishpaca Jehová Diosca jatun tucunata yuyanapaj randica paita sirvina yuyailla causachunmi consejarca. Chai consejota catishpami Barucca Jehová Diospaj alli amigo cashcamanta cushilla causarca.

9. 1 Corintios 4:​6, 7-pi nishca shinaca ¿imatataj yuyarina canchij? (Fotocunamantapish parlapai).

⁹ Shuj huauquica allita ruraj, experienciata charij, alli trabajadorchari canga. Chaimantachari paica ashtahuan valishca ruraicunata mingachun munanga. Shinapish shujtaj huauquiman pai munashcata pajtachichun mingajpica llaquillachari sintiringa. ¿Ama chashna sintiringapajca imatataj yuyarina can? 1 Corintios 4:​6, 7-pi apóstol Pablo ima nishcatami yuyarina can. (1 Corintios 4:​6, 7-ta liyipai). Chaipica Jehová Dios ñucanchijta cꞌuyashcamanta valishca ruraicunata pajtachichun mingashcata, alli pajtachichunpish ayudashcatami yachachin. Chaita yuyarishpami shujtajcunata yalli cashcataca mana yuyana canchij (Romanos 12:​3, 6; Efesios 2:​8, 9).

10. ¿Humildes cangapajca pipaj ejemplomantataj yachana canchij?

¹⁰ Humilde cangapajca Jesuspaj ejemplomantami yachana canchij. Apóstol Juanca: ‘Chaimi Jesusca paipaj Yaya tucuita paipaj maquipi churashcata yachashcamanta, shinallataj Diosmanta pai shamushcata, Diospajman ñalla tigranatapish yachashcamanta paita catijcunapaj chaquicunata maillai callarirca’ nircami (Juan 13:​3-5). Jesusca Diospaj Churi cashpapish paipaj discipulocuna paipaj chaquicunata maillachunca mana shuyarcachu. Shinallataj shuj sumaj huasita, achca cullquita, alli causaita charinatapish mana mashcarcachu (Lucas 9:58). Chaipaj randica Jesusca humilde cashcamantami charishcacunallahuan cushilla causarca. Ñucanchijpish cushilla causangapajca Jesús shinami humildes cana canchij (Juan 13:15).

11. ¿Dennisca humilde cangapajca imatataj rurashca?

¹¹ Países Bajosmanta Dennis shuti huauquipi yuyashun. Paica Jesús shina humilde cangapajmi esforzarin. Dennisca: “Maipica shujtajcunata yalli canatami munani. Shujtaj huauquicunaman valishca ruraicunata pajtachichun mingajpicarin maipica llaquillami sintirini. Chashna sintirishpaca JW Library^® aplicacionpimi humildadmanta yachachij huaquichishca versocunata cutin cutin liyini. Humildadmanta yachachij huaquin conferenciacunatapishmi cutin cutin ricuni.a Chaicunata ricushpami ñucallataj jatunyarinapaj randica Yayitu Jehová Diosta jatunyachina cashcata yachani. Paica ñucanchijta cꞌuyashcamantami chꞌican chꞌican ruraicunata pajtachichun mingan. Shinapish paillatajmi tucui alli llujshichunca ayudan” nircami. Canpish congregacionpi can munashcata rurachun imata mana mingajpipish humilde cangapajmi esforzarina cangui. Chashnami Jehová Dioshuan ashtahuan alli apanacui tucungui, cushillapishmi causangui (Santiago 4:​6, 8).

JEHOVÁ DIOS CUSHA NISHCAPIMI YUYANA CANCHIJ

12. ¿Cushilla causangapajca Dios ima cusha nishcacunapitaj yuyana canchij? (Isaías 65:​21-25).

¹² Cunan punllacunapica achca llaquicunatami charinchij. Shinapish profeta Isaías quillcashca shinaca Yayitu Jehová Diosca sumaj causaitami ñucanchijman cunga (Isaías 65:​21-25-ta liyipai). Yayitu Dios sumaj causaita cushcamantami shuj sumaj huasipi causashun, shuj alli trabajotapishmi charishun. Alli micunatapish charishcamantami alli saludta charishun. Ñucanchijtapish, ñucanchij huahuacunatapish ima llaquicuna ñapish japinataca ña mana manchashunchu (Isaías 32:​17, 18; Ezequiel 34:25). Jehová Dios cusha nishca sumaj causaica pajtaringatajmi chaicunata yuyarishpami llaquicunata charishca jahuapish cushilla causashun.

13. ¿Cai “tucuri punllacunapica” imamantataj Dios cusha nishcacunapica ashtahuan yuyarina canchij?

¹³ ‘Tucuri punllacunapi’ causacushcamantami tucuicuna ‘sinchi llaquicunata’ charinchij (2 Timoteo 3:1). Llaquicunata ahuantachunmi Yayitu Jehová Diosca consejota cushpa, fuerzata cushpa ayudan (Salmo 145:14). Ashtahuancarin pai cusha nishcacunata yuyachishpami ahuantashpa catichun ayudan. Por ejemplo, canca manchanaita trabajashpapish cambaj familiata mantiningapajca ashalla cullquitachari charingui. Shinapish ¿Jehová Diosca Paraíso Allpapica imallatataj cusha nin? Jehová Diosca sumaj causaita, can minishtishca yallitapishmi cusha nin (Salmo 9:18; 72:​12-14). Mana cashpaca depresión nishca ungüita, ancha ungüitachari charingui. Cambaj cꞌuyashca familiapishchari huañushcanga. Chashnapish ¿Yayitu Diosca Paraíso Allpapica imatataj rurasha nin? Paica tucui laya ungüita, huañuitapishmi chingachinga, huañushcacunatapishmi causachinga (Apocalipsis 21:​3, 4). Chaimantami ima llaquicunata charishpapish Dios cusha nishcacunapi yuyarina canchij. Cunan tiyashca llaquicunaca ashacamallami canga. Dios cusha nishcacunaca huiñaipajmi canga. Chaicunata yuyarishpami llaquicunataca mana pꞌiñarishpa, mana yallitaj llaquirishpa ahuantashun (2 Corintios 4:​17, 18).

14. ¿Dios cusha nishcacunata carupi cashcata shina ama ricungapajca imatataj rurana canchij?

¹⁴ Sinchi llaquicunata charishcamantami Dios cusha nishcacunataca carupi cashcata shina maipica ricunchij. Shinapish ¿ama chashna ricungapajca imatataj rurana canchij? Caipi yuyai. Maijancunaca carupi cajcunata alli ricungapajca lentestami minishtincuna. Chai shinallatajmi Dios cusha nishcacunata chasquina yuyailla causangapajca cutin cutin chaicunapi yuyana canchij. Chashnami Yayitu Dios cusha nishcacunataca cꞌuchullapi cashcata shina ricushun. Por ejemplo, ¿canca ashalla cullquita charishpapish imapitaj yuyarina cangui? Paraíso Allpapi pobre canapaj randica alli causaita charinapimi yuyana cangui. Cutin ¿congregacionpi can munashca mingashcacunata manaraj chasquishpaca imapitaj yuyana cangui? Chaicunata chasquina yuyailla canapaj randica Paraíso Allpapi jucha illaj tucushpa huiñai huiñaita causanapimi yuyana cangui (1 Timoteo 6:19). Dios cusha nishcacunapi cutin cutin yuyarishpaca chaicunata chasquina yuyaillami causashun.

15. ¿Pani Cristinamantaca imatataj yachanchij?

¹⁵ Párrafo 11-pi parlashca huauqui Dennispaj huarmi Cristinamanta yachashun. Paica: “Ancha ungushca cashcamantami punllanta fuerza illaj sintirini. Silla de ruedaspipishmi purina cani. Achca nanaita charishcamantapishmi casi tucui punlla camallapi pasani. Ñuca doctorcarin: ‘Canca mana alli tucunguichu’ nishpami huillarca. Shinapish chai doctorca Yayitu Dios cusha nishcacunata mana yachashcamantami chashna nirca. Ñucaca Dios cusha nishcacunata chasquina yuyaillami causani. Paraíso Allpapi ungüicuna illaj causanata yachashpami tranquila, cushilla sintirini” ninmi.

‘DIOSTA MANCHAJCUNACA IMA ILLAJPISH MANA PURINGACUNACHU’

16. ¿Ñucanchijpish David shina llaquicunata charishpapish imamantataj cushilla causai tucunchij?

¹⁶ Rey Davidca paipaj quimsa churicunatami huañuipi chingachirca. Maijancunapish yangamantami Davidta juchachircacuna. Paipaj huaquin amigocunapishmi saquishpa rirca. Mandaj Saulpish achca huatacunatami paita huañuchisha nishpa catirca. Chai llaquicunata charishpapish Davidca: ‘Diosta manchajcunaca ima illajpish mana puringacunachu’ nircami (Salmo 34:​9, 10). Ñucanchijpish David shinami achca llaquicunata charinchij. Shinapish Jehová Diosca llaquicunata ahuantashpa paita sirvishpa catichunmi ayudan. Chaimantami ñucanchijpish cushilla causai tucunchij (Salmo 145:16).

17. ¿Cushilla causangapajca imatataj rurana cangui?

¹⁷ Jehová Diosca can cushilla causachunmi munan (Salmo 131:​1, 2). Chaimantami agradecido cangapaj, humilde cangapaj, Yayitu Dios cusha nishcacuna yuyailla cangapajpish esforzarina cangui. Chashnami llaquicunata charishpapish cushilla causangui (Salmo 16:​5, 6).