Sumaq huertamanta

¡ALLPATA qaway! ¡Sumaqllañam tukuy imapas kachkan! Qaway qorakunatawan sachakunata hinaspa waytakunatawan tukuy rikchaq animalkunatapas. ¿Maypitaq kachkan elefantepas hinaspa leonkunapas?

¿Maymantam kay suma-sumaq huertaqa rikuriramun? Qawasunchikyá imaynatam Diosqa kay Allpata ñoqanchikpaq allicharqa.

Qallariypiqa Diosqa qorakunatam unancharqa allpapi cantonmanta cantonkama wiñananpaq. Chaymantapas imaymana plantachakunata hinaspa tukuy rikchaq sachakunatam rurarqa. Kaykunam Allpataqa sumaqyachin. Ichaqa manam chayllachu. Wakinkunaqa miskillataña mikunanchikpaqmi rurasqa kachkan.

Chaymantam Diosqa challwakunata unancharqa yakupi kawsanankupaq, unancharqataqmi alton pawaq animalkunatapas. Allqokunatapas, misikunatapas, caballokunatapas; chaymanta hatun hinaspa taksa kaq animalkunatapas unancharqam. ¿Wasikipa hichpanpi kachkanchu animalkuna? ¡Maynata kuyawaspanchikraq Diosqa kaykunata ñoqanchikpaq rurarqa!

Tukuruspanmi Diosqa Allpapa huknin partechallanpi suma-sumaq huertata rurarqa. Chaytam Eden huerta nispa suticharurqa. Chaypiqa llapa imakunapas allinmi kasqa. Sumaqllañataq kasqapas. Diosqa munarqam enteron Allpapi sumaq huerta rurasqanqa mastarikunanta.

Kaqtawan dibujota qaway. ¿Yachankichu imaraq huertapi mana kasqanta? Qawasunchikyá.