¿COSASCUNA CARUYAJPICA IMATATAJ RURASHUN?

Charishcallahuan cushilla cai

Charishca cosascunallahuan causajcunaca cushillami sintirincuna. Cambiocuna tiyajpipish paicuna ganashca cullqui pajtachunmi achcata esforzarincuna.

¿CAICA IMAMANTATAJ IMPORTANTE CAN?

Psicóloga Jessica Koehlerca ima minishtishcallahuan causaj gentecuna cushilla cajta, mana envidiaj cajtami cuentata curca. Shinaca cushilla causaj gentecunaca mana tanto estresarincunachu. Mundo enteropica ashallata charij gentecunami ashtahuan cushilla causan. Paicunaca achca cullquita charinata mashcanapaj randica familiahuan, amigocunahuan pasanatami achcata munancuna.

“Micunata, churanata charishpaca chaicunallahuan cushilla cashunchij” (1 Timoteo 6:8).

¿IMATATAJ RURAI TUCUNGUI?

Shujtajcunahuanca ama compararichu. Minishtirishca cosascunallata charishpaca achcata charij gentecunahuanchari comparari callaringui. Chaita rurashpaca canllatajmi llaquilla sintiringui. Paicunatapishmi envidiangui. Huaquin gentecunaca achcata charishpapish yallitaj dibiyashpami causancuna. Senegal llajtamanta Nicole shuti huarmica: “Cushilla causangapajca mana achcata minishtinichu. Shujtajcuna ñucatapish yalli ashtahuan charijpipish ñuca imata charishcallahuanmi contenta cani” ninmi.

Caita rurai: Huaquin gentecunaca mashna cullquita charishcata, caro cosascunata randishcata ricuchunmi redes socialespi churancuna. Paicuna imata churashcataca ama ricuichu.

“Shuj runa achcata charijpipish, chai charishcacunaca causaitaca mana cunchu” (Lucas 12:15).

Agradecido cai. Agradicinata yachaj gentecunaca imalla charishcacunahuanmi cushilla sintirincuna. Paicunaca imata ashtahuan minishtishcataca mana yuyancunachu. Shujtajcuna imata cuchunpish mana shuyancunachu. Haití llajtamanta Roberton shuti runaca: “Ñucamanta, ñuca familiamantapish shujtajcuna imata rurashcata yuyangapajmi tiempota surcuni. Chai qꞌuipaca paicunatami agradicini. Shinallataj ocho huatacunata charij ñuca huahuamanmi paiman imata cujpica agradecido cana cashcata yachachini” ninmi.

Caita rurai: Imacunallamanta agradecido cashcata ricuchingapajca cada punlla shuj cuadernopi escribi. Por ejemplo, alli saludta charishcamanta, familiahuan tandalla causacushcamanta, alli amigocunata charishcamanta, alajata inti huashicujta ricushcamanta agradecido cai.

“Cushicui shunguhuan causajpajca, punllanta jatun micuita rurashca shinami” (Proverbios 15:15).

Ashalla cosascunata charishpa cushilla causana mana fácil cajpipish minishtirishcalla cosascunata charishpaca cushillami causai tucungui. Cushilla causaitaca cullquihuanca mana randi tucunguichu.