Jesusqa haykapipas kasukurqam

¿Chayllachu tayta-mamaykita kasukunki? . . . Wakinpiqa sasam ¿aw? Ichaqa, ¿imataq yanapasunkiman kasukuq kanaykipaq? Jesusmanta yachaynikim. Payqa kasukurqam tayta-mamanta hinaspa Jehova Diostapas. ¿Yacharqankichu chayta? . . . Chaynaqa, astawanyá Jesusmanta yachasunchik.

Jesusqa kay Pachaman manaraq hamuchkaspanmi hanaq pachapi taytan Jehova Dioswan yacharqa. Ichaqa kay Pachapi kawsaspanmi huk tayta-mamayoq karqa. Paykunapa sutinmi karqa Josey hinaspa Maria. ¿Munawaqchu yachayta paykunamanta? . . .

Jesus kay Pachapi nacenanpaqqa, Jehova Diosmi paypa vidanta Mariapa wiksanman hinaykurqa. Jesusqa isqon killam mamanpa wiksanpi wiñarqa wakin wawakuna hina, hinaspam nacerqa. Chaynapim Mariaqa wawayoq karqa. Paymi qosanpiwan Jesusta uywarqaku.

Jesusqa 12 watanpi kachkaspanmi Jehova Dios kuyasqanta qawachirqa. Chaytam ruwarqa familianpiwan Jerusalenman risqankupi. Chaymanqa Jehova Diosta yupaychanankupaqmi rirqaku. Ichaqa Joseywan Maria wasinkuman kutispankum, Jesus paykunawan mana risqanta musyakururqaku. ¡Manamá maypipas rikurirqachu! ¿Yachankichu imatam Joseywan Mariaqa ruwarqaku? . . .

Paykunaqa chayllam Jerusalenman kutirqaku Jesusta maskanankupaq. Kimsa punchawmi tukuy hinastinpi maskarqaku. ¡Mancharisqam kachkarqaku! Ichaqa templopim tarirurqaku. ¿Yachankichu imanasqa chaypi kasqanmanta? . . . Chaypim Jehova Diosmanta astawan yacharqa. Jesusqa Taytanta kuyasqanraykum allin kaqkunata ruwaspan kusichiyta munarqa. Chaymi wiñaruspanpas Jehova Diosta kasukurqa sasaña kaptinpas otaq runakuna mana allinta ruwaptinkupas. ¿Yaqachu Jesusqa kasukurqa Joseytawan Mariatapas? . . . Bibliam nin kasukuq kasqanmanta.

¿Imatam Jesusmanta yachachwan? . . . Sasaña kaptinpas, tayta-mamataqa kasukunam. ¿Qampas chaytachu ruwanki? . . .