2020 “Imapipish cushilla caichij” nishca jatun tandanacuipaj videocuna

Jatun tandanacuicunapaj videocunapi yachachishcacunaca ñucanchij shungumanmi chayan. Shinallataj Bibliata ashtahuan alli intindichunmi ayudan. 2020 “Imapipish cushilla caichij” nishca jatun tandanacuipajca 114 videocunami tiyan. Caicunamanta 43 videocunaca Cuerpo Gobernantepi sirvijcunapaj, paicunata ayudajcunapaj discursocunami can. ¿Cai videocunata rurangapajca mashna trabajo, mashna cullquishi minishtirirca nishpa tapurishcanguichu?

Muyundij Allpamanta casi 900 huauqui panicunami paicunapaj tiempohuan, yachashcacunahuan cai jatun tandanacuipaj videocunata rurashpa ayudarcacuna. Cai proyectota pajtachingapajmi ishqui huatacunapi en total casi 100.000 horascunata trabajarcacuna. Cai 100.000 horascunamantaca 70.000 horascunatami Nehemías: Jehová cushichijpimi fuerzayuj tucunchij nishca ishqui videocunata rurangapaj utilizarcacuna.

Voluntario huauqui panicunata cuidangapaj, paicunapaj trabajota alli rurachun ayudangapaj, materialcunata, equipocunata charingapajca achca cullquimi minishtirirca.

Servicios de Audio y Videopi sirvij huauqui Jared Gossmanca: “Comité de Enseñanzapi sirvij huauquicunaca chꞌican chꞌican culturacunamanta, chꞌican chꞌican llajtacunamanta videocuna tiyachunmi munancuna. Chashnami muyundij Allpapi causaj huauqui panicunaca shuj familia shina cashcata videocunapi ricunchij. Chaipajca 11 chꞌican chꞌican llajtacunamanta 24 equipocunapimi huauqui panicunaca trabajarcacuna. Cai huauqui panicuna tandalla trabajachunca cullqui, alli planificana, alli organizanami minishtirirca”.

Achca videocunata rurangapajca alli equipocunata utilizana, chꞌican chꞌican lugarcunata alli allichinami minishtirirca. Por ejemplo, Nehemías: Jehová cushichijpimi fuerzayuj tucunchij nishca videocunata rurangapajca Mount Ebopi caj estudiopimi (Nueva York) huaquin cosascunataca alajata shayachina carcanchij. Huauqui panicuna shungumanta cushca cullquita alli utilizanatami munarcanchij. Chaimantami ñaupa Jerusalenpi caj pircacunata shinallataj rurangapajca huauqui panicunaca apanalla pircacunata rurarcacuna. Cada pircacunaca 6 metros altotami charircacuna. Cai pircacunaca maderahuanmi rurashca carca. Shinallataj jatun rumicunahuan rurashca shina paricichunca shuj laya materialtami utilizarcacuna. Cai pircacunaca shujtaj lugarcunata laya shayachingapajca caishuj lugarman apanallami carca. Chaimantami shujtaj pircacunata ashtahuan ruranaca ña mana minishtirirca. Shinapish chaicunata rurana solopimi casi 100.000 dólares cullqui minishtirirca.a

Cai tucuita rurashcata yachashpami cai huatapaj jatun tandanacuitaca ashtahuan valoranchij. Cai tucui trabajo, esfuerzoca muyundij Allpamanta huauqui panicuna Jehová Diosta alabachunmi ayudanga. Cancuna donate.jw.org paginapi o shujtaj laya shungumanta cullquita cushpa ayudashcamantami diosolopagui ninchij.