¿Imata ruwaspam kusisqa kawsakuchwan?

LLAPALLANCHIKMI kusisqa kawsakuytaqa munanchik ¿aw?... Ichaqa manam lliwchu kusisqaqa kawsakunku. ¿Imanasqa?... Tukuy imayuq kayllapi kusikuyta maskasqankuraykum.

Jesusmi imata ruwaspa kusisqa kawsakunamanta kaynata nirqa: “Imapas quqmi aswan kusisqaqa imapas chaskiqmantaqa”, nispa (Hechos 20:35). Hinaptinqa, ¿imatam ruwananchik kusisqa kawsakunapaq?... Qukuykuqmi kananchik ¿aw?...

Ichaqa, imapas chaskikuqqa ¿manaña kusisqa kananmantachu Jesusqa rimachkarqa?... Manam. ¿Kusikunkichu pipas imatapas quykusuptiki?... Lliwpas kusikunchikmi pipas imallatapas quykuwaptinchikqa.

Ichaqa imatapas quspam aswan kusisqaqa kasunchik. Chaymantam Jesusqa rimachkarqa. ¿Pitaq kanman pi runamantapas aswan qukuykuqqa?... Arí, Jehova Diosmi.

Diosmanta rimaspanmi biblia nin: ‘Payqa llapallan runakunamanmi vidata, samayta hinaspa tukuy imakunatapas quchkan’, nispa. Arí, Diosqa parata hinaspa intitam quwanchik tarpukuykuna qispiptin mikuyniyuq kanapaq (Hechos 14:17; 17:25). Chaychá bibliapiqa nin Diosqa ‘kusikuq Dios’ kasqanmanta (1 Timoteo 1:11). Diosqa anchatam kusikun imatapas quwaspanchik, chaymi ñuqanchikpas payta qatipakuspaqa kusisqa kasunchik.

Chaynaqa, ¿imatataq quchwan runamasinchikkunaman? ¿Ima niwaqtaq?... Wakinpiqa qullqiwan tiendamanta rantinaraqmi imapas kanman. Chaymi imatapas rantispa pimanpas quyta munaspaqa qullqikita huñunayki.

Ichaqa manam rantispallaraqchu imatapas quwaq. Quwaqtaqmi mana qullqillawanpas. Ichapas rupayllaña punchawpi yakunayachikuq runaman yakuta haywaykuwaq, hinaspaqa kusisqam kanki.

Chaymantapas tayta-mamayki ima miskichatapas quykusuptikiqa, ¿imatam ruwawaq aswan kusisqa kanaykipaq?... Hukkunamanmi malliykachiwaq ¿aw?...

Jesuspas hinaspa apostolninkunapas chayna qukuykuq kaspankum aswan kusisqa karqaku. ¿Runamasinkupaq ima ruwasqankutaq chayna karqa?... Diosmanta yachasqankuta mana imallapaq tukuy sunquwan yachachisqankum.

Huk kutipim Pablowan Lucas chayna qukuykuq warmiwan tuparurqaku. Chay warmiqa Diosta mañakunanku mayu patanpim kachkarqa. Chaypiqa achka warmikunam Diosta mañakuchkasqaku Pablowan Lucas chayaruptinkuqa.

Hinaptinmi Pabloqa Jehova Diosmanta suma-sumaqta yachachiyta qallaykurqa. Chay qukuykuq warmiqa Lidia sutiyuqmi karqa, paymi yachachisqankumanta agradecekuspan Pablotawan Lucasta nirqa: “Jehova Diosman sunqu kasqayta piensaspaykichikqa hamuspayá wasiypi samakuychik”, nispa. Chaynata nispanmi wasinpi samaykachirqa (Hechos 16:13-15).

Lidiaqa anchatam agradecekurqa Jehova Diosmanta, Jesucristomanta hinaspa imayna wiñay kawsay haypaymanta apostol Pablo yachachiptin. Chaymi paykunata wasinpi samaykachispan mikuynintapas qaraykurqa. Tukuy chaykunata quspanmi Lidiaqa anchata kusikurqa sunqumanta qusqanrayku. Chaynam ñuqanchikpas kananchik. Pipas runamasinchikman imallatapas qunanchikpaq niwaptinchikqa, sunqumanta quspallam kusisqaqa kasunchik.

¿Imatam ruwawaq caramelochayki kaptin warmamasikiman malliykachinaykipaq niptiy? ¿Kusikuwaqchu ñuqa niptillay quspayki?... Icha, ¿kikikimanta quspaykichu aswan kusisqaqa kawaq?...

Pipas kuyasqanchikmanqa imatapas mana tupuspam quykunchik. Chaynallatataqmi Diostapas kuyaspaqa sunqumanta paypaq imatapas ruwasunchik.

Chayna tukuy sunquwan Diosta kuyaq warmitam Jesusqa Diospa wasinpi rikurqa. Chay warmiqa wakcha kayninpim qullqi churana cajachakunapi iskay qullqichankunata churarqa. Manam pipas chayta ruwananpaqqa hikutarqachu, aswanqa Jehova Diosta kuyasqanraykum tukuy sunqunwan qullqichanta churarqa. Chay ruwasqanwanmi anchata kusikurqa (Lucas 21:1-4).

Hinaptinqa, ¿imakunata ruwaspataq qukuykuq kasqanchikta qawachichwan?... Imatapas sunqumanta quspaqa ancha-anchatam kusikusun. Chaymi Jesuspas kamachiwanchik qukuykuq kanapaq (Lucas 6:38). Kasukuspaqa runamasinchiktam kusichisun, hinaspam kikinchikpas kusisqa kawsakusun.