¿Testigo de Jehovacunaca ima shinataj Bibliamanta yachachincuna?
Testigo de Jehovacunaca gentecunamanca Bibliamanta allimi yachachincuna. Ñucanchijhuan Bibliamanta estudiashpaca:
Cushillami causangui.
Jehová Diospaj amigopishmi tucungui.
Shamuj punllacunamanta Biblia ima huillashcatapishmi yachangui.
Cai paginapimi cai tapuicunata cutichishun:
¿Bibliamanta estudiana ima shina cashcallata ricui tucunichu?
¿Bibliata estudiai callarijpica testigo de Jehová tucuchun obligangacunachu?
¿Bibliata estudiangapajca pi ñucata compañachun mañai tucunichu?
¿Ñaupaman testigo de Jehovacunahuan Bibliata ña estudiashca cashpapish cutin estudiai tucunichu?
¿Pi Bibliamanta mana yachachijpipish ñuca solo estudiai tucunichu?
¿Testigocunaca ima shinataj Bibliamanta yachachincuna?
Shuj testigo de Jehovami quiquinta Bibliamanta chꞌican chꞌican temacunamanta yachachinga. Huiñai huiñaita cushilla causai nishca publicacionhuanmi Biblia ima yachachishcata, chaipi yachachishcacuna cambaj causaipi ayudaj cashcatapish intindingui. Caimanta ashtahuan yachasha nishpaca cai videota ricui.
¿Paganachu cani?
Mana. Testigocunaca Jesús paita catijcunaman ima nishcatami pajtachinchij. Paica: “Cancunaca gratismi chasquircanguichij, shujtajcunamanpish gratis cuichij” nircami (Mateo 10:8). Ñucanchijhuan Bibliamanta estudiangapajca shuj Bibliata, Huiñai huiñaita cushilla causai nishca publicaciontami minishtingui. Pero chai publicacioncunamantapish mana paganachu cangui. Gratismi can.
¿Mashna tiempotataj estudiana cani?
Huiñai huiñaita cushilla causai nishca publicacionca 60 yachaicunatami charin. Canmi mashna tiempopi cai publicacionta tucuchinata decidingui. Maijancunaca cada semana shuj yachaita o shuj leccionta estudianatami munancuna. Shujtajcunaca ashtahuan leccioncunata estudianata decidincuna.
¿Bibliamanta estudiai callaringapajca imatataj rurana cani?
1. Ñucanchij paginapi tiyaj formulariota jundachi. Cai formulariopi can quillcashca datocunata ricushpaca shuj testigo de Jehová canta visitachunmi cachashun. Cambaj datocunataca pimanpish mana cushunchu.
2. Bibliamanta yachachigrij shuj testigo de Jehovami quiquinta cayanga. Paimi Bibliamanta yachangapaj imallata rurana cashcata huillanga. Chashnallataj can rurashca tapuicunatapishmi cutichinga.
3. Ima shina, ima horas estudianatami cambaj yachachijhuan decidi tucungui. Bibliamantaca en personami estudiai tucungui. Mana cashpaca telefonomanta, videollamadata rurashpa o correo electronicota utilizashpami estudiai tucungui. Bibliata estudiangapajca más o menos shuj horami minishtirin. Pero quiquinmi decidi tucungui ashtahuan o menos tiempota estudianata.
¿Bibliamanta estudiana ima shina cashcallata ricui tucunichu?
Ari. Chaipajca ñucanchij paginapi tiyaj formulariota jundachi. Quiquinta yachachigrij cayajpica shuj cutinlla Bibliamanta estudianata munashcata huillangui. Callaringapajca yachachijca Huiñai huiñaita cushilla causai folletotami utilizanga. Chai folletoca quimsa leccioncunallatami charin. Chaipimi quiquinllataj ashtahuan estudianata o ña mana estudianata decidingui.
¿Bibliata estudiai callarijpica testigo de Jehová tucuchun obligangacunachu?
Mana. Testigo de Jehovacunaca gentecunamanca cushicuihuanmi Bibliamanta yachachincuna. Pero testigo de Jehová tucuchunca mana pita obligancunachu. Paicunaca Biblia ima nishcatami respetohuan yachachincuna. Shinapish cada persona imapi crinata decidichunmi saquincuna (1 Pedro 3:15).
¿Estudiangapajca ñuca propio Bibliata utilizai tucunichu?
Ari. Quiquinca quiquin munashca Bibliatami utilizai tucunguilla. Testigo de Jehovacunaca Traducción del Nuevo Mundo Bibliatami utilizanchij. Chai Bibliaca tucuita alli traducishca, intindirinallami can. Pero huaquin gentecuna paicuna charishca Bibliata utilizanata munashcatami yachanchij.
¿Bibliata estudiangapajca pi ñucata compañachun mañai tucunichu?
Ari. Cambaj familiata o cambaj amigocunatami invitai tucungui.
¿Ñaupaman testigo de Jehovacunahuan Bibliata ña estudiashca cashpapish cutin estudiai tucunichu?
Ari. Cunan ima shina yachachishcata ricushpaca ashtahuan yachanatachari munanguiman. Cai tiempopi Bibliamanta yachachingapajca huaquin cambiocunatami rurashcacuna. Por ejemplo, Bibliamanta estudiacushpaca huaquin fotocunata, videocunata ricungui. Chaicunami yachachijhuan ashtahuan parlanacuchun ayudan.
¿Pi Bibliamanta mana yachachijpipish ñuca solo estudiai tucunichu?
Ari. Maijancunaca shujtajcunahuan Bibliata estudiashpaca jahuallami intindincuna. Pero shujtajcunaca paicunalla estudianatami munancuna. “Bibliata estudiangapaj ayudacuna” nishca partepimi huaquin videocuna, yachaicuna, publicacioncunapish tiyan. Chaicunami Bibliata alli estudiachun ayudanga. Por ejemplo, cai ayudacunami tiyan:
Bibliamanta yachachij videocuna. Cai uchilla videocunapica Bibliamanta importante yachachishcacunatami ricui tucungui.
Bibliamanta tapuicuna. Cai partepica Bibliamanta rurashca huaquin tapuicunatami cutichin.
Textos bíblicos explicados nishca parteta españolpi ricui. Cai partepica Bibliamanta rijsishca yuyaicuna o versocuna ima nisha nishcatami yachangui.