Pandemia manaraj tiyajpimi huaquin construccioncunata tucuchircanchij

Tucui huatacunami achca gentecuna bautizarin. Chaimantami Jehová Diosta adorangapaj ashtahuan Tandanacuna Huasicunata, sucursalcunata, Oficina de Traduccioncunata minishtinchij. Chaita ricushpami muyundij Allpapi tiyaj departamentos locales de Diseño y Construccionpi sirvijcunaca 2.700 yalli Diosta adorana lugarcunata shayachinata o allichinata yuyarcacuna. Chaicunataca año de servicio 2020-pimi ruranata yuyarcacuna.a

Pandemia ricurishcamantami huauquicunaca paicuna yuyashca shinaca mana tucuita rurai tucurcacuna. Huauqui panicunapaj saludta cuidangapaj, autoridadcuna mandashcacunata cazungapajmi Comité de Publicación del Cuerpo Gobernantepi sirvij huauquicunaca achca proyectocunata ña ama rurashpa catichun jarcashcacuna. Shinapish septiembre de 2019-manta pandemia manaraj callari punllacunacamaca 1.700 yalli Diosta adorana huasicunatami shayachircacuna o allichircacuna. Shinallataj sucursalcunapica 100 yalli proyectocunatami tucuchircacuna. Ishqui proyectocunata ima shina tucuchishcata, huauqui panicuna ima shina beneficiarishcata ricushun.

Camerún llajtapi saquirij sucursal. Ñaupa sucursalca Duala nishca ciudadpimi saquirirca. Chai sucursalca uchillami carca y allichinapishmi minishtirirca. Comité de Publicacionpi sirvij huauquicunaca chai sucursalta allichinatami yuyarcacuna. Pero dimastij preciomi valigrirca. Shinallataj shujtaj lugarpi sucursalta ruranatami yuyarcacuna. Mana cashpaca shuj edificiota randishpa chaita allichinatami yuyarcacuna. Pero paicuna yuyashca shinaca mana rurai tucurcacunachu.

Shinapish huauquicunaca autoridadcuna Duala ciudad janaj ladota shuj carreterata llujchigrishcatami yachaj chayarcacuna. Chai carreteraca ñucanchij Jatun Tandanacuna Huasi cꞌuchullatami pasagrirca. Chaimi sucursalman chayanaca jahualla cagrirca. Shinallataj yacupish, luzpishmi tiyagrirca. Huauquicunaca chaicuna tiyachunmi minishticurcacuna. Chaimantami Cuerpo Gobernantemanta huauquicunaca Jatun Tandanacuna Huasipaj shuj allpapi mushuj sucursalta rurachun aprobarcacuna.

Huauquicunaca chai sucursalpaj huaquin partecunata rurachunca shuj empresatami contratarcacuna. Chaimi tiempota, cullquitapish ahorrai tucurcacuna. Dos millones yalli dolarescunatami ahorrarcacuna. Betelpi sirvij huauqui panicunaca pandemia manaraj tiyajpimi chai mushuj sucursalman pasarcacuna.

Cunanca Camerún llajtapi sirvij betelitacunaca alaja lugarcunapimi causancuna, trabajancuna. Paicunapajca chai mushuj sucursalca Dios cushca regalomi can. Shuj cusa huarmica: “Cunanca ashtahuanmi trabajasha ninchij. Cai sucursalta valorashcatapishmi ricuchisha ninchij” nincunami.

Mexicopi saquirij Oficina Remota de Traducción de tojolabal. Cai tucui huatacunatami tojolabal shimiman traducij huauqui panicunaca sucursal de Centroamericapi trabajajcuna carca. Chai sucursalca Ciudad de México cꞌuchullapimi saquirin. Shinapish tojolabal shimitaca Altamirano y Las Margaritas nishca pueblocunapimi ashtahuantajca parlancuna. Chai pueblocunaca sucursalmanta casi 1.000 kilómetros carumanmi saquirincuna. Chaimantami traductorcunaca tojolabal shimita parlajcuna punllanta ima shina parlashcataca mana yacharcacuna. Shinallataj sucursalpi sirvij huauquicunapajca traduccionpi ayudachun, audiocunata grabashpa ayudachun pita cayanaca sinchimi carca.

Chaita ricushpami Cuerpo Gobernantemanta Comité de Redaccionpi sirvij huauquicunaca traductorcuna tojolabal shimita parlajcuna causan lugarman richun decidircacuna. Chaipajca sucursalmanta huauquicunaca shuj edificiota randishpami allichircacuna. Chaita ruranaca mushuj oficinacunata shayachinata o alquilanata yalli baratomi carca.

Shuj traductor huauquica ima shina sintirishcatami parlarca. Paica: “Cai 10 huatacunatami sucursalpica traducishpa ayudashcani. Pero chai tucui huatacunataca tojolabal shimita parlaj ni shuj familiata mana tarircanichu. Pero cunanca ñucanchij Oficina de Traduccionca tojolabal shimita parlajcuna causan lugarpimi can. Tucui punllacunami tojolabal shimita parlaj gentecunahuan parlai tucuni. Chaimi mushuj palabracunata yachashcani. Y chaica achcatami ñuca trabajopi ayudahuashca” ninmi.

Año de servicio 2021 huatapaj proyectocuna

Año de servicio 2021 huatapajca ima jarcaicuna mana tiyajpica 75 Oficinas de Traduccionpi proyectocunatami pajtachisha ninchij. Shinallataj Escuelas Bíblicas nishcapaj huasicunapimi huaquin proyectocunata charinchij. Shinallataj chꞌican chꞌican sucursalcunapimi 8 proyectocunapi trabajashpa catishun. Shuj proyectoca Nueva York llajtapi saquirij Rámapo pueblopimi can. Argentinapi, Italiapi saquirij sucursalcunataca shujtaj lugarcunaman pasachinatami yuyancuna. Shinallataj 1.000 yalli Tandanacuna Huasicunata shayachinami minishtirin. Cutin 6.000 yalli tandanacuna lugarcunataca cambianami minishtirin. Shujtaj 4.000 Tandanacuna Huasicunataca mushujyachinami minishtirin.

¿Cai tucui proyectocunata rurangapajca cullquica maimantataj llujshin? Comité de Sucursal de Centroamericapi sirvij huauqui Lázaro Gonzalezmi cai tapuita cutichin. Oficina de Traducción de tojolabalmanta parlashpaca paica: “Ñucanchij sucursalpaj territoriopi causaj huauqui panicunaca mana tanto cullquita charincunachu. Pero muyundij Allpapi causaj huauqui panicuna shungumanta cullquita cushcamantami runacuna parlashca shimiman traducingapaj oficinacunata rurai tucushcanchij. Traductorcunatapish paicuna parlashca shimita parlajcuna causan lugarcunamanmi cachai tucushcanchij. Huauqui panicunataca chashna ayudashcamantami achcata agradicinchij” ninmi. ¿Ricurcanguichu? Chai tucui proyectocunataca obra mundialman shungumanta cullquita cushpa ayudashcamantami rurai tucushcanchij. Achca huauqui panicunaca donate.jw.org paginapimi chai cullquita cachancuna.