Diosmanta yachasha nijcunata utca ayudashunchij

1. ¿Achca gentecunaca Diospaj gobiernomanta uyashpaca imallatataj rurancuna? (Hechos 13:​47, 48; 16:​14, 15).

PUNTA siglopi causaj achca gentecunaca Diospaj gobiernomanta huillaita uyashpami cushicuihuan chasquircacuna. Chaimi bautizarircacuna (Hechos 13:​47, 48; 16:​14, 15-ta liyipai). Cunan punllacunapipish maijancunaca Diospaj gobiernomanta huillaita uyashpaca cushicuihuanmi chasquincuna. Chaimi Diosta sirvinata decidincuna. Cutin shujtajcunaca callaripica Diospaj gobiernomanta huillashcacunataca mana uyasha nincunachu. Shinapish qꞌuipaca Diospaj gobiernomanta asha asha yachai callarishpami Diosta sirvinata decidingacuna. ¿Diosmanta yachasha nij alli shungu gentecunata ayudangapajca imatataj rurana canchij?

2. ¿Shuj tarpuj runa rato cosechanaman rij shinaca ñucanchijpish huillacushpaca imatataj rurana canchij?

² Caipi yuyashun. Shuj tarpuj runaca tarpucushpa, jallmacushpaca, shujtaj yurapi grano pꞌucushcatami ricun. Chaimi chaita pallanaman rato rin. Chashnallatajmi predicacushpaca pi Bibliamanta yachana munaita charijta tarinchij. Chaimi paitaca Diosta sirvichunca tucui pudishcata rurashpa rato ayudana canchij. Shinallataj Bibliamanta manaraj yachasha nij gentecunatapishmi asha asha ayudashpa catina canchij (Juan 4:​35, 36). Chaimantami huillacushpaca maijan gentecuna Bibliamanta yachasha nishcata o mana yachasha nishcata cuentata cuna canchij. Bibliamanta yachasha nijhuan punta cutin parlanacushpa paita ima shina rato ayudana cashcatami cai yachaipica yachashun.

BIBLIAMANTA YACHASHA NIJTA AYUDASHUNCHIJ

3. ¿Bibliamanta yachasha nijta utca ayudangapajca imatataj rurana canchij? (1 Corintios 9:26)

³ Huillacushpaca Bibliamanta yachasha nijhuanchari parlai callarinchij. ¿Paita utca ayudangapajca imatataj rurana canchij? Callarimantami ñucanchijca Bibliamanta yachai callarichun, tandanacuicunamanpish richun invitana canchij. Chashnami paitaca Yayitu Diospaj alli amigo tucuchun ayudashun (1 Corintios 9:​26-ta liyipai).

4. ¿Canadamanta shuj soltera huarmimantaca imatataj yachai tucunchij?

⁴ Bibliamanta yachai callarichun invitashunchij. Bibliamanta yachasha nij gentecunaca maipica callarimantami Bibliata estudianata decidincuna. Canadá llajtapi shuj soltera ima shina Bibliata estudiai callarishcata ricushun. Jueves punllapimi shuj panica carritohuan huillacurca. Chaimi cai solteraca carritoman cꞌuchuyashpaca Cushilla causai nishca folletota japirca. Chaita ricushpami chai panica: “Cai folletohuanmi Bibliamanta gratis yachai tucungui” nirca. Chai solteraca yachanata munashcamantami paipaj número de celularta curca. Chai punllallatajmi shuj mensajeta cachashpaca ima hora Bibliamanta yachai callarina cashcata tapurca. Chaimi panica: “Fin de semanata yachai callaringapaj” nishpa cutichirca. Shinapish chai solteraca: “Ñucaca caya viernestami tiempota charini. ¿Manachu cayallataj Bibliamanta yachai callari tucushun?” nishpami cutichirca. Chashna nijpimi panica viernes punllallatataj Bibliamanta yachachi callarirca. Fin de semanapicarin chai solteraca punta cutinmi tandanacuiman rirca. Chashnami paica Yayitu Diospajman rato cꞌuchuyai callarirca.

5. ¿Bibliamanta yachana munaita charichunca imatataj rurana canchij? (Fotocunamantapish parlai).

⁵ Shinapish huaquincunaca callarimantaca mana Bibliamanta yachasha nincunachu. Man rato yachasha nijpipish paicunamantaca ima mana allicunataca mana yuyanachu canchij. Chaipaj randica, paicunaman cꞌuyaita ricuchishpami paicuna munashcacunamanta parlana canchij. Chashna cꞌuyaita ricuchijpica paicunaca asha asha Bibliamanta yachana munaitachari charingacuna. ¿Paicuna Bibliamanta yachai callarichunca imatataj nina canchij? Alli yachachij huauqui panicuna imata nishcata ricushun.

6. ¿Huasiyujhuan cutin tigra parlashpa catingapajca imatataj rurana canchij?

⁶ Alli yachachij huauqui panicunaca: “Bibliamanta yachanata o estudianata munanguichu ninapaj randica. Bibliapica alli consejocunami tiyan. Diosmantapishmi ashtahuan yachai tucungui” nishpa tapunami ñucanchijtaca ayudashca nincunami. Shinallataj huasiyujhuan cutin tigra parlanacungapajca huaquin tapuicunatami rurana canchij. Por ejemplo: “Canca chꞌican chꞌican tapuicunatachari rurarishcangui. Shinapish chai tapuicunapaj respuestataca Bibliapimi tari tucungui. O Bibliapica mana religionllamantachu parlan. Ashtahuanpish Bibliapica ñucanchij causaipaj valishca consejocunatami taringui. Shinallataj ñucanchij causaipi ayudaj, valishca yuyaicunataca 10 o 15 minutocunallapimi yachangui” ninami canchij. Ashtahuancarin mana obligacuj shinachu, “cantaca tucui semanami Bibliamanta yachachinaman shamusha” nina canchij.

7. ¿Punta cutin tandanacuiman rishpaca imatataj cuentata curcacuna? (1 Corintios 14:​23-25)

⁷ Tandanacuiman invitashunchij. Apóstol Pablo causashpa punllacunapica achca gentecunami punta cutin tandanacuicunaman rirca. Chai tandanacuiman rishpami paicuna Diosta alli sirvijcuna cashcata cuentata curcacuna (1 Corintios 14:​23-25-ta liyipai). Cunan punllacunapipish achca gentecunami ñucanchij tandanacuicunaman shamucuncuna. Chaimi rato Diosta sirvinata decidincuna. Chaimantami callarimanta ñucanchij tandanacuicunaman invitanaca valishca can. Tandanacuiman invitashpaca fin de semanapi tiyaj conferenciapaj tematami huillana cangui. Mana cashpaca Huillaj revistamanta shuj valishca yuyaita yachagrishcatami huillana cangui. Shinapish Cushilla causai nishca libropaj yachai 10-pica yachacujta tandanacuiman invitachunmi animan. Pero chai yachaiman chayangacamaca mana shuyanachu canchij.

8. ¿Yachacujta ñucanchij tandanacuiman invitashpaca imallatataj alli yachachina canchij? (Isaías 54:13).

⁸ Shuj yachacujca punta cutinmi fin de semana tandanacuiman rirca. Chaimi yachacujca: “¿Huillaj revistata pushaj huauquica tucuicunapaj shutitachu yachan?” nishpa yachachijta tapurca. Chashna nijpimi paita yachachij panica: “Cai tandanacuipi cajcunaca tucuicunami shuj familia shina canchij. Chaimantami tucuicunapaj shuticunata yachanchij” nirca. Chaita uyashpami yachacujca: “Ñuca iglesiapica casi ni pi shuticunataca mana yachanchu” nirca. Tandanacuiman punta cutin shamujcunaca ñucanchij tandanacuicuna ima shina cashcata, chaipi imata ruraj cashcataca mana yachancunachu (Isaías 54:​13-ta liyipai). Chaimantami ñucanchijca shujtaj religioncuna shinaca ñucanchij tandanacuicunapica mana política jahua parlanacunchij. Mana caparirinacushpa rimanacunchijchu. Politicapipish mana chagrurinchijchu nishpami yachachina canchij. Shinallataj ñucanchijcunaca costumbrecunamanta parlanacungapajca mana tandanacunchijchu. Ashtahuanpish Jehová Diosmanta ashtahuan yachangapaj, Jehová Diosta adorangapaj, caishujmanta chaishujmanta animanacungapajpishmi tandanacunchij (Hebreos 2:12; 10:​24, 25; 1 Corintios 14:40). Ñucanchij Tandanacuna Huasicunapish Diosmanta yachangapaj cashcamantami alaja, tucui achijlla can. Chaimantami yachacuj alli intindichunca ¿Ñucanchij tandanacuipica imatataj ruranchij? nishca videota ricuchina canchij.

9, 10. ¿Pi ñucanchij tandanacuiman shamunata manchajpica imatataj alli yachachina canchij? (Fotomantapish parlapai).

⁹ Huaquin gentecunaca ñucanchij tandanacuicunamanca mana shamusha nincunachu. Paicuna tandanacuiman shamujpica Testigo cachun obliganatami manchancuna. Chaimantami paimanca: “Ñucanchij tandanacuicunapica tucuicunatami cushicushpa chasquinchij. Testigocuna tucuchunpish pita mana obliganchijchu. Cambaj tucui familiahuan shamunallami cangui. Cambaj uchilla huahuacunahuanpish tandallami yachai tucungui” nishpami yachachina canchij (Deuteronomio 31:12). Shinallataj ñucanchij yachachishcamantaca ima cullquita mana mañanchijchu. Ashtahuanpish Jesús nishcatami pajtachinchij. Paica: “Cancunaca gratismi chasquircanguichij. Shujtajcunamanpish gratis cuichij” nircami (Mateo 10:8). Ñucanchij tandanacuicunaman shamungapajpish achca cullqui valij ropacunata churarinaca mana minishtirinchu. Jehová Diosca ñucanchij ima shina churarishcataca mana ricunchu. Ashtahuanpish ñucanchij shungupi ima tiyajtami ricun (1 Samuel 16:7).

¹⁰ Pi tandanacuicunaman shamujpica ancianocunata, huauqui panicunatami rijsichina canchij. Tandanacuipi yachachij huauquimanta yachachicushcatapish intindichunmi ayudana canchij. Bibliapaj versocunatapish mashcashpami ayudana canchij. Chashna cꞌuyaihuan ayudajpimi yachacujcunaca cushilla sintiringacuna. Shujtaj punllacunapish cutin tigranatami munangacuna.

BIBLIAMANTA YACHACUJTA AYUDASHUNCHIJ

11. ¿Gentecuna ocupados pasashcata yachashpaca imatataj rurana canchij?

¹¹ ¿Bibliamanta piman ña yachachi callarishpaca imatataj rurana canchij? Bibliamanta yachachi callarishpaca ima horas yachagrishcatami alli huillana canchij. Gentecuna qꞌuipayanata yachajpipish ñucanchij nishca horaspi ringapajmi esforzarina canchij. Gentecunaca ocupadosmi pasancuna. Chaimantami ashalla shimicunahuan, ashalla minutocunapi yachachingapaj esforzarina canchij. Shinallataj paicuna imalla yuyashcata parlachunmi saquina canchij (Proverbios 10:19).

12. ¿Apóstol Pablo shina shujtajcunata ayudangapajca imallatataj rurana canchij?

¹² Apóstol Pabloca shuj alli ejemplotami saquirca. Paica gentecunamanca Jesusmantami yachachirca. Chashnami gentecuna Jehová Diosta rijsishpa paipajman cꞌuchuyachun ayudarca (1 Corintios 2:​1, 2). Ñucanchijpish Bibliamanta yachacujtaca mana ñucanchij yuyaicunallamantachu yachachina canchij. Ashtahuanpish paicunamanca Bibliahuanmi yachachina canchij. Chashnami paicunaca Jehová Diostapish, Jesustapish alli rijsishpa cꞌuyanata yachangacuna (Hechos 10:​25, 26). Apóstol Pabloca huauqui panicunatapish Mandaj Diosta manchachun, alli yachaita, alli yuyaita, fetapish charichunmi yachachirca (Salmo 19:​9, 10; Proverbios 3:​13-15; 1 Pedro 1:7). Chaicunaca orotapish, cullquitapish, sumaj rumicunatapish yalli valishca cashcatami nirca (1 Corintios 3:​11-15). Ñucanchijpish apóstol Pablo shinami ñucanchij yachacujcunataca sinchi feta charichun, Jehová Dioshuan alli apanacuchun ayudana canchij (2 Corintios 1:24).

13. ¿Yachacujcunata pacienciahuan ayudangapajca imatataj rurana canchij? (2 Corintios 10:​4, 5) (Fotomantapish parlapai).

¹³ Ñucanchijpish Jesús shinami ñucanchij yachacujcunamanca pacienciata ricuchina canchij. Ñucanchij yachacujcuna imata mana alli intindishcatachari cuentata cunchij. Chaita cuentata cushpaca ama malpi saquichingapajmi tapuicunata rurashpaca mana catina canchij. Ashtahuanpish qꞌuipaca chaicunata alli intindichingapajca estudiohuanmi catinalla canchij. Shinallataj yachacujcunapajca paicunapaj ñaupa crishcacunata saquinaca sinchichari canga. Shinapish ñucanchij yachachishcacunata crichun obliganapaj randica, paillataj cuentata cuchunmi suficiente tiempota cuna canchij (Juan 16:12; Colosenses 2:​6, 7). Yachacujpaj crishcacunaca paipaj shungupica shuj alli pirca shinami can. Chaimantami puntapica shuj mushuj ashtahuan sinchi pircata shayachicuj shina Jehová Diospi tucui shunguhuan confiachun ayudana canchij. Chashnami ñaupa pircata urmachij shina paipaj ñaupa crishcacunata saquinaca ashtahuan jahualla canga (Salmos 91:9; 2 Corintios 10:​4, 5-ta liyipai).

TANDANACUIMAN SHAMUJCUNATA AYUDASHUNCHIJ

14. ¿Jehová Diosca tandanacuicunaman shamujcunataca ima shina tratachuntaj munan?

¹⁴ Ñucanchij tandanacuicunaman shamujcuna maimanta cajpipish, pobrella o cullquiyuj cajpipish, ima costumbrecunata charijpipish Jehová Diosca paicunataca cꞌuyaihuan tratachunmi munan (Santiago 2:​1-4, 9). Cunanca paicunaman cꞌuyaita ricuchingapaj imata rurana cashcatami ricushun.

15, 16. ¿Punta cutin ñucanchij tandanacuiman shamujcunamanca ima shinataj cꞌuyaitapish, respetotapish ricuchina canchij?

¹⁵ Maijancunaca ñucanchij tandanacuicuna ima shina cashcata ricusha nishcamanta o maijan paita invitashcamantami ñucanchij tandanacuicunaman shamuncuna. Chaimantami ñucanchij tandanacuiman maijan punta cutin shamucujta ricushpaca cꞌuyaihuan chasquina canchij. Cushicushpa paita saludanaman rishpapish mana yallitaj exageranachu canchij. Qꞌuipaca ñucanchijhuan tiyarichunmi invitai tucunchij. Shinallataj tandanacuipi yachachunmi shuj Bibliata, publicacioncunatapish paiman cui tucunchij. Mana cashpaca ñucanchij Bibliata, ñucanchij publicacioncunatapishmi ricuchi tucunchij. Pai cushilla sintirichunpishmi tucui pudishcata rurana canchij. Shuj runamanta yachashun. Paica punta cutin ñucanchij tandanacuiman rishpaca shujtajcuna shina mana churarishca cashcamantami asha pingaihuan carca. Chashna pingaihuan cajta ricushpami shuj huauquica paitaca: “Ama preocuparichun ñucanchijpish can layallatajmi churarinchij” nirca. Tiempohuanca chai runaca bautizarircami. Chai huauqui ima shina paita ayudashcatapish siempre yuyarirca. Ñucanchijpish ñucanchij tandanacuicunaman punta cutin shamujcunata ayudangapajmi esforzarina canchij. Shinapish paicunapaj causaipica mana satirinachu canchij (1 Pedro 4:15).

¹⁶ ¿Mana testigocuna ñucanchij tandanacuicunapi alli sintirichunca imatataj rurana canchij? Ñucanchij nishcacunahuanmi paicunamanca respetota ricuchina canchij. Chaimantami tandanacuicunapi parlanacushpa, yachachicushpa, comentacushpaca mana testigocunamanta, paicunapaj crishcacunamantapish mana burlarina canchij (2 Corintios 6:3; Tito 2:8; 3:2). Conferenciata cuj huauquicunapish mana testigocunamanmi respetota ricuchina can. Chaimi conferenciata yachachicushpaca mana testigocunapaj crishcacunamanta mana burlarina can. Paicuna mana rijsishca shimicunatapishmi alli intindichina can. Chashnami mana testigocunaca ñucanchij tandanacuicunaman cutin tigranata munangacuna.

17. ¿Alli shungu gentecunata ayudangapajca imatataj rato rurana canchij?

¹⁷ Cai tucuri punllacunapi causacushcamantami alli shungu gentecunata taringapajca huillanata punta lugarpi churana canchij (Hechos 13:48). Paicunata tarishpaca Bibliamanta yachai callarichun, tandanacuicunamanpish richunmi rato invitana canchij. Chashnami paicunataca huiñai causaita charichun ayudashun (Mateo 7:14).