Kusikusun Diospaq llamkasqanchikmanta
1. ¿Imanasqam Diosmanta willakuyninchikpi hukmanyaruchwan?
1 Diosqa runakunataqa unancharqa ‘llamkasqankumanta kusikunankupaqmi’ (Ecl. 2:24). Chaymi Diosmanta willakusqanchik munasqanchikman hina mana lloqsiptin hukmanyasqa tarikuchwan. ¿Imatam rurachwan chayna mana tarikunapaq?
2. ¿Imanasqam Diosmanta willakusqanchiktaqa mana llapallan runakunachu uyarinanku karqa?
2 Manam llapallankuchu uyarinqaku. Jesuspa willakusqanta mana achka runakuna uyariptinkupas, manamá nichwanchu Diosmanta willakuynin mana allinpi tukusqantaqa (Juan 17:4). Tarpuqmanta rikchanachisqanpim, Jesus willakurqaña achkallaña runakunapa sonqonpi Diosmanta cheqap yachachikuy mana wiñananmanta (Mat. 13:3-8, 18-22). Ichaqa qatiqninpi qawasun kallpanchakusqanchik mana yanqapaq kasqanmanta.
3. ¿Imaynanpim ruruchkaq hina kanchik runakuna mana uyariwaptinchikpas?
3 ¿Imaynatam rurunchik? Tarpuqmanta Jesuspa rikchanachisqanqa qawachinmi Diosmanta willakuyta chaskiqkunaqa ‘ruruchkaq’ hina kanankumanta (Mat. 13:23). Tarpusqanchik trigo wiñaspan poqospanqa, manamá achka kallmakunatachu mirachin, aswanqa achka muhukunatam. Cristianokunapas ruruchkaq hinaqa kanchik manam bautizakunankupaq runakunata yanapaspallachu, aswanqa muhuta mirachispanchikmi otaq Diospa Munaychakuyninmanta sapa kuti willakuspanchikmi. Chayna ‘allin rurasqanchikwanmi’ ancha kusisqa tarikunchik runakuna mana uyariwaptinchikpas. Diosmanta willakuspanchikqa yanapakuchkanchiktaqmi Jehová Diospa sutin hatunchasqa otaq chuyanchasqa kananpaq (Is. 43:10-12; Mat. 6:9). Ancha kusikunapaqmi Diospa llamkaqmasin kayqa (1 Cor. 3:9). Chaymantapas, Jehová Diosqa anchatamá kusikun sapa kuti alabasqanchikwan (Heb. 13:15, 16).
4. ¿Imaynanpim mana yachaspanchikpas ruruchkaq hina kachwan?
4 Yuyarisuntaq: wakinpiqa manamá qawasunchu Diosmanta willasqanchik imapi tukusqantaqa. Kay Pachapiraq Jesus kachkaptinqa manapaschá uyariqninkunamanta wakiqninkuqa chayllachu qatiqninkuna rikurirurqaku. Runakunapa sonqonpi Diosmanta willakuyta tarpusqanchikpas, manam chayllachu sapichakuspan wiñanqa, ichapas tiempopa risqanman hina maypipas Jehová Diospa serviqnin rikurirunman. Sutillatamá qawanchik Diosmanta willakuyninchikqa allinpi tukusqanta. Chaynaqa ruruq cristianokunayá kasunchik, qawachisuntaqyá Jesuspa qatiqnin kasqanchiktapas (Juan 15:8).