Alli huillajcuna tucushunchij: Bibliamanta yachacuj cambiota mana rurajpica saquinami canchij

¿IMAMANTATAJ MINISHTIRISHCA CAN? Bibliapica: “Jehová Diospaj shutita nijcunami tucuicuna quishpiringacuna” ninmi (Ro 10:13, 14, NM). Pero Bibliamanta yachashpapish mana tucuicunachu Dios mandashca shina causanata munancuna. Chaimanta pipish Diosta sirvingapaj paipaj causaipi cambiota ruranata munajcunaman yachachishpaca, ñucanchij valishca tiempotami alli utilizacunchij. Shinapish Bibliamanta yachacuj shuj tiempota yachashca jahua paipaj causaipi ni ima cambiota mana rurajpica saquinami canchij. Chaipaj randica Jehová paipajman, paipaj puebloman pushamucuj gentecunamanmi yachachina canchij (Jn 6:44). Pero qꞌuipata chai saquishca yachacuj paipaj causaipi cambiota rurajpi, Bibliamanta cutin yachanata munajpica cushicushpa yachachishpa catishunllami (Hch 13:48).

¿IMA SHINATAJ CHAITA RURAI TUCUNCHIJ?

• Diospaj Shimita alli yachanata munashcamanta yachacujta felicitai (1Ti 2:4).

• Bibliapi pai yachacushcata pajtachina importante cashcata ni (Lu 6:46-49).

• Tarpuj runamanta Jesús parlashca chꞌimbapuraimanta cꞌuyaihuan parlai. Qꞌuipaca Bibliamanta pai yachacushcata pajtachichun ima jarcacushcapi yuyachun mañai (Mt 13:18-23).

• Alaja shimicunahuan imamanta ña mana yachachishpa catinata explicai.

• Huaquinpi visitashpa o telefonopi cayashpa catinata ni. Shinallataj pai imata yachacushcata pajtachingapaj esforzarijpica Bibliamanta cutin yachachinata callari tucushcata ni.

VIDEOTA RICUSHCA QꞌUIPACA CAI TAPUICUNATA CUTICHI:

• ¿Cai parlanacuipica Bibliata yachacuj paipaj causaipi cambiota mana ruracushcataca imataj ricuchirca?

• ¿Yachachijca ima shinataj Bibliata yachacuj cambiota rurana cashcata intindichun ayudarca?

• ¿Ima shinataj yachachijca, yachacuj cutin yachangapaj munajpica cushicushpa yachachingapaj listo cashcata intindichirca?