Israel llajtata Salomón mandai callarijpimi Jehová Diosca: “Can ima munashcata mañailla” nirca. Salomonca: ‘Experienciata mana charij joven cajpipish ñucataca rey cachunmi churashcangui. Cambaj pueblota alli pushangapaj alli yachaita cuhuai’ nircami. Chaimi Diosca: ‘Chashna mañashcamantami canmanca alli yachaita cusha. Can shina yachajca pi mana tiyangachu. Achca charinacunatapishmi cusha. Ñucata cazujpica achca huatacunata causachunmi saquisha’ nirca.

Salomonca orohuan, platahuan, caspihuan, achca valij rumicunahuanmi Diospaj huasita rurai callarirca. Achca cꞌaricunapish, huarmicunapishmi paicuna yachashcahuan trabajarcacuna. Diospaj huasitaca siete huatacunapimi tucuchircacuna. Ña chai huasita Diospaj maquipi mingana punlla chayajpimi altar jahuapi ofrendacunata churarcacuna. Qꞌuipaca Salomonca altar ñaupajpi cungurishpami Diostaca: ‘Ñuca Jehová Dioslla ¡Ñuca shayachishca huasicarin maitashi pajtanga! Cunanca ñucanchij mañashcata, ñucanchij adoracionta chasquihuai’ nishpa mañarca. ¿Diosca chai huasitaca chasquircachu? ¿Salomón mañashcataca uyarcachu? Ari. Salomón mañashca qꞌuipaca jahua pachamanta nina shamushpami altar jahuapi tiyacuj ofrendacunata rupachirca. Chashnami Diosca chai huasita chasquishcata ricuchirca. Israelitacuna chaita ricushpaca achcatami cushicurcacuna.

Salomón yachaisapa cashcataca tucui ladocunapimi yachaj chayarcacuna. Israelitacunaca paicunapaj problemacunata allichichunmi paipajman rijcuna carca. Saba llajtamanta reinapishmi sinchi tapuicunata rurangapaj rirca. Salomón paipaj tapuicunata cutichijpica: ‘Can alli yachaj cashcata tucui uyashcapish ciertomari cashca. Shinapish ñuca propio ñahuicunahuan ricungacamaca manataj crircanichu. Cambaj Jehová Diosmi bendiciashca’ nircami. Israelpica tucuicunami cushilla alajata causacurcacuna. ¿Pero chashnachu causashpa catircacuna?

Salomón Jehovata adorashpa causacun punllacunapica Israel llajtapica cushi causaimi tiyarca. Pero paica shujtaj llajtamanta huarmicunahuanmi cazararca. Paicunaca yanga dioscunatami adorajcuna carca. Salomonca asha ashami chai dioscunata adorai callarirca. Chaimi Diosca pꞌiñarishpa paitaca: ‘Cambaj gobiernota quichushpami ishquipi chaupishpa canta sirvijcunamanta shuj runaman cusha. Ashtahuan jatun partetaca canta sirvijmanmi cusha. Cambaj familiaca uchilla partellatami mandanga’ nirca.

Qꞌuipaca Diosca pai nishcata tucuicuna intindichunmi caita rurarca. Salomonta sirvij Jeroboán shuti runami ñanta ricushpaca Ahíya shuti profetahuan tuparca. Chai profetaca jahua churanata surcushpami 12 partecunapi lliquishpa Jeroboantaca: ‘Jehová Diosca Salomonpaj maquimanta gobiernota quichushpami ishquipi chaupigrin. Chunga pedazocunahuanca can saquiri. Canmanmi chunga familiacunata mandachun cunga’ nirca. Salomón chaita yachaj chayashpaca Jeroboanta huañuchisha nirca. Chaimantami Egiptoman miticushpa rirca. Salomón huañujpimi paipaj churi Rehoboam mandai callarirca. Chaimi Jeroboanca mana manchashpa Israelman tigrarca.

Israelitacunata pushajcunaca Rehoboamtaca: ‘Chai gentecunata can alli tratajpica paicunaca siempremi canta sirvingacuna’ nircacunami. Pero Rehoboampaj joven amigocunaca: ‘Israelitacunataca llaquichinami cangui. Ashtahuan sinchitami trabajachina cangui’ nircacunami. Paipaj amigocuna nishcata uyashpami gentecunataca llaquichirca. Chaimi gentecunaca Rehoboamta mana cazushpa diez familiacunata mandachun Jeroboanta churarcacuna. Diez familiacunataca Israel llajta nishpami shutichirca. Rehoboamta cazuj ishqui familiacunataca Judá llajta nishpami shutichirca. Chashnami Israelpi tiyaj 12 familiacunaca chaupirirca.

Jerusalentaca Rehoboammi mandacurca. Chaimi Jeroboanca israelitacuna Jerusalenpi Jehovata adoranaman richunca mana munarca. ¿Imamanta? Jeroboanca gentecuna paita mana cazushpa Rehoboamta cazunatami mancharca. Chaimantami ishqui oro bizicunata rurashpa israelitacunataca: ‘Jerusalenca yallitaj carumi. Caillapitaj cai bizicunata adoraichijlla’ nirca. Israelitacunaca pai nishcata cazushpami Jehová Diosta cutin cungarircacuna.