Shujtajcunamanta mañanata amataj cungarishunchij

1. ¿Jehová Diosca ñucanchij mañashcacunata uyachunca imamantataj piman mana mingashca?

JEHOVÁ DIOSCA angelcunamanca chꞌican chꞌican ruraicunata pajtachichunmi mingashca. Paipaj churi Jesusmancarin valishca ruraicunata pajtachichunmi mingashca (Salmo 91:11; Mateo 28:18). Shinapish ñucanchij mañashcacunata uyachunca piman mana mingashcachu. ¿Imamanta? Jehová Diosca paillatajmi ñucanchij mañashcacunata uyasha nin (Salmo 65:2). Chaimantami Diosta mañanaca ñucanchijpajca shuj valishca regalo can.

2. ¿Apóstol Pablopaj ejemplomantaca imatataj yachai tucunchij?

² Llaquicunata charishpaca Jehová Dios ñucanchijta ayudachunmi mañai tucunchij. Shinapish shujtajcunamanta mañanataca manataj cungarinachu canchij. Apóstol Pablopi yuyashunchij. Paica Efesopi caj huauqui panicunataca: “Cancunamantami Diosta pagui nicunilla” nircami (Efesios 1:16). Huauqui panicunapaj shutita nishpapishmi Diosta mañaj carca. Pabloca Timoteomanca: “Diostami pagui nini. Tutapish, punllapish Diosta rogarishpa mañacushpaca cantaca siempremi yuyarini” nircami (2 Timoteo 1:3). Apóstol Pabloca achca llaquicunata charishpapish shujtajcunamanta Yayitu Diosta mañangapajmi tiempota surcurca (2 Corintios 11:23; 12:​7, 8).

3. ¿Shujtajcunamanta Diosta mañanataca imamantataj huaquinpica cungarichij?

³ ¿Shujtajcunamanta Diosta mañanataca imamantataj huaquinpica cungarinchij? Sabrinaa shuti shuj panica: “Tucuicunami chꞌican chꞌican ruraicunata pajtachina canchij. Llaquicunatapishmi charinchij. Chaimi ñucanchijllamanta Diosta mañanchij” ninmi. Chaimantami cai yachaipica: “¿Shujtajcunamanta Diosta mañanaca imamantataj valishca can? ¿Shujtajcunamantaca ima shinataj mañai tucunchij?” nishca tapuicunamanta yachashun.

SHUJTAJCUNAMANTA MAÑANACA VALISHCAMI CAN

4, 5. ¿Shujtajcunamanta Diosta mañashpaca ima shinataj paicunata ayudai tucunchij? (Santiago 5:16)

⁴ “Cashcata ruraj runapaj mañaica poderta charinmi. Gentecunatapish ayudai tucunmi” (Santiago 5:​16-ta liyipai). ¿Shujtajcunamanta Diosta mañashpaca ima shinataj paicunata ayudai tucunchij? Jesuspi yuyashun. Paipaj amigo Pedroca Jesusta mana rijsishcatami nigrirca. Chaita yachashpami Jesusca Pedrotaca: “Cambaj crishca ama chiriyachunmi ñucaca Diosta rogarishpa mañashcani” nirca (Lucas 22:32). Apóstol Pablopish shujtajcunamanta Diosta mañana valishca cashcatami yacharca. Paitaca imata mana rurashca cajpipish Roma llajtapi shuj alquilashca huasipimi huichcashpa churarcacuna. Chaimantami paica Filemonmanca: “Cancuna Diosta mañashcamanta, cancunapajman tigrashapishchari” nishpa quillcarca (Filemón 22) Huauqui panicuna Pablomanta Diosta mañashcamantami asha tiempo qꞌuipalla soldadocunaca paita cacharircacuna. Qꞌuipacarin Diosmantami huillashpa cati tucurca.

⁵ Yayitu Diosta imata mañashpapish ñucanchij mañashca shina cutichichunca mana obligai tucunchijchu. Shinapish paica ñucanchij mañashcacunata uyashpa imamanta preocuparishca cashcata intindishpami maipica ñucanchij mañashcallatataj cutichinga. Chaimantami tucui shunguhuan ñucanchij llaquicunamanta, shujtajcunamantapish Yayitu Diosta mañanalla canchij. Yayitu Dios ñucanchij mañashcacunata cutichishpa, ñucanchijta ayudana cashcapi confiana canchij (Salmo 37:5; 2 Corintios 1:​11-ta ricui).

6. ¿Shujtajcunamanta Diosta mañashpaca imata ruranatataj munashun? (1 Pedro 3:8).

⁶ Shujtajcunamanta mañashpaca paicunata ayudana munaitami charishun (1 Pedro 3:​8-ta liyipai). Michael shuti shuj ancianoca: “Huauqui panicunamanta Diosta mañashpaca paicuna charishca llaquicunatami yuyarini. Diosta sirvingapaj paicuna achcata esforzaricushcata cuentata cushpami paicunataca ashtahuan cꞌuyani. Paicunapaj ashtahuan alli amigopishmi tucuni” ninmi. Richard shuti shujtaj ancianopish: “Maipica Yayitu Diostami shuj huauquita o shuj panita ayudachun mañanchij. Chaipica: ꞌ¿Yayitu Diosca ima shinashi cutichinga?ꞌ nishpa chari tapurichij. Chashna tapurishpapish ñucanchijllatajmi paita ayudashun ninchij. Chaimi Jehová Diosca ñucanchijllatataj chai huauquita ayudachun utilizan” ninmi (Marcos 1:​40, 41).

7. ¿Shujtajcunamanta Diosta mañashpaca imatataj yuyarishun? (Filipenses 2:​3, 4) (Fotocunamantapish parlapai).

⁷ Ñucanchij huauqui panicunamanta Diosta mañashpaca paicunapish ñucanchij charishca llaquicunallatataj apacushcatami yuyarinchij (Filipenses 2:​3, 4-ta liyipai; 1 Pedro 5:9). Millai Diablo cai mundota mandacushcamantami tucuicuna llaquicunata charinchij (1 Juan 5:19; Apocalipsis 12:12). Katherine shuti shuj precursoraca: “Ñucaca llaquicunata charishcamantami maipica achcata llaquirini. Shinapish huauqui panicunamanta Diosta mañashpaca, ñucallapi yuyanatami saquini” ninmi.

¿PICUNALLAMANTATAJ DIOSTA MAÑANA CANCHIJ?

8. ¿Picunallamantataj Diosta mañana canchij?

⁸ Chꞌican chꞌican huauqui panicunamantami Diosta mañana canchij. Huaquin huauqui panicunaca ungushcami cancuna. Escuelapipish, colegiopipish Diosta sirvij jovencunamantami burlarincuna. Mana allita rurachunpishmi paicunataca obligasha nincuna. Shujtaj huauqui panicunaca mayoryacuncunami. Cutin shujtaj huauqui panicunaca paicunapaj familia ucullapitajmi jarcaicunata charincuna. Mana cashpaca gobiernocunami paicunata catirashpa llaquichincuna (Mateo 10:​18, 36; Hechos 12:5). Huaquin huauqui panicunapish paicunapaj llajtapi macanacuicuna, caparinacuicuna tiyashcamantami paicunapaj huasita saquishpa miticushpa rishcacuna. Shujtaj huauqui panicunapish terremotocunamanta, yacucuna mirarishcamanta, yallitaj usia punllacuna tiyashcamanta, urcucuna rupashcamantami achca llaquicunata charincuna. Cai huauqui panicunatami mana rijsishpapish, paicunamantami Yayitu Diosta mañana canchij. Chashnami Jesús nishca shinaca: “Caishujmanta chaishujmanta cꞌuyanacushcata ricuchishun” (Juan 13:34).

9. ¿Pushaj huauquicunamanta, paicunapaj huarmicunamantapish imamantataj Yayitu Diosta mañana canchij?

⁹ Pushaj huauquicunamantapishmi Yayitu Diosta mañana canchij. Cuerpo Gobernantepi sirvij huauquicunapish, paicunata ayudaj huauquicunapish, comite de sucursalpi sirvij huauquicunapish, sucursalcunapaj departamentocunata pushaj huauquicunapish, superintendente de circuito huauquicunapish, congregacionta pushaj ancianocunapish, siervo ministerial huauquicunapish ñucanchijta cuidangapajmi achca ruraicunata pajtachina cancuna. Shinapish paicunaca chꞌican chꞌican llaquicunatami charincuna (2 Corintios 12:15). Mark shuti superintendente de circuito huauquica: “Ñuca yaya mamaca mayorllacuna, ungushcacunami can. Paicunataca ñuca panipish, paipaj cusapishmi cꞌuyaihuan cuidancuna. Shinapish paicunamanta carupi causashcamanta, paicunata ñucallataj mana cuidai tucushcamantami achcata llaquirini” ninmi. Cai pushaj huauquicuna imalla llaquicunata charishcata mana yachashpapish paicunamantami Yayitu Diosta mañana canchij (1 Tesalonicenses 5:​12, 13). Cai pushaj huauquicunapaj huarmicunamantapish Yayitu Diosta mañanataca manataj cungarinachu canchij. Cai panicunaca paicunapaj cusacuna ñucanchijta alli cuidachunmi tucui shunguhuan apoyancuna.

10, 11. ¿Tucui huauqui panicunata ayudangapajca imatataj rurana canchij?

¹⁰ Ña ricushca shinaca chꞌican chꞌican llaquicunata charij huauqui panicunamantami mañanchij. Maipica carcelpi caj huauqui panicunamantami Yayitu Diosta mañanchij. Shinallataj shuj familia huañushcamanta, llaquilla caj huauqui panicunamantapishmi mañanchij. ¿Imamantataj chꞌican chꞌican llaquicunata charij huauqui panicunamanta mañanchij? Tucui paicunata Jehová Dios ayudachun munashcamantami Diosta mañanchij. Donald shuti shuj ancianoca: “Caipi yuyai: ¿Chꞌican chꞌican huauquicuna tamyapi shutucushcata ricushpaca imatataj ruranguiman? Paicuna ama shutuchunmi shuj jatun plasticota japishpa paicunata cꞌatachinguiman. Chai shinallatajmi huauqui panicunaca achca llaquicunata charishcamanta shuj sinchi tamyapi shutucuj shina cancuna. Ñucanchijca tucui paicunata ayudasha nishcamantami paicunamanta Yayitu Diosta mañanchij” nircami.

¹¹ Ñucanchijcunaca tucui huauqui panicunapaj shuticunataca mana yachanchijchu. Paicuna imalla llaquicunata charishcatapish mana yachanchijchu. Chaimi cada unomantaca mana mañai tucunchij. Pero paicunapaj shuticunata mana yachashpapish tucui ungushca huauqui panicunamanta, tucui mayorlla huauqui panicunamanta, o shujtaj llaquicunata charij huauqui panicunamantapishmi Yayitu Diosta mañai tucunchij. Jehová Diosca chashna tucui huauqui panicunamanta mañachunmi munan (Juan 17:20; Efesios 6:18). Cai tucui huauqui panicunamanta mañashpaca shungumanta cꞌuyaj cashcatami ricuchishun (1 Pedro 2:17).

¿CADA UNOMANTA YAYITU DIOSTA MAÑANGAPAJCA IMATATAJ RURANA CANCHIJ?

12. ¿Cada unomanta Diosta mañangapajca imamantataj alli ricujcuna cana canchij?

¹² Alli ricujcuna cashunchij. Tucui huauqui panicunamanta mañashpapish cada unomantami Yayitu Diosta mañana canchij. Por ejemplo, ¿cambaj congregación ucupica maijan huauqui panica ancha ungüihuanchu can? ¿Huaquin jovencunaca paicunapaj compañerocuna mana allicunata rurachun obligashcamantachu desanimarishca can? ¿Maijan huauqui o panica solollachu paipaj huahuata Dios munashca shina huiñachingapaj esforzaricun? (Efesios 6:4). Alli ricujcuna cashpaca paicunata ashtahuan cꞌuyashcata, paicunamanta preocuparishcatami ricuchishun. Chashnami cada unomanta mañana munaita charishunb(Romanos 12:15).

13. ¿Huauqui panicunata ñahui ñahui mana rijsishpapish imatataj rurana canchij?

¹³ Shuticunata nishpa mañashunchij. Achca huauqui panicunaca Crimea, Eritrea, Rusia y Singapur llajtacunapimi carcelpi huichcashca cancuna. Chai huauqui panicunata ñahui ñahui mana rijsishpapish paicunapaj shuticunata nishpami mañai tucunchij. Cada unopaj shuticunataca jw.org paginapimi ricui tucungui.c Superintendente shina sirvij huauqui Brianca: “Carcelpi caj huauqui panicunamanta Diosta mañangapajca shuj hojapimi paicunapaj shuticunata quillcani. Chai qꞌuipaca paicunapaj shuticunatami cutin cutin ñucallataj repitini. Chaita rurashpami cada unomanta Diosta mañanataca manataj cungarini” nircami.

14, 15. ¿Carcelpi cajcunamanta Diosta mañangapajca imapitaj alli yuyarina canchij?

¹⁴ Paicuna ima shina sintirishcapi yuyashunchij. Párrafo 6-pi parlashca huauqui Michaelca: “Carcelpi caj huauquicunapaj causaimantami jw.org paginapi ricuni. Chaimi carcelpi caj maijan casado huauquicuna ima shina sintirishcapi yuyani. ¿Ñuca paicuna shina carcelpi cashpaca ñuca huarmisitataca pishi ayudacun?, ¿ima shinashi can? Nishpami preocuparinman. Paicuna ima shina sintirishcapi yuyashpami paicunamanta mañanaca jahualla can” nircami. (Hebreos 13:3).

¹⁵ Huauqui panicunapaj causai cada punlla cárcel ucupi ima shina cashcata yuyarishpami Jehová Diosman ima shina mañana cashcata alli yachashun. Por ejemplo, maipica carcelta cuidajcunaca ñucanchij huauqui panicunataca mana alli tratancunachu. Shujtaj llajtacunapipish Jehová Diosta ama sirvichunmi jarcancuna (1 Timoteo 2:​1, 2). Congregacionpi caj huauqui panicuna paicunapaj ejemplota ricushpa animarichun, Diosta mana sirvijcunapish paicunapaj ejemplota ricushpa animarichunmi Diosta mañana canchij (1 Pedro 2:12). Alli ricujcuna cashpa cada unopaj shutipi Diosta mañashpa, paicuna ima shina sintirishcapi yuyashpa Diosta mañashpami “caishujmanta chaishujmanta cꞌuyanacushcata ricuchishun” (1 Tesalonicenses 3:12). Caicunata rurashpami chꞌican chꞌican llaquicunata charij huauqui panicunamantapish Diosta mañai tucushun.

DIOSTA CONSEJACUJ SHINACA MANA MAÑANACHU CANCHIJ

16. ¿Imamantataj Diosta consejacuj shinaca mana mañana canchij? (Mateo 6:8).

¹⁶ Ñucanchij mañashcacunaca shujtajcunatami ayudai tucun. Shinapish Diosta mañacushpaca paita consejacuj shinaca mana mañanachu canchij. Ashtahuanpish paita sirvijcuna imalla llaquicunata charishcataca Diosca ñami alli yachan (Mateo 6:​8-ta liyipai). Cai yachaipica imamanta caishujmanta chaishujmanta Diosta mañana valishca cashcatami yachashcanchij. Shinallataj huauqui panicunata cꞌuyashcamanta, paicunamanta preocuparishcamantami Diosta mañanchij. Jehová Diosca caishujmanta chaishujmanta cꞌuyaita ricuchinacushcamantami cushilla sintirin.

17, 18. ¿Jehová Dios ñucanchij mañashcacunata uyashcataca ima shinataj yachanchij? (Shuj ejemplota churashpa parlai).

¹⁷ Ñucanchij huauqui panicunamanta mañashpaca paicunata cꞌuyashcatami ricuchinchij. Jehová Diosca ñucanchij mañashcacunatami siempre uyan. Caipi yuyashunchij: “Shuj yayaca shuj churita, shuj ushushitami charin. Paipaj churica ungushca cashcamantami camapi can. Shinapish yayaca paipaj churitaca achcatami cꞌuyan. Ima shina jambinatapish, ima shina cuidanatapish allimi yachan. Pero huarmi huahuaca paipaj yayataca: “Papito ñuca turita ayudahuai, paica yallitaj ungushcami can” nishpami shungumanta mañan. Chashnami paipaj turita achcata cꞌuyashcata, paimanta preocuparishcatapish ricuchin. Chashna paipaj turimanta preocuparijta ricushpaca paipaj yayaca achcatami cushicun”.

¹⁸ Jehová Diospish cai yaya shinallatajmi ñucanchijpish huauqui panicunamanta preocuparichun, paicunamantapish mañachun munan. Huauqui panicunamanta mañashpami ñucanchijllamanta mana preocuparishcata ricuchinchij. Ashtahuanpish ñucanchij huauqui panicunata cꞌuyashcatami ricuchinchij (2 Tesalonicenses 1:3; Hebreos 6:10). Ña ricushca shinaca ñucanchij mañashcacunaca ñucanchij huauqui panicunatami maipica ayudai tucun. Chaimantami ñucanchij huauqui panicunamanta mañanataca manataj cungarina canchij.