Perdonaj cai

PATRICIA SHUTI HUARMICA: “ÑUCA UCHILLA CAJPICA ÑUCA FAMILIACA PꞌIÑANACUSHPALLA CꞌAMINACUSHPALLAMI CAUSAJCUNA CARCANCHIJ” NINMI. Chaimantami paica perdonanata mana yachaj carca. Ña jatun cashpapish paita pꞌiñachijcunata mana perdonai tucushpami dormitapish mana dormi valirca. Pꞌiñanacushpalla causashpaca llaquillami causashun. Ashtahuancarin ñucanchij saludtami dañashun. Cientificocuna nishca shinaca mana perdonajcunaca:

• Rato pꞌiñarij cashcamantami shujtajcunahuan mana apanacui pudincuna. Chaimantami paicuna solo, llaquilla sintirincuna.

• Imamantapish ratomi culirancunalla. Chaimantami yallitaj sustarishpa causancuna. Huaquinpicarin depresión ungüitami chari tucuncuna.

• Paicunapaj llaquichishcacunallapi cutin cutin yuyashpami causancuna.

• Paicunapaj yaya mama yachachishcata huashaman saquicushcatami sintincuna.

• Estrés, presión alta, artritis ungüicunatami chari tucuncuna. Shinallataj uma nanai, shungu nanai ungüicunatapishmi chari tucuncuna.a

PERDONAJCUNA CANGAPAJCA ñucanchijta llaquichijcunamantaca mana culirashpa, mana pꞌiñarishpallachu causana canchij. Paicuna ñucanchijta llaquichishca layallataj mana llaquichinachu canchij. Huaquinpica ñucanchijta llaquichijcunahuanca culirangapajca razontami charishun. Pero, razonta charishpapish paicunahuan culiranapaj randica, alli apanacunata munashpami paicunataca perdonana canchij. Chashna alli apanacushpaca sumajtami causashun.

Juchayujcuna cashcamantami huaquinpica imata rurashpa o imata nishpapish shujtajcunata llaquichi tucunchij. Chaimantami shujtajcuna ñucanchijta llaquichijpipish perdonana canchij (Romanos 3:23). Bibliapica: “Maijan caishujta pꞌiñashpa juchachijpica, caishuj chaishuj ahuantanacushpa, perdonanacuichij” ninmi (Colosenses 3:13).

‘Cꞌuyaimi tucuicunata shujllata ruran’ (Colosenses 3:14). Perdonajcuna cashpaca shujtajcunata cꞌuyashcatami ricuchishun. Clínica Mayo nishca shinaca perdonanata yachashpaca:

• Ñucanchijta llaquichijcunataca llaquishpami tratashun. Shinallataj tucuicunahuanmi alli apanacushun.

• Cushilla, tranquilomi sintirishun.

• Imamantapish mana yallitaj sustarishunchu. Mana rato culirashunchu.

• Mana tanto llaquicunata o ungüicunata charishunchu.

PANDARISHPAPISH ÑAUPAJMAN CATI. Saludmanta parlaj shuj revistapica, ‘ñucanchij pandarishcacunallapi yuyanata saquinaca sinchimi can. Shinapish chai yuyailla causashpaca ñucanchij saludtami dañashun’ ninmi. ¿Pandarishcacunamanta ama yallitaj culpable sintiringapajca imatataj rurana cangui?

• Canpish shujtajcuna layallataj pandarij cashcataca mana cungarinachu cangui (Eclesiastés 7:20).

• Imapi pandarishcallapitaj ama cutin urmangapaj esfozari.

• Pꞌiñarina, resentirina yuyaicunata saquinaca sinchimi can. Pero chashna yuyaicunata ama charingapajmi sinchita esforzarina cangui (Efesios 4:23, 24).

• Alli amigocunata mashcai, paicunami can alli yuyaicunata charichun ayudanga. Shinallataj can imapi cambiana cashcatami amigocunaca mana llullashpa ninga.

• Pita llaquichishpaca perdontami chai rato mañana cangui. Perdonta mañashpaca canllatajmi tranquilo causangui.

BIBLIAPAJ MANDASHCACUNATA CAZUNACA ALLIMI CAN

Ñaupaman parlashca Patricia huarmica Bibliata yachashpami perdonanata yacharca. Paica: “Perdonanata mana yachashcamantami llaquilla causarcani. Shinallataj shujtajcunatapish ñuca rimashcahuan rurashcahuanmi llaquichij carcani. Cunanca Bibliata yachashcamantami shujtajcunata perdonashpa tranquila causani” ninmi.

Ron runapish Bibliapi yachashcacunata pajtachishpami tranquilo causan. Paica: “Shujtajcuna ñucata alli tratachunca mana obligai tucurcanichu. Pero, ama rato pꞌiñaringapaj, shujtajcunata alli tratangapajmi esforzari callarircani. Pihuanpish mana resentirishpa causashcamantami cunanca tranquilo causaita charini” ninmi.