Alli yuyarishpa decidishunchij

1. a) ¿Imamantataj Cainca pandata agllarca? b) ¿Cainca mana allita agllashcamantaca imataj tucurca?

CAINCA millai munaicunatami charirca. Paica chai millai munaicunata huashaman saquishpa allita ruranatami agllai tucurca. Mana cashpaca chai millai munaicuna paita vencichun saquishpami mana allita ruranata agllai tucurca. Diospaj Shimipica ‘Cainca mana allita ruranatami agllarca’ ninmi. Chaimantami paipaj huauqui Abelta huañuchirca. Shinami Diospaj ñaupajpipish mana alli ricurirca (Génesis 4:3-16).

2. ¿Imamantataj allita ruranata agllana canchij?

² Tucuicunami imata ruranata agllana canchij. Huaquinpica jatun decisioncunata o uchilla decisioncunatami agllana canchij. Allita ruranata agllashpaca mana tanto problemacunata charishunchu. Ashtahuanpish tranquilomi causashun. Pero mana allita ruranata agllashpaca achca problemacunatami charishun, cꞌuyillatami causashun (Proverbios 14:8).

3. a) ¿Alli decisioncunata agllangapajca imatataj rurana canchij? b) ¿Cai yachaipica ima tapuicunatataj yachashun?

³ Alli decisioncunata agllangapajca puntapica Jehová Diospimi tucui shunguhuan crina canchij. Pai ñucanchijta ayudanatapish, alli yachaita cunatapish crinami canchij. Diospaj Shimipi tiyaj consejocuna ñucanchijta ayudatapishmi crina canchij (Santiago 1:5-8-ta leyipai). Chashnallataj Yaya Diospajman ashtahuanmi cꞌuchuyana canchij, paipaj Shimitapish estudianami canchij. Chaita rurashpaca Yaya Dios ñucanchijcuna alli causachun munashcatami yachashun. Ashtahuanpish ima decisioncunata japisha nishpaca manaraj decidishpami Diospaj ayudata mashcashun. Pero ¿alli decidingapajca imatataj rurana canchij? ¿Shuj decisionta agllashca cashpaca cambiai tucunchijchu? Cai yachaipica cai tapuicunatami yachashun.

DECISIONCUNATA JAPINAMANTA

4. a) ¿Adanca imatataj agllana carca? b) ¿Mana allita decidishcamantaca Adanhuanca imataj tucurca?

⁴ Adán causacushcamantapachami gentecunaca importante decisioncunata agllana carca. Por ejemplo, Adanca Diosta cazunata o paipaj huarmita uyanatami agllana carca. Pero Adanca paipaj huarmitami uyarca. Chaimantami shuj mana alli decisionta japirca. Mana cazushcamantami Yaya Diosca Edén huertamanta llujshichishpa cacharca. Qꞌuipa huatacunaca Adanpish Evapish huañurcacunami. Adán mana alli decidishcamantami cunancama llaquicunata apacunchij.

5. ¿Mana máquina shina cashcamantaca imatataj cada uno rurana canchij?

⁵ Maijan gentecunaca imata mana agllana cajpica causaica jahuallami canman nincunami. Pero ñucanchijca mana chashna yuyanchijchu. Yuyarishunchij: Jehová Diosca ñucanchijtaca mana maquinata shinachu rurashca. Maquinacunaca mana yuyanchu, mana decidi tucunchu. Pero Diosca ñucanchijllataj alli decisioncunata agllanata yachachunmi paipaj Shimita cushca. Paica ñucanchijllataj decidichunmi munan. Chaimanta manaraj imata rurashpami alli yuyarinaraj canchij. Cunanca israelitacuna ima decisioncunata agllashcamanta parlashun.

6, 7. a) ¿Israelitacunaca imatataj agllana carca? (Página 9-pi tiyaj dibujota ricui). b) ¿Imamantataj paicunapajca decidinaca sinchi ricurirca?

⁶ Dios cusha nishca Allpapi israelitacuna ña causacushpaca Jehová Diosta adoranata o shujtaj dioscunata adoranatami agllana carca (Josué 24:15-ta leyipai). Paicunapajca chaita agllanaca mana tanto importante shinami ricurishcanga. Pero mana allita agllashpaca huañunami carca. Juezcuna causacushca punllacunapica israelitacunaca Diosta adoranata saquishpa yanga dioscunatami adoranata agllarcacuna (Jueces 2:3, 11-23). Cutin profeta Elías causashca tiempopipish israelitacunaca Jehová Diosta servinata o Baal diosta servinatami agllana carca (1 Reyes 18:21). Ñucanchijpajca Jehová Diosta servina alli cashcata yachashcamantami chai decisionta agllanaca jahuallami cashcanga ninchij. Shinallataj mana causaj diosta adorana yanga cashcatami yachanchij. Pero israelitacunapajca chai decisionta agllanaca sinchimi ricurirca. Diospaj Shimipi nishca shinaca paicunaca ‘ishquipajta rurajcunami’ tucushcacuna carca. Chaita ricushpami Eliasca Jehová Diosllata cutin adorachun animarca.

⁷ ¿Imamantataj israelitacunapajca alli decidinaca sinchi ricurirca? Paicunaca Diospi tucui shunguhuan mana crircacunachu, pai mandashcatapish mana uyanata munarcacunachu. Jehová Diosmantapish paipaj ñancunatapish yachangapaj mana dedicarircacunachu. Chaita rurashca cajpica alli decisioncunatami agllanman carcacuna (Salmo 25:12). Shinallataj shujtaj llajta gentecuna shinami yuyai callarircacuna. Chaimantami mana alli decisioncunata agllarcacuna. Maipicarin paicunamanta decidichunmi saquircacuna. Achca huatacuna huashamanmi Diosca: ‘Millaita rurajcunahuan ama shuj yuyailla tucunguichij’ nirca. Chashna nishca jahuapish israelitacunaca yanga dioscunatami adorai callarircacuna (Éxodo 23:2).

¿SHUJTAJCUNA ÑUCANCHIJMANTA DECIDINACHU CAN?

8. ¿Israelitacunamantaca imatataj yachanchij?

⁸ ¿Israelitacunamantaca imatataj yachanchij? Alli decisioncunata agllangapajca Diospaj Shimipi ima nishcata cazunami canchij. Gálatas 6:5-pi nishcata ama cungarishunchij. Chaipica: “Paicuna imata rurashcamantaca, cada quiquinmi chasquingacuna” ninmi. Chaimanta shujtajcuna ñucanchijmanta decidichunca mana saquinachu canchij. Ashtahuanpish cada uno Diospaj ñaupajpi ima alli cashcata yachashpami pajtachina canchij.

9. ¿Shujtajcuna ñucanchijmanta decidichun saquishpaca imataj tucunman?

⁹ Huaquinpica maijancunaca cashna o chashna rurai nishpami atirincuna. Paicuna nishca shina rurashpaca ñucanchijmanta decidichunmi saquicunchijman (Proverbios 1:10, 15). Ñucanchijca Bibliapi ima nishcata cazushpami cada uno imata ruranata agllana canchij. Pero shujtajcuna ñucanchijmanta decidichun saquishpaca Diospaj Shimita cazunapaj randica paicunatami cazucunchijman. Chaita rurashpaca llaquicunatami charishun.

10. ¿Apóstol Pabloca Galaciapi causaj crijcunataca imatataj nirca?

¹⁰ Apóstol Pabloca Galacia llajtapi causaj crijcunataca, ‘shujtajcuna cancunamanta decidichun mana saquinachu canguichij’ nircami (Gálatas 4:17-ta leyipai). Galacia congregacionpica huaquin crijcunaca shujtajcunamantami decidinata munarcacuna. Chai crijcunaca paicunallapi yuyajcuna, jatun tucushcacunami carca. Apostolcunata uyachunca mana munarcacunachu. Ashtahuanpish paicunata uyachunmi munarcacuna. Huauquicunallataj panicunallataj decidichunca mana saquijcunachu carca.

11. ¿Shujtajcuna shuj decisionta agllana cajpica imatataj rurana canchij?

¹¹ Apóstol Pabloca huauquicunata panicunatami respetaj carca. Chaimantami paicunamanta mana decidij carca. Ñucanchijpish pai shinami cana canchij (2 Corintios 1:24-ta leyipai). Ancianocunapish Pablo rurashca shinami rurana can. Por ejemplo, shuj huauqui o pani shuj decisionta japina cajpica ancianocunaca Bibliapi, publicacioncunapi consejocunata ricuchishpami ayudana can. Pero cada uno imata decidishcamanta llaquilla o cushilla causanatami ancianocunaca yuyarina can. Chaimantami shujtaj huauquimanta o panimantaca mana decidina can. Cutin ñucanchijpish shujtajcuna ima decisionta agllasha nijpica Bibliapi ima nishcata ricuchishpami ayudana canchij. Paicunallataj imata ruranata agllashpaca allimi sintiringacuna. Ñucanchij huauquicunamanta o panicunamanta decidinalla cashcataca mana yuyanachu canchij.

SHUNGU MUNASHCA SHINA AMA RURASHUNCHIJ

12, 13. ¿Colera rato o llaquilla cashpaca imamantataj decisioncunata mana japina canchij?

¹² Achca gentecunaca shungu munashca shinami imatapish decidincuna (“Alli entendishunchij” nishca cuadrota ricui). Pero chaita ruranaca mana allichu. Juchayujcunami canchij. Chaimanta ñucanchij shungu munashca shina ima decisioncunatapish mana japinachu canchij (Proverbios 28:26). Shinallataj Jeremías 17:9-pica: “Runapaj shunguca tucui imatapish yalli, umajlla millai shungumi” ninmi. Chaimanta imata agllagricushpa ñucanchij shungu munashca shina mana ruranachu canchij. Bibliapica achca gentecuna paicunapaj shungu munashca shina rurashcamanta llaquicunata charishcatami parlan (1 Reyes 11:9; Jeremías 3:17; 13:10). ¿Ñucanchij shungu munashca shina imatapish rurashpaca imataj tucushun?

¹³ Jehová Diosca: ‘Ñucata tucui shunguhuan cꞌuyaichij. Cancuna cꞌuyarij shinallataj shujtajcunatapish cꞌuyaichij’ nishpami mandan (Mateo 22:37-39). Ñaupa parrafopi parlashca versocunata yuyarishun. Chaipica ñucanchij shungu munashca shina imatapish decidishpaca llaquicunata charinatami ricurcanchij. Por ejemplo, colera rato o llaquilla cashpaca manachari shuj alli decisionta japishun (Números 32:6-12; Proverbios 14:17; 24:10; 29:22). Chaimanta jatun decisioncunata agllagricushpa ñucanchij shungu munashca shina ruranapaj randica Diospaj Shimi ayudachunmi saquina canchij (Romanos 7:25).

DECISIONCUNATA CAMBIANAMANTA

14. ¿Jehová Dios paipaj decisioncunata cambiashcamantaca imatataj yachanchij?

¹⁴ Tucuicunami alli decisioncunata agllana canchij. Pero huaquinpica ña shuj decisionta agllashca cashpapish cutinmi alli yuyarishpa shujtaj decisionta agllana tucunga. Caita alli entendingapajca Nínive llajtapi causaj gentecunata Jehová Dios ima shina tratashcata yuyarishun. ‘Taita Diosca, Nínive pueblopi causajcunaca millai ruranacunata saquishpa cutirishcatami ricurca. Chaimantami pai llaquichisha nishca cashpapish, jarcarishpa mana llaquichirca’ (Jonás 3:10). Chai millai gentecuna arrepentirishcata ricushpaca Jehová Diosca paicunata mana chingachinatami yuyarirca. Chashnami llaquij, alli yuyarij, humilde cashcata ricuchirca. Huaquincunaca pꞌiñarishca cashpaca imatapishmi decidincuna. Pero Diosca pꞌiñarishca cashpapish alli yuyarishpami imatapish decidin.

15. ¿Maipica imamantataj decisioncunata cambiana canchij?

¹⁵ Huaquinpica allichu decidircani nishpami cutin yuyarina canchij. Ñucanchij causai cambiarishcamantachari cutin alli yuyarina tucunga. Yuyarishun, Jehová Diospish huaquinpica imata ruranata ña agllashca cashpapish shujtaj decisiontami japirca (1 Reyes 21:20, 21, 27-29; 2 Reyes 20:1-5). Shinallataj imata ña alli entendishpa o alli yachashpaca ñucanchij decisioncunata cambianachari tucunga. Por ejemplo, shuj runaca rey Davidmanca Saulpaj nietomantami llullacunata nirca. Chaimantami Davidca shuj decisionta japirca. Pero qꞌuipata alli yachaj chayashpaca shujtaj decisiontami japirca (2 Samuel 19:24-29). Maipica ñucanchijpish David rurashca shinachari rurana canchij.

16. a) ¿Alli decidingapajca imatataj yuyarina canchij? b) ¿Maipica imamantataj shujtaj decisionta japina tucunga? c) ¿Maipica imata decidishca jahuapish imatataj tigra rurana tucunga?

¹⁶ Imatapish yuyarishcahuan mana agllanachu canchij (Proverbios 21:5). Ashtahuanpish alli yuyarishpami ima decisiontapish japina canchij. Chashnami allita agllashun (1 Tesalonicenses 5:21). Por ejemplo, familiata pushajcunaca Bibliata, publicacioncunata alli estudiashpami ima decisioncunatapish japina can. Shinallataj familiacuna ima consejota cujpica allimi uyana can. Yuyarishun, Diosca Abrahamtaca cambaj huarmi ima nishcata uyai nircami (Génesis 21:9-12). Ancianocunapish Bibliata, publicacioncunata estudiangapaj tiempota surcunami can. Por ejemplo, imata alli entendishpa, alli yachashpaca shujtaj decisiontachari japina canga. Paicunaca, “shujtaj decisionta japijpica ñucataca ña mana respetangachu” nishpaca mana yuyanachu can. Ashtahuanpish humilde, alli yuyarij ancianocunaca shujtaj decisionta japina cashpaca japinallami can. Ñucanchijpish paicunapaj ejemplota catinami canchij. Chashnami huauqui panicunahuan tandalla, cushilla cashun (Hechos 6:1-4).

IMATA DECIDISHCATA PAJTACHINAMANTA

17. ¿Ima shinataj alli decisioncunata agllai tucunchij?

¹⁷ Huaquinpica jatun decisioncunatami japina canchij. Por ejemplo, cazaranata, mana cazaranata o pihuan cazaranatami decidina tucunga. Shinallataj Diosta ashtahuan servinapaj imata ruranatapishmi decidina tucunga. Pero chaicunata manaraj decidishpami alli yuyarina canchij, Dios ayudachunpish mañanami canchij. Chaipajca tiempomi minishtiringa. Pero alli decisionta agllasha nishpaca Diospimi shunguta churana canchij, pai ima nishcatapish cazunami canchij (Proverbios 1:5). Yaya Diosca Bibliapi sumaj consejocunatami cushca. Chaimantami Bibliata estudiana canchij. Maijan ñanta rinata ricuchichunpish paitami mañana canchij. Jehová mandashcacunata yuyaipi charishpa imatapish decidijpica paillatajmi ñucanchij decisioncuna alli llujshichun ayudanga. Chaipajca cꞌuyaj, llaquij, humilde cachunmi ayudanga. Chaimanta manaraj ima decisionta agllashpami, ¿ñuca decisioncunaca Diosta cꞌuyashcatachu ricuchinga? ¿Ñuca decisioncunamantaca ñuca familiaca tranquilo, cushillachu sintiringa? Shinallataj ¿ñuca decisioncunaca mana utca pꞌiñarij cꞌuyaj cashcatachu ricuchinga? nishpami yuyarina canchij.

18. ¿Imamantataj Yaya Diosca ñucanchijllataj decidichun saquishca?

¹⁸ Jehová Diosca paita cꞌuyachun, cazuchunca mana obliganchu. Ashtahuanpish ñucanchijta respetashcamantami cada uno paita servinata o mana servinata agllachun saquishca (Josué 24:15; Eclesiastés 5:4). Pero paita servinata ña agllashca cajpica Diosca ñucanchij ari nishcata pajtachichunmi munan. Shinallataj Bibliapi ricushpa imatapish decidishca cajpica pajtachichunmi munan. Diospi confiashpa, paipaj nishcacunata cazushpaca alli decisioncunatami agllashun. Chashnami ñucanchij decidishcata pajtachisha nicushcata ricuchishun (Santiago 1:5-8; 4:8).