¿Yacharcanguichu?
¿Babilonia llajtapi tarishca ladrillocuna, shinallataj chai ladrillocunata ima shina rurashcata yachanaca Bibliapi crichunca ima shinataj ayudan?
ARQUEOLOGOCUNACA Babilonia llajtapica ñaupa tiempopi tiyaj ladrillocunatami tarishcacuna. Babiloniocunaca chai ladrillocunahuanmi huasichijcuna carca. Robert Koldewey arqueologoca cashnami nirca: “Ladrillocunata rurangapajca barro tiyaj pushtucunapimi rurajcuna carca. Chaicunapica ladrillocunata cusangapajca achca yuracunami tiyaj carca”.
Babiloniata mandajcunaca hornocunataca ladrillocunata cusangapaj utilizanapaj randica gentecunata rupachingapajmi utilizajcuna carca. Toronto universidadpi trabajaj Paul-Alain Beaulieu profesorca cashnami nin: “Gentecuna mana cazusha nishcamanta, Babiloniapi tiyaj dioscunata yangachishcamantami paicunataca rupachijcuna carca”. Shinallataj Nabucodonosorca: “Paicuna ama causashpa catichun hornopi rupachichij, nina paicunata huañuchichun” nishpami mandarca.
Cai nishcacunaca Daniel capítulo 3-pi ima nishcatami yuyachin. Chaipica rey Nabucodonosorca Babiloniapi caj Dura shuti pambapi shuj jatun estatuata shayachishcatami nin. Sadrac, Mesac y Abednegoca chai estatuata adorangapajca mana cumurircacunachu. Chaimantami rey Nabucodonosorca achcata pꞌiñarishpa: ‘Paicunata rupachingapaj hornotaca canchis cutinhuan yalli rupachishpa chaipi shitaichij’ nishpa mandarca. Pero shuj angelmi paicunataca salvarca (Daniel 3:1-6, 19-28).
© The Trustees of the British Museum. Licensed under CC BY-NC-SA 4.0. Source
Fotocuna: Cai ladrillopica Nabucodonosorpaj shutimi quillcashca can.
Babilonia llajtapi tarishca ladrillocunaca Bibliapi confiachunmi ayudan. ¿Imamanta? Chai ladrillocunapica reyta alabangapajmi: “Babiloniata mandaj Nabucodonosor. Ñucami can mandana pushtuta shayachircani. Ñucapaj huahuacunapish chaipi huiñaita mandachun” nishpa quillcashca carca. Cai shimicunaca Daniel 4:30-pi nishca layami can. Chaipica Nabucodonosor cashna nishcatami nin: “Babilonia yallitaj jatun pueblotaca ñucamari shayachircani. Mandashpa tiyana huasita chaipi shayachingapajmari ñuca tucuita rurai tucuj fuerzahuan rurarcani. Ñuca mandanaca tucuicuna ricuna jatun cachunmari rurarcani”.