Cuerpo Gobernantepi caj huauquicunaca caitami nisha nin
Tucuimanta yallica Jehová Diosmi alli yachachij can. Paica ñucanchijpish alli yachachijcuna cachunmi munan (Heb. 5:12). Ñucanchij familiaman, congregacionpi huauqui panicunaman, shujtaj gentecunaman Diosmanta yachachinaca sumaj bendición, shuj jatun responsabilidadmi can. Shinaca, ¿alli yachachijcuna cangapajca imatataj rurana canchij?
Alli yachachijcuna cangapajca apóstol Pablo Timoteoman ima nishcatami pajtachina canchij. Paica: “Diospaj shimita ricushpa huillacui, cunacui, yachachicui. Chashna rurashpaca canllatajpish quishpiringuimi, can huillashcata uyajcunapish quishpiringami” nircami (1 Tim. 4:13, 16, QC, 1989). Bibliamanta yachachishpaca gentecuna quishpirichunmi ayudacunchij. Chaimantami Bibliata alli liyingapaj, alli yachachingapaj esforzarina canchij. Cai folletota yachashpami alli yachachijcuna tucushun. ¿Imallatataj caipica yachashun?
Cada yachaipimi shuj verso tiyan. Huaquin versocunaca shuj ejemplomantami parlan. Cutin, caishuj versocunaca shuj consejotami cun.
Jehová shina yachachijca pi mana tiyanchu (Job 36:22). Cai folletota yachashpaca alli liyij, alli yachachijmi tucungui. Pero can chashna alli yachachij cashpapish Diosmantami yachachina cangui. Pai yachachijllapimi gentecunaca paita rijsi tucunga (Juan 6:44). Chaimantami tucui punllacuna Diostaca paipaj espíritu santota cuchun mañana cangui. Yachachicushpaca siempremi Bibliata utilizana cangui. Can yuyashcata yachachinapaj randica Yaya Dios imata yuyashcatami yachachina cangui. Chashna rurajpimi canta uyajcunaca Diostaca tucui shunguhuan cꞌuyangacuna.
Jehová Diosmanta yachachinami tucuimanta yalli valishca can. Diosca paimanta huillachunca cantami agllashca. Paipaj ayudata charishpaca pai mingashcataca allimi pajtachingui (1 Ped. 4:11).
Can shinallataj Diospajta rurajcuna,
Testigo de Jehovacunapaj Cuerpo Gobernante