Jesusmanmi Jehova Diosqa atiyninta quykurqa imapas ñakarichiwaqninchikta chinkachinanpaq. Imapas ñakarichiwaqninchik kaqkunamanta wakintaqa manam chinkachiyta atichwanchu. Jesusmi ichaqa milagrokunata ruwaspan qawachirqa chaykunatapas chinkachiy atisqanta. Payllam ñakarichiwaqninchik kaqkunata rikurichiq huchata chinkachinanpaq atiyniyuqqa. Huchayuq kasqanchikraykumiki unqunchik hinaspa wañunchik (Mat. 9:​1-6; Rom. 5:​12, 18, 19). Milagrokuna ruwasqanwanmi yachanchik Jesusqa ima unquytapas chinkachinanpaq atiyniyuq kasqanta chaynataq wañusqakunatapas kawsarichinanpaq atiyniyuq kasqanta (Mat. 4:23; Juan 11:​43, 44). Atiyniyuqtaqmi llumpay wayra-paratapas controlananpaq chaynataq mana allin espiritukunatapas vencenanpaq (Mar. 4:​37-39; Luc. 8:2). Tukuy chaykunata ruwananpaq churin Jesusman Jehova Dios atiyninta quykusqanmanta yachaspanchikmi anchata kusikunchik. Manapunim iskayrayananchikchu Diosña kamachiptin llapa prometewasqanchik cumplikunanmantaqa. Jehova Diosmi Jesusta churarun gobiernonpi kamachiq kananpaq. Chaymi Jesusqa kay allpa pachapi kachkaspan milagrokuna ruwasqanmantapas aswan mastaraq ruwanqa hamuq tiempopiqa. w23.04 3 parrs. 5-7

Congregacionnikipi achka huñunakuspaqa ichapas makikita achka kutikama huqariptikipas mana nisunkichu rimarinaykipaq. Chayna pasasuptikiqa nirqankipaschá: “Manañam rimasaqchu”, nispa. Amayá chaywanqa hukmanyaychu. Amayá rimarinaykipaqqa hukllataqa preparakuychu aswanqa achkatayá, chaynapim punta kaq parrafokunapi mana rimarispaykipas qatiqninkunapi rimariyta atiwaq. Willakuq qillqanchikta preparakuspaykiqa sapa parrafota leespayki yuyaymanay imaynata lliw yachachikuywan tupasqanpi. Chaynapim imallatapas rimariyta atinki. Huñunakuypi rimarinaykipaqqa sasa entiendena parrafokunatapas allintam preparakuwaq. Sasa entiendena parrafokunapiqariki manam lliwchu makinkuta huqarinqaku. Chaywanpas achka semanaña huñunakuypi rimarinaykipaq yachachimuq mana nisuptikiqa huñunakuy manaraq qallaykuchkaptinmi yachachimuqta niwaq ima parrafopi rimariy munasqaykita. w23.04 21, 22 parrs. 9-10

Joseyqa chayllam Jehova Diospa nisqanta kasukuq, chayraykum allin qusa karqa. Yaqa kimsa kutipim Diosqa Joseyta kamachirqa familianta imaynata cuidananpaq, hinaptinmi Joseyqa chaylla kasukurqa paypaq sasa kaptinpas (Mat. 1:20; 2:​13-15, 19-21). Joseyqa Jehova Diosta kasukusqanraykum señoran Mariataqa allinta uywarqa. Chayraykuchá Mariaqa Joseytaqa anchata kuyarqa hinaspa astawanraq kasukurqa. Qusakuna, qamkunapas Josey hinayá bibliapa yachachikuyninkunata leeychik hinaspa qillqanchikkunata estudiaychik. Chayta ruwaspaqa familiaykichiktam allinta uywankichik. Bibliapa yachachikuyninkuna qamkunapaq sasa kaptinpas kasukuspaqa señoraykichiktam kuyachkankichik, hinaspapas casado vidaykichikpim kusisqa kankichik. Vanuatu nacionmanta 20 wataña casada iñiqmasinchikmi nin: “Qusayqa imatapas ruwananpaqqa puntatam Jehova Diospa yachachikuyninkunata sumaqta yachaykun hinaspam kasukun, chayraykum astawan kuyani. Chayna ruwasqanqa yanapawanmi imapas tantiasqankunamanta mana iskayrayanaypaq hinaspa chaylla kasukunaypaq”, nispa. w23.05 21 parr. 5