Yallitaj achca publicacioncunatami cambaj dispositivopi chari tucungui

“Asha tiempo huashamanca Dios cushca yachaicunata internetpi charinataca mana crircanchijchu”. Cai shimicunataca huauqui Geoffrey Jacksonmi 2020 huatapi Cuerpo Gobernante huillashcacuna (parte 6) nishca videopi nirca. Shinallataj paica: “JW Library aplicacionta mana charishca cashpaca ¿ima shinataj cai pandemia punllacunapica caiman carcanchij? Yaya Diosca cai llaquicunata chꞌimbapurangapaj listos cachunmi ñucanchijtaca ayudacushca” nircami.

¿Jehová Diosca ima shinataj ñucanchijta ayudacushca? ¿JW Library nishca aplicacionta rurangapajca imallataj minishtirishca? ¿Cai aplicacionta ashtahuan allichingapaj, valishpa catichunpish imatataj rurancuna?

Punta cutinmi cashna aplicación ricurin

Mayo de 2013 huatapica Cuerpo Gobernantemanta huauquicunaca Programación de MEPS nishca departamentopi sirvij huauquicunatami Traducción del Nuevo Mundo revisashca Bibliata ricungapaj shuj aplicacionta rurachun mañarcacuna. Programación de MEPS nishcapi trabajaj huauqui Paul Williesca: “Cuerpo Gobernantemanta huauquicuna chaita ni horasca aplicacioncunata descargangapaj programacunapica ni shuj aplicacionta mana charircanchijchu. Chaimantami huaquin huauquicunata tandachishpa shujtaj departamentocunapi sirvij huauquicunahuan chai aplicacionta rurai callarircanchij. Chaipajca huaquin proyectocunata ruranatami saquircanchij. Chai aplicacionta ruracushpaca Yayitu Diostami cutin cutin mañaj carcanchij. Yayitu Dios ayudashcamantami pichca quillacuna qꞌuipalla reunión anualpi cai aplicación llujshishcata huillarcacuna” ninmi.

Cai aplicacionca Bibliallatami charirca. Pero ashtahuan publicacioncunata charichun, ashtahuan shimicunapi llujshichunmi trabajashpa catina carcanchij. Chaimi 2015 enero quillapajca inglés shimipi cunanlla llujshishca publicacioncunataca ña aplicacionpi churarcacuna. Y seis quillacuna qꞌuipallami chai publicacioncunataca ña shujtaj shimicunapi descargai tucurcacuna.

Chai punllamantami ñucanchij huauquicunaca chai aplicacionta ashtahuan allichishpa catishcacuna. Por ejemplo, videocunatami churashcacuna. Tandanacuicunapaj prepararingapajpish tucui minishtishcacunatami churashcacuna. Ashtahuancarin Bibliapaj shuj versoman yaicushpami chai versomanta parlaj publicacioncunata liyingapaj Guía de Estudio nishcaman directo yaicui tucunchij.

JW Library aplicación alli funcionachunmi ricunchij

JW Libraryca 8 millón dispositivocunapimi tucui punllacuna pascashca can. Cutin cada quillaca 15 millón yalli dispositivocunapimi cai aplicacionca pascashca can. ¿Cai aplicación chꞌican chꞌican dispositivocunapi alli funcionachunca imataj minishtirin? Huauqui Williesca: ”Shuj aplicaciontaca siempremi mejorashpa catina can. Cai aplicacionta utilizangapaj jahualla cachunmi caita punllanta allichishpa caticunchij. Empresacunaca celularcunapaj, tabletcunapaj o computadoracunapaj sistema operativo nishcacunata actualizashpami catin. Chaimantami ñucanchijpish JW Library aplicación chai sistema operativo nishcacunapi funcionashpa catichun punllanta actualizashpa catina canchij. Shinallataj ashtahuan videocunata, ashtahuan publicacioncunata chai aplicacionpi churashpa catishcamantami aplicacionta actualizashpa catina canchij” ninmi. Tucui shimicunapi tiyaj publicacioncunata cuentashpaca JW Librarypica casi 200.000 publicacioncunami tiyan. Y 600.000 yalli audiocuna, videocunapishmi tiyan.

JW Library aplicacionta mejorashpa catingapajca computadoracunatami minishtinchij. Shinallataj chai computadoracunapaj programacunata randinata, paganatami minishtinchij. Por ejemplo, shuj programallamantami huatapica 1.500 dolarcunata pagana canchij. Programación de MEPS nishcapi trabajajcunaca JW Library aplicacionca mushuj computadoracunapi, mushuj tabletcunapi, telefonocunapi funcionashpa catichunmi ricuna can. Chaipajca cada huatami chai mushuj aparatocunata casi 10.000 dolarcunahuan randin.

Dispositivocunapi descargashpami cullquita ahorrashcanchij

JW Library aplicacionta charishcamantami publicacioncunata impriminapi, chaicunata cachanapica ña mana tanto cullquita gastanchij. Por ejemplo, 2013 huatapaj Diospaj Shimita punllanta yachashunchij nishca folletotaca casi 12 millones copiacunatami imprimircanchij. Pero 2020 huatapajca casi 700.000 publicadorcunahuan mirajpipish cai folletocunataca casi 5 milloncunallatami imprimircanchij. ¿Imamantataj chashna ashallata imprimircanchij? Bueno achca huauqui panicunaca Diospaj Shimita punllanta yachashunchij nishca folletotami JW Library aplicacionpi liyincuna.a

“Cai aplicacionmi achcata ayudashca”

JW Library nishca aplicacionca achcacunatami ayudashca. Por ejemplo, Canadá llajtamanta pani Genevièveca JW Library aplicacionta utilizashcamantami Bibliamanta ashtahuan alli estudiai tucushca. Paica: “Ñuca estudiangapaj minishtishca tucui librocunata tandachina cashpaca punllantaca mana estudiaimanchu. Pero JW Library aplicacionta ñuca celularpi charishcamantami tucui cai publicacioncunata rato japi tucuni. Punllanta Bibliata, publicacioncunata estudiashcamantami ñuca feca ashtahuan sinchiyarishca. Jehová Diospajmanpish ashtahuanmi cꞌuchuyarishcani” ninmi.

COVID-19 ungüi tiyashcamantaca cai aplicacionmi ñucanchijtaca achcata ayudashca. Estados Unidos llajtamanta Charlyn shuti panica: “COVID ungüi tiyashcamantami imprimishca publicacioncunataca shuj huata yallita mana chari tucushcani. Pero JW Library aplicacionpi publicacioncunata charishmantami ñucanchij feta sinchiyachishcanchij. Cai ayudata charishcamantami Jehová Diostaca shungumanta pagui nini” ninmi.

Achcacunami Filipinas llajtapi causaj pani Faye shina yuyancuna. Cai panica: “JW Library aplicaciontaca Dioshuan ashtahuan alli apanacungapajmi utilizani. Tutamantita jatarishpami liyingapaj cai aplicacionta pascani. Huasipi imata ruracushpapish aplicacionpi tiyaj audiocunatami uyani. Shinallataj cai aplicacionta utilizashpami tandanacuicunapaj prepararini. Bibliatapishmi estudiani. Samaricushpapish chaipi tiyaj videocunatami ricuni. Imata rurangapaj filapi shuyacushpapish aplicacionpi tiyaj yachaicunata o Bibliatami liyini. Cai aplicacionmi achcata ayudashca” ninmi.

Cai aplicacionca predicangapajpishmi ayudan. Por ejemplo, Camerún llajtamanta shuj pani huillacushpaca shujtaj pani utilizashca versotami asha semanacuna huasha liyisha nirca. Pero maijan verso cashcataca mana yuyarircachu. Paica: “Chai versomanta huaquin palabracunatami yuyarircani. Chaimi aplicacionta pascashpa, Bibliaman yaicushpa chai palabracunata quillcarcani. Chaimantami chai versota rato japircani. Maipica huaquin versocunatami cungarini. Pero cai aplicacionta charishcamantami shuj palabrata escribishpa rato versocunata japinilla” ninmi.

Muyundij Allpamanta huauqui panicuna JW Library aplicacionta utilizashpa catichunca cancuna donate.jw.org paginapi cushca cullquihuanmi cai aplicacionta mejorashpa catishcanchij. Alli funcionashpa catichunpishmi ricushcanchij. Chaimantami cancunata agradicinchij.

JW Librarypaj rurashcacuna

1. 

   Octubre de 2013: Traducción del Nuevo Mundo revisashca Bibliahuanmi cai aplicacionca llujshirca.

2. 

   Enero de 2015: Aplicacionpica inglés shimipi tiyaj publicacioncunatami churarcacuna. Qꞌuipaca shujtaj shimicunapi tiyaj publicacioncunatapishmi churarcacuna.

3. 

   Noviembre de 2015: Publicacioncunatami resaltai tucurcacuna.

4. 

   Mayo de 2016: Aplicacionpica “Reuniones” nishca partemi llujshirca.

5. 

   Mayo de 2017: Notacunatami anotai tucurcanchij.

6. 

   Diciembre de 2017: Biblia de Estudio nishcatami inglés shimipi churarcacuna.

7. 

   Marzo de 2019: Chai aplicacionpica audiocunatami descargai tucurcanchij. Shinallataj videocunataca mana descargashpami chaillapitaj ricui tucurcanchij. Guía de Estudio nishcapi tiyaj publicacioncunatapishmi ricui tucurcanchij.

8. 

   Enero de 2021: Huiñai huiñaita cushilla causai publicacionta ashtahuan alli utilizangapajmi huaquin ayudacunata churarcacuna.