Jehová Diosca sordocunamantaca mana cungarinchu

Jehová Diosca gentecuna ima discapacidadta charijpipish paimanta, paipaj Gobiernomanta yachachunmi munan (1 Timoteo 2:3, 4). Chaimantami testigo de Jehovacunaca tucui gentecuna Bibliata yachachun tucui laya shimicunapi traducishcacuna. Sordocunapajpishmi señas shimipi Bibliata traducishcacuna. Ñucanchij organizacionca achca publicacioncunatami videocunapi sordocunapaj llujchishca. Cai videocunaca 100 yalli señas shimicunapimi tiyan.a ¿Videocunata grabangapaj, gentecunaman chayachingapajca imatataj ruranchij? ¿Videocunata grabangapajca ima shinataj mejorashpa catishcanchij?

¿Señas shimipica ima shinataj videocunata grabanchij?

Mundo enteropimi señas shimicunapi traducingapajca chꞌican chꞌican grupocuna tiyan. Puntapica traductorcunaca cada publicacionta traducingapajmi alli intindincuna. Qꞌuipaca señas shimiman ima shina traducinatami alli yuyancuna. Ultimoca chai publicaciontami videopi grabancuna. Librocunata o revistacunata señas shimipi traducingapajca 60 grupocunami traducishpa siempre ayudan. Cutin 40 grupocunaca huaquinllapimi traducishpa ayudan.

Sarun huatacunapica señaspi videocunata grabanaca achca cullquimi minishtirishca. Chai videocunata grabangapaj equipocunaca yalli valijmi carca. Huaquin videocunataca shuj estudio de grabacionpimi grabaj carcanchij. Shinallataj cabina de grabación mana tiyajpica chaicunatapishmi ruraj carcanchij. O hasta shuj huasitapishmi shayachina tucurcanchij. Traducij huauqui panicunaca cai videocunata grabangapajca achca equipocunatami minishtircacuna. Chai equipocunaca 30 mil dólaresb yallipishmi valij carca.

Ñucanchij organizacionca shungumanta cushca cullquita alli utilizangapajca videocunata asha tiempollapi grabangapajmi mejorashpa catishca. Grabangapajca mushuj equipocunatami utilizacunchij. Caicunaca baratolla, alli equipocunami can. Cunanca grabana huasicunata ruranataca ña mana minishtinchijchu. Traducijcunaca paicunapaj oficinacunapi verde pantallata churashpami grabancuna. Shuj videopi huaquin huauqui panicuna minishtirijpica paicunapaj oficinacunamanta o paicunapaj huasicunallamantatajmi grabai tucuncuna.

Shinallataj traducijcunata ayudangapajca huaquin programacunatami rurashcanchij. Cunanca señas shimipi publicacioncunataca asha tiempollapimi llujchinchij. Cai programacunamantami huauqui panicunaca achcata agradicincuna. Alexánder shuti huauquica: “Cunanca señas shimipi videocuna ratopi llujshishcamantami cada punlla shuj videota ricuni” ninmi.

Cunan punllacunapica videocunata grabangapaj equipocunaca 5 mil dolaresllami valin. Chaimanta videocunataca achca señas shimipimi llujchi tucunchij.

¿Sordocuna señas shimipi videocunata ricuchunca imatataj rurashcanchij?

Shuj publicacionta grabashca qꞌuipaca sordocunamanmi chayachinchij. Ñaupa huatacuna huashaca grabacioncunataca shuj compañiamanmi cachaj carcanchij. Chai compañiami grabacioncunataca videocasetepi, CD-pi copiacunata rurajcuna carca. Chai qꞌuipaca congregacioncunamanmi cachajcuna carcanchij. Tucui caicunata rurangapajca achca tiempo, cullqui, fuerzasmi minishtirirca. 2013 huatallapimi CD-pi copiacunata rurangapajca 2 millones yalli dolaresta gastarcanchij.

Sordocunaca cai videocunata charishpaca cushillami sintirircacuna. Shinapish cai videocunata utilizangapajca huaquinpica mana facilchu carca. Huaquinpica Bibliapaj shuj librollapajca achca CD-cunami minishtirirca. Brasilmanta Gilnei shuti huauquica: “Bibliamanta shuj versota mashcasha nishpaca chai verso ima CD-pi cashcatami ricuna carcanchij. Chaita ruranaca sinchimi carca” ninmi. Señas shimipi videocunata utilizaj Rafayane panica cashnami nin: “Bibliata estudianaca sinchimi carca. Shuj versota mashcangapaj o referenciacunata mashcangapajca achca tiempomi minishtirirca”. Huauqui panicunaca predicanaman rishpapish CD-cunata, videocasetecunata apashpami rijcuna carca. Shinallataj uyasha nij gentecunaman cai videocunata ricuchingapajca paicunapaj televisionta mañashpami ricuchijcuna carca. Maijan huauqui panicunaca cai videocunata ricuchingapajca paicunallatajmi paicunapaj DVD-cunata apashpa rijcuna carca. Qꞌuipaca pantallata charij DVD-cunami tiyai callarirca. Caicunata apana, utilizanaca jahuallami carca. Estados Unidospi causaj Bobby huauquica: “Predicacushpaca CD-pi shuj textota ricuchishca huashaca, qꞌuipaca shuj textota ricuchinata munashpapish shujtaj CD-tami churana carcanchij. Chaimanta Bibliata utilizanaca mana jahuallachu carca” ninmi.

2013 huatapimi Jehová Diospaj organizacionca JW Library Sign Language nishca aplicaciontami llujchirca. Cai aplicacionpimi huauqui panicunaca señas shimipi videocunataca paicunapaj celularcunapi, tabletcunapi descargashpa ricui tucurcacuna. Callaripica señas americanopimi tiyai callarirca. Qꞌuipaca 2017 huatapimi Diospaj organizacionca tucui señas shimipi tiyachun JW Library Sign Language aplicaciontaca actualizarca. Muyundij allpapi caj huauqui panicunaca cushillami sintirircacuna. Brasilmanta Juscelino shuti huauquica: “Cuerpo Gobernantepi sirvij huauquicuna sordocunata mashnata cꞌuyashcata ricushpaca cushillami sintirircani. Paicunaca rimanata yachaj shujtaj gentecuna shina sordocunapish Bibliamanta yachachunmi munan. Cai aplicacionca Bibliata ashtahuan estudiachunmi animashca”.

Cunanca jw.org paginapi, JW Library Sign Language aplicacionpimi señas shimipi tucui videocunata llujchinchij. Señas shimipi videocunata llujchingapajca ña mana tanto demoranchijchu. Ashtahuanpish ashalla punllacunapimi traducinchij, grabanchij, qꞌuipaca llujchinchij. Huaquinpica señas shimipi videocunaca shujtaj shimicunapi tiyaj videocunahuanmi igual llujshincuna.

Señas shimita parlaj huauqui panicuna ima nishcata ricui. Klízia shuti panica: “Ñucanchij organizacionllami señas shimita parlaj gentecunamanta preocuparin. Chaimi espiritualmente alli cachunca achca publicacioncunata llujchishca. Cai mundopica Jehová Diospaj organización shinaca shujtajca mana tiyanchu” ninmi. Vladimir huauquica: “Cai videocunaca Jehová Dios tucui gentecunata cꞌuyashcatami ricuchin” ninmi.

Señas shimipi llujshishca videocunapica cashnami nin: “Tucui muyundij Allpapimi Bibliamanta yachachinchij. Cai laya videocunata rurangapajca gentecunami shungumanta cullquita cushpa ayudan”. Cancuna shungumanta cullquita cushcamantami achcata agradicinchij. Huaquincunaca cai contribucioncunataca donate.jw.org paginaman yaicushpami cuncuna. Chashnami señas shimipi, shujtaj shimicunapipish Bibliacunata, Bibliata yachangapaj publicacioncunatapish rurai tucushcanchij.