Jesus warma kaspan templopi tarikusqanmanta

QAWAY chay warmaqa yuyayniyoq runakunawan parlachkan. Paykunaqa Jerusalen templopi Diosmanta yachachiqmi kanku. Warmachañataqmi Jesusqa. Wiñaramusqaña, chaypiqa 12 watayoqñam kachkan.

Yachachiqkunaqa admirasqallañam kachkanku Diosmanta chaynataq Bibliapa nisqanmanta Jesuspa yachasqanwan. Ichaqa, ¿imanasqataq Joseywan Mariaqa mana chaypichu kachkanku? ¿Maypitaq paykunaqa kachkanku? Qawasunchikyá.

Watan-watanmi Jerusalenman Joseyqa familiantin Pascua fiestaman riqku. Nazaret llaqtamanta Jerusalen llaqtaman chayanapaqqa karutam illana. Chay tiempopiqa runakunapa carronkupas manam karqaraqchu. Chaymi runakunaqa chakillawanmi illaqku, hinaptinmi paykunaqa yaqa kimsa punchawta illaspankum Jerusalenmanqa chayarqaku.

Chaypaqa achkañam Joseypa ayllunpiqa karqaku. Chaymi Jesuspa sullka kaq wawqe-paninkunata atiendenanqa karqa. Hinaptinmi Jerusalenmanta Joseywan Mariaqa churinkunawan Nazaretman kutichkaptinkuñam, kutiqmasinkunawan Jesuspas risqanta piensarurqaku. Chaymi huk punchaw puriytaña richkaptinku, Jesustaqa manam tarirurqakuchu. Hinaspanmi tapukurqaku ayllunkunatawan reqsisqankunata, ¡ichaqa manam tarinkuchu! Hinaptinmi Jerusalen llaqtaman kutirirqaku chaypi maskanankupaq.

Hinaspam templopi chayraq tarirurqaku. Chaypim tiyakuchkasqa Diospa leynin yachachiqkunata uyarispan tapupayastin. Hinaptinmi llapa uyariqninkunam admirakurqaku yachasqanwan. Chaymi Mariaqa nirqa: ‘Wawalláy ¿imanasqamá kaytaqa rurawankiku? Taytaykiwan ñoqam llakisqallaña maskamuchkaykiku’ nispa.

Chaymi Jesusñataq nirqa: ‘¿Imanasqataq maskawarqankichik? ¿Manachu yacharqankichik Taytaypa asuntonkunapi kanayta?’ nispa.

Anchatam Jesusqa kusikurqa Diosmanta yachananpaq kasqan sitiokunapi tarikuspa. Chaynallataqmi ñoqanchikpas kananchikqa, ¿aw? Nazaret llaqtapi huñunakuykunamanqa Jesusqa sapa kutillam riq. Chay huñunakuykunapi atencionwan uyarispanmi Bibliamanta allinta yacharqa. Chaynaqa Jesuspa rurasqanman hinayá rurasunchik.