Ñallami guerracunaca tucuringa

DIOSMI GOBIERNOCUNATA TUCUCHINGA

Diosca shuj macanacuipimi gobiernocunatapish, guerracunatapish tucuchinga. Chai macanacuitaca Bibliapica Armagedón ninmia (Apocalipsis 16:16). Chai punlla chayajpica Tucui poderta charij Diospaj ñaupajpimi ‘muyundij allpamanta mandajcunaca’ tandachishca cangacuna (Apocalipsis 16:14).

Diosca tucui gobiernocunata tucuchishpami jahua pachapica shuj Gobiernota churanga. Chai Gobiernoca mana nunca tucuringachu (Daniel 2:44). Chai Gobiernopi mandachunca Diosca paipaj churi Jesustami agllashca (Isaías 9:​6, 7; Mateo 28:18). Jesusca jahua pachamantami tucui gentecunata mandanga. Paica cai Allpapi cashpaca Diospaj Gobiernomantab mañachunmi paita catijcunamanca yachachirca (Mateo 6:​9, 10).

Jesusca cai pacha gobiernocuna shinaca mana cangachu. Paica cashcata ruraj rey cashcamantami tucuicunata igual tratanga. Chaimi gentecunaca ima razamanta cashpapish, ima culturamanta cashpapish, mai llajtamanta cashpapish mana sufringacuna (Isaías 11:​3, 4). Jesusca cada unomantami preocuparinga. Salmo 72:12 al 14-pica: “Huajchacuna caparijpica, paimi quishpichinga. Llaquilla caj pi ayudaj illajlla cajtapish paimi ayudanga. Paicunapaj causaitaca umashca canamanta, llaquichishca canamantami quishpichinga” ninmi. Chaimantami gentecunaca paicunapaj derechotaca mana reclamangacuna.

Diospaj Gobiernoca tucui macanacuna armacunatami tucuchinga (Miqueas 4:3). Shujtajcunata llaquichij, millai gentecunatapishmi tucuchinga (Salmo 37:​9, 10). Chaicuna tucurijpica cꞌaricunapish, huarmicunapish, uchilla huahuacunapish tranquilo causangacuna (Ezequiel 34:28).

Diospaj Gobiernopi Jesús mandacushpaca pobrezatapish, yaricaitapishmi tucuchinga. Chaimantami gentecunaca tucui laya sano micunata charingacuna. Shinallataj paicunapaj huasita rurashpami chaipi tranquilo causangacuna (Salmo 72:16; Isaías 65:​21-23).

Guerracuna tiyashcamantami gentecunaca achcata sufrincuna. Maijancunaca chugrichishcami cashcacuna. Shujtajcunaca estrés ungüita, ansiedad ungüitami charincuna. Pero Diospaj Gobiernoca tucui chai llaquicunatami tucuchinga. Huañushcacunapish cutin causarishpami cai Allpapi causangacuna (Isaías 25:8; 26:19; 35:​5, 6). Familiacunapish tandallami causangacuna. Guerracunapi “ima tucushcataca mana yuyaringacunachu” (Apocalipsis 21:4).

DIOSMI JUCHATACA TUCUCHINGA

Diospaj Gobierno cai Allpata mandacujpica tucuicunami Jehovác Diosllata adorangacuna. Paica ‘sumaj causaita cuj, cꞌuyaj Diosmi’ can (2 Corintios 13:11). Chaimi gentecunaca tranquilo causanata yachangacuna (Isaías 2:​3, 4; 11:9). Yaya Diosta cazujcunaca juchamantami quishpichishca cangacuna (Romanos 8:​20, 21).

DIOSMI SATANASTA, DEMONIOCUNATA TUCUCHINGA

Diospaj Gobiernoca Satanasta, demoniocunatami tucuchinga. Chaimantami gentecunaca macanacuna yuyaicunataca ña mana charingacuna (Apocalipsis 20:​1-3, 10). Satanaspish, demoniocunapish mana tiyajpica cai Allpapica “sumaj causaillami yallitaj tiyanga” (Salmo 72:7).

Diosca guerracunata tucuchinatami munan, chaicunata tucuchingapajpish podertami charin. Chaimantami tucui guerracunata Dios tucuchina cashcata crinchij.

• Diosca guerracunata tucuchingapajmi poderta charin. Guerracunata ima shina tucuchinatapishmi alli yachan (Job 9:4). Paipajca imapish mana sinchichu (Job 42:2).

• Diosca gentecuna sufrichunca mana munanchu (Isaías 63:9). Paica millaita ruranata cꞌuyajcunataca pꞌiñanmi (Salmo 11:5).

• Diosca pai ima nishcataca siempremi pajtachin. Paica mana llullanchu (Isaías 55:​10, 11; Tito 1:2).