¿Gentecunaca guerracunata tucuchi pudinchu?

ALLI CAUSAI

Munai: Maipica cullquimantami guerra tiyan. Chaimi gobiernocunaca tucuicuna imatapish igual charishpa alli causachun munan.

Jarcai: Gobiernocunaca mashna cullquita gastanatami alli yuyana can. Por ejemplo, 2022 huatapica gentecuna alli causachun munashpami 34.100 millones de dolaresta gastarcacuna. Pero guerrapi mashna cullquita gastashcahuan ricujpica chaica ashallami can.

“Guerra ama ashtahuan tiyachun, tucuicuna tranquilo causachunca ashalla cullquitami gastanchij. Pero guerrapi sufrishca gentecunata ayudangapajca achca cullquitami gastanchij” (António Guterres, secretario general de las Naciones Unidas).

Bibliapica caitami yachachin: Gobiernocuna, organizacioncunaca pobre gentecunatami ayudanata munancuna. Pero pobreza ama tiyachunca imata mana rurai tucuncunachu (Deuteronomio 15:11; Mateo 26:11).

PARLANACUICUNA

Munai: Gobiernocunaca macanacuicuna ama tiyachun, macanacuicuna tucurichunmi parlanacuncuna. Chashnami paicunapaj ima alli cashcata mashcancuna.

Jarcai: Gobiernocuna macanacuicuna ama tiyachun parlanacushpapish mana de acuerdo saquirincunachu. Paicuna ari nishcatapish mana pajtachincunachu.

“Ishqui llajtamanta gobiernocuna macanacuicunata tucuchingapaj parlanacushpapish qꞌuipamanca ashtahuan macanacuicunatami callarichin” (Raymond Smith, American Diplomacy).

Bibliapica caitami yachachin: Salmo 34:​14-pica: “Sumajta causanata mashcaichij” ninmi. Pero achcacunaca ‘shujtajcunamanta caruyajcuna, amigocunahuan contra tucujcuna, alli tucunata mana munajcunami can’ (2 Timoteo 3: 1-4). Chaimantami politicocunaca alli munaita charishpapish guerra ama tiyachunca imata mana rurai tucuncuna.

ARMACUNATA TUCUCHINA

Munai: Gobiernocunaca bombas nucleares nishcacunata, gases tóxicos nishcacunatami tucuchinata munancuna. Chaicunaca achca gentecunatami huañuchin.

Jarcai: Maijan gobiernocunaca poderta ña mana charinatami manchancuna o imahuan mana difindiri tucunatami manchancuna. Chaimantami armacunataca mana tucuchinata munancuna. Armacunata tucuchijpipish gentecunaca paicunapaj shungupica macanacuna munaillami causancuna.

“Achca gobiernocunaca 1991 huatapi guerra tucurishca qꞌuipaca macanacuna armacunatami tucuchishun nircacuna. Shinallataj guerracuna ama tiyachun, llajtacuna alli apanacuchun, tucuicuna tranquilo causachunmi ayudashun nircacuna. Chaitaca mana pajtachishcacunachu” (Securing Our Common Future: An Agenda for Disarmament [Asegurar nuestro futuro común: una agenda para el desarme]).

Bibliapica caitami yachachin: Guerra ama tiyachunca gentecunaca paicunapaj espadacunataca yapuna rejata shinami rurana can (Isaías 2:4). Pero mana chaillatachu rurana can. Ashtahuanpish paicunapaj shungumantami shujtajcunahuan pꞌiñanacuna yuyaita anchuchina can (Mateo 15:19).

SHUJLLA SHINA CANAMANTA

Munai: Gobiernocunaca shuj enemigo paicunapaj llajtahuan macanacui callarijpica shujtaj llajtamanta gobiernocunami ayudanga nishpami yuyancuna. Chaimantami enemigocuna ama llaquichichunca tauca gobiernocuna shuj shinalla tucunata yuyarincuna.

Jarcai: Gobiernocunaca enemigocuna llaquichinaman shamujpi paicunahuan ima shina macanacunataca mana alli yuyarincunachu. Paicuna imata parlanacushcatapish mana pajtachincunachu. Chaimantami gobiernocuna tandanacushpami macanacushun nishcallamantaca tranquilo causaica mana tiyan.

“Sociedad de Nacionespish, Naciones Unidaspish guerracuna ama tiyachunmi gobiernocuna shuj shinalla tucuchun ayudasha nishcacuna. Chashna jahuapish guerracunaca mana tucurishcachu” (Encyclopedia Britannica).

Bibliapica caitami yachachin: Gobiernocunapish, organizacioncunapish gentecunamanca tranquilo causaitaca mana cui tucuncunachu (Eclesiastés 4:12). Salmo 146:​3, 4-pica: “Mandajcunapica ama shunguta churaichu. Huañujlla runacunapipish ama shunguta churaichu. Paicunapica quishpirinaca mana tiyanchu. Paipaj samai anchujpica allpaman tigranllami. Chai punllallatajmi pai imata yuyarishcacunapish chingarin” ninmi.