¿Imapipas puntapi kayllatachu munanki?

¿RIQSINKICHU imapipas puntapi kaylla munaq warmata?... Ichapas tanqakuspanraq imapipas puntapi churakurun ¿aw?... Jesuspas rikurqam hatun runakunapas riqsisqa runakunapa tiyanallanpi tiyay munaqkunata. Chay qawasqan Jesuspaq mana allin kasqanmantayá yachaykusun.

Bibliapim willakun fariseo runa Jesusta wasinpi mikunanpaq qayachisqanmanta. Chaypim Jesusqa rikurqa fariseopa wasinman chayaq runakunaqa riqsisqa runakunapa tiyananpi tiyanankupaq akllakusqankuta. Chaymi huk rikchanachiywan yachachiyta qallaykurqa. ¿Munawaqchu uyariykuyta?...

Jesusmi nirqa: ‘Casarakuy convidoman rispaykiqa, amayá riqsisqa runakunapa tiyananpiqa tiyakuruychu’, nispa. ¿Imanasqataq chaynata nirqa?... Kikin Jesusmi nin: ‘Ichapas riqsisqa runa hamuptin invitasuqniki nisunki: ‘Paymi kaypiqa tiyanqa, qamqa qipa lawman riy’, nispa. ¿Imaynataq chay runaqa tarikunman?... Pinqakuywanchiki wañunman llapa runapa qayllanpi qipa lawman risqanrayku.

Chaywanmi yachachichkarqa imatapas allinllanta maskayqa mana allin kasqanta. Hinaspam nirqa: “Invitasqa kaspaykiqa qipallapiyá tiyakuy, chaynapi invitasuqniki hamuruspan ‘taytáy ñawpaqpi qamqa tiyakamuy’ nisunaykipaq. Hinaptinqa llapa runakunapa qayllanpim allin kanki”, nispa (Lucas 14:1, 7-11).

¿Imatataq Jesusqa chay rimasqanwan yachachichkarqa?... Chaymanta astawan yachanapaq tapusqayki: Carropi achka runakuna rinaykichik kaptinqa, ¿allinchu kanman yuyaqkuna sayanpalla riptinku qamñataq asientopiraq hawka tiyakuyniki?... ¿Kusikunmanchu Jesus chayta ruwaptiki?...

Ichapas pipas nisunkiman chayqa Jesustaqa mana imapas qukusqanta. Ichaqa, ¿chaynachu kanman?... Chay rimasqanchik fariseo runapa wasinman mikuq Jesus rispanqa runakunapa ima ruwasqankutam qawachkarqa. Kunanpas, ¿qawamuchkanmanchu ruwasqanchikkunata?... Arí, hanaq pachamantam Jesusqa imatapas qawamuchkan.

Pipas puntapi kayllata maskaq runaqa ima sasachakuymanpas chayllam yaykurun. Sichum carropi allin tiyanata maskanankurayku llallinakuspa wakin warmakuna riptinkuqa, ¿ima ninqakutaq allin tiyanata mana tariq wakin warmakuna?... Punta riq warmakunapaqchiki piñakunqaku.

Chayna sasachakuykunatam apamun puntapi kayllata maskayqa. Jesuspa apostolninkunapas 6 kaq yachachikuypi rimamusqanchikman hinam pi aswan riqsisqa kasqankumanta piñanakurqaku. ¿Imatam Jesusqa ruwarqa?... Pantasqankutam qawachirqa. Ichaqa hinallam riqsisqa kayta munasqankuwan sasachakurqaku. Chaymantayá rimasun.

Jesusqa qatiqninkunawan kuska Jerusalenman chay kutillaña risqanpim rimarqa hanaq pachapi kamachiq kananmanta. Santiagowan Juanñataqmi Jesuswan kuska kamachiq kanankupi yuyaymanaspanku mamanku Salomeyman willakurqaku (Mateo 27:56; Marcos 15:40). Chaymi mamankuqa kumuykuspanraq Jesusta wawankunapaq favorta mañakurqa.

Jesusñataqmi nirqa: “¿Imatataq munanki?”, nispa. Salomeyñataqmi Jesus kamachiptin wawankuna huknin alliq lawninpi hukninñataq ichuq lawninpi tiyaykunankupaq mañakurqa. Hinaptinqa, ¿ima nirqakutaq Jesuspa wakin apostolninkunaqa?...

Anchatam Juanpaqwan Santiagopaq piñakururqaku. Chaymi Jesusqa yachachirqa nacionkunata kamachiq runakunalla riqsisqa kayta utaq atiyniyuq kayta maskasqankumanta. Hinaspam nirqa: ‘Manam chaynachu qamkuna ukupiqa kanan, aswanqa qamkunamanta pipas puntapi kayta munaspanqa qamkunapa serviqnikichikmi kanan’, nispa (Mateo 20:20-28).

¿Imaynataq runata serviq runaqa?... Mana hatun tukuqmi hinaspa kamachisqankuta kasukuqmi, manam puntapi churakuyta munaqchu nitaq hukkunapa servisqanchu. Chaymi Jesusqa nirqa pipas puntapi kayta munaspanqa hukkunapa serviqnin kananmanta.

¿Ima ninantaq chayqa?... ¿Sirviente runaqa atipanakunmanchu patronninwan maypi tiyanankumanta utaq mayqinku puntata mikunankumanta?... Jesusqa nirqam sirviente runaqa patronninta imapipas puntapi churasqanmanta (Lucas 17:7-10).

Chaynaqa, ¿imatam puntapi kayllata maskanamantaqa ruwananchik?... Hukkunapa serviqninmi kananchik. Chayta ruwaspam ñuqanchikmantapas puntapi hukkunata churasun. ¿Imakunatataq ruwananchik hukkunata puntapi churanapaqqa?... Imakuna ruwanamanta yachanaykipaq qaway 40 hinaspa 41 kaq paginakunata.

Ichapas yuyachkanki Jesusqa apostolninkunapa chakinta mayllaspanpas runakuna servisqanta. Ñuqanchikpas runakunata servispam mana hatun tukuq kasqanchikta qawachisun, hinaspam Jesustawan Jehova Diosta kusichisun.