Jehovapajman cꞌuchuyachij cantocuna

Cantocunaca Dios cushca regalomi can. Cantocunaca alli yuyaita charichun, cushilla cachun, shinallataj animota japichunpishmi ayudan. Por ejemplo, JW Broadcastingpi^® llujshishca cantocunata uyashpami chashna sintirinchij. Ashtahuanpish cai cantocunaca Diospajmanmi cꞌuchuyachin.

2014 huatamanta callarishpaca 70 yalli cantocunatami grabashcacuna. Tucui caicunamantaca shuj cantotaca 500 yalli shimicunapimi uyai tucunchij. Tal vez canca cashna nishpa tapuringuichari: “¿Cai cantocunataca ima shinataj rurancuna? ¿Picunataj caicunata rurancuna?”.

¿Cantocunataca ima shinataj ruranchij?

JW Broadcastingpi llujshishca cantocunata, shujtaj cantocunatapish Equipo de Música de Servicios de Audio y Videopi sirvij huauqui panicunami rurancuna. Paicunataca Cuerpo Gobernantemanta Comité de Enseñanzapi sirvij huauquicunami ayudan. Cai Equipo de Música nishcapica 13 huauqui panicunami tucuita organizashpa, cantocunata rurashpa, musicacuna alli uyarichun revisashpa, shujtaj minishtirishca cosascunatapish rurashpami trabajancuna. Comité de Enseñanzamanta huauquicunaca chꞌican chꞌican ladocunamanta huauqui panicunatami cai trabajopi ayudachun aprobashca. Cai huauqui panicunapurapica cantocunapaj letracunata escribijcuna, musicocuna, cantantecunami tiyan. Paicunaca paicunapaj yachashcahuanmi ayudancuna. Pero paicunata jatunyachichunca mana munancunachu.

¿Cantocunataca ima shinataj rurancuna? Puntapica, Comité de Enseñanzamanta huauquicunami Bibliamanta huaquin versocunapi yuyashpa, shinallataj imata yachachisha nishcapi yuyashpami cantocunata escribichun mañancuna. Chai qꞌuipaca Equipo de Musicamanta huauquicunami maijan musicapaj tonota rurana cashcata, shinallataj maijan letracunata escribina cashcatami agllancuna. Punta grabacionta rurajpimi Comité de Enseñanzamanta huauquicunaca chai cantota allichina cashcata o mana allichina cashcata ricuchincuna. Qꞌuipaca Equipo de Musicamanta huauquicunami cambiocunata allichishpa grabancuna. Cai cantocunataca sucursalcunapi, mana cashpaca huauqui panicunapaj huasicunapimi grabancuna.

Cantocunata rurangapaj, grabangapajpish huauquicunaca audio digital programacunata, musicata escribingapaj programacunata, biblioteca de audio programatapishmi utilizancuna. Shinallataj instrumentos musicalescunata, mezcladores de sonido nishcacunata, amplificadorcunata, parlantecunata, microfonocunatapishmi utilizancuna. Cada microfonomi 100-manta 1.000 dólares yallitapish valin. 2020 huatapica 116.000 dolarcunatami grabangapaj equipocunapi gastarcacuna.

¿Pero ama tanto cullquita gastangapajca imatataj rurancuna? Betelmanta Equipo de Musicapi achca huauqui panicunata charinapaj randica chꞌican chꞌican ladocunamanta huauqui panicunataca paicunapaj huasimantallataj ayudachunmi mañancuna. Shinallataj achca musicocunata tandachishpa grabanapaj randica computadorapi programacunata utilizashpami cantocunata grabancuna.

“Cantocunami ñucataca achcata ayudashca”

Huauqui panicunaca cantocunata uyanatami achcata munancuna. Por ejemplo, Alemania llajtamanta pani Taraca: “Dimastij preocupada cajpica cantocuna tranquila sintirichunmi ayudashca. Ñuca propio shimipi uyashpaca Jehová Dios ñucata ugllacushcatami sintini” ninmi. Kazajistán llajtapi causaj huauqui Dimitrica: “Cai cantocuna Bibliamanta japishca cashcamantami mana preocuparishpa tucuita uyanilla. Ashtahuanpish Diospaj munaita rurana yuyailla cachunmi ayudan” ninmi.

Sudáfrica llajtamanta pani Deliaca cantocunata uyashcamanta ima shina sintirishcatami parlan. Paica: “Cantocunami ñucataca achcata ayudashca. Llaquicunahuan cajpi, llaquilla sintirijpi siempremi shuj canción ñucata ayudashca. Maijan ratocarin tonocunata uyashcallahuanmi cushilla sintirini” ninmi.

Achcacunaca huaquin cantocunatami ashtahuan uyanata munancuna. Sudáfrica llajtamanta huauqui Leratoca cashnami nin: “Ñallami paraisopi causashun, shinallataj Paraisopi yuyashpami cushicunchij nishca cantocunata uyashpaca ñuca mamita cutin causarina cashcatami yuyani. Cutin cutin uyashpaca paraisopi ñuca mamita rigrata pascashpa ñucata ugllangapaj shamucushcatami yuyani”.

Sri Lanka llajtamanta shuj jovencitata ima shina shuj canto ayudashcata ricushun. Paica cashnami nin: “Ñuca profesoraca tucuicunapaj ñaupajpimi ñucataca testigo de Jehová cashcamanta sinchita rimarca. Chaimanta achcata mancharishpami mana imata ni tucurcani. Ñuca huasiman chayajpica ñuca mamaca Fuerte tú serás nishca cantotami uyachun animarca. Cai cantomi ñucataca ashtahuan investigachun, shinallataj ima ninatapish alli yachachunmi ayudarca. Cayandij punllaca ñuca profesorahuanmi parlanacurcani. Ñucata alli uyashpami, “cunanmi cambaj crishcacunata alli intindini” nirca. Jehová Diospaj organización ñucanchijta animangapaj sumaj cantocunata rurashcamantaca achcatami agradicini”.

¿Ima cullquicunahuantaj cai cantocunataca ruranchij? Cancuna donate.jw.org paginapi ricuchishca shina shungumanta cullquita cushcamantami cai cantocunata rurashcanchij. Chaicunamantami achcata agradicinchij.