3 KAQ YACHACHIKUY
Sasachakuykunata imayna allichanamanta
“Tukuy imamantapas llalliriqtaqa kuyanakuychikyá, kuyanakuyqa maynaña huchatapas chinkachinmi” (1 Pedro 4:8).
Casado vidapiqa kanmi sasachakuykuna mana chaynallata piensasqankurayku hinaspa mana chaynalla uywasqa kasqankurayku. Chaymantapas yaqapaschá huk sasachakuykunapas rikurimunman.
Bibliam nin sasachakuyta saqenamantaqa allichay aswan allin kasqanmanta (Mateo 5:23, 24). Bibliapa nisqanta kasukuspallaykim sasachakuykuna allichaytaqa atinki.
1 SASACHAKUYMANTA RIMAYCHIK
BIBLIAM NIN: “Kanmi rimanapaq tiempo” (Eclesiastes 3:1, 7). Chaynaqa sasachakuyta allichanaykipaqqa tiempochakunaykim. Ama llullakuspa señoraykiman otaq qosaykiman willay imayna tarikusqaykita hinaspa ima piensasqaykitapas (Efesios 4:25). Piñasqa kaspaykiqa, hawkalla kanaykipaq kallpanchakuy. Llampu simillawan rimaypas yanapakunmi imallamantapas mana pelearunapaq (Proverbios 15:4; 26:20).
Tanteasqaykichik mana chaynalla kaptinpas ama piñakuychu, aswanqa kuyasqaykita hinaspa respetasqaykita qawachiy (Colosenses 4:6). Sasachakuykunata chaylla allichaspaykichik, rimanakuytaqa ama saqeychikchu (Efesios 4:26).
¿IMATAM RUWAWAQ?
Sasachakuynikichikta haykapi allichanaykichikpaq tanteay
Señorayki otaq qosayki rimayta tukunankama uyariy, hinaspa chaymantaña rimay
2 UYARIY HINASPA PACIENCIAKUY
BIBLIAM NIN: “Lliwchaykichik sumaqllataña kuyanakuychik. Respetanakuspayá wakinnikichikta imapipas aswan allinpaq hapiychik” (Romanos 12:10). Señoraykipa otaq qosaykipa nisqanta uyariyqa ancha allinmi chaynataq imayna piensasqanta entiendeypas, chaynapim entiendenki imayna sientekusqanta (1 Pedro 3:8; Santiago 1:19). Atikuptinqa imapas ruwasqaykita saqespayki señoraykita otaq qosaykita uyariy otaq chaymantaña rimanaykichikpaq niy. Amistadnikita hina qawaspaykiqa manam chayllaqa piñakurunkichu (Eclesiastes 7:9).
¿IMATAM RUWAWAQ?
Señoraykipa otaq qosaykipa nisqan mana gustoykipaq kaptinpas hinalla uyariy
Reparay rimaspan ima niy munasqanpi hinaspa imayna rimasqanpipas
3 HINALLA KALLPANCHAKUY
BIBLIAM NIN: “Imapipas llamkaq runaqa allin kaqkunatam tarin. Rimaylla-rimaq runaqa wakchayayllatam tarin” (Proverbios 14:23). Sasachakuyta imayna allichanapaq tantearuspaykichikpas chayman hinam ruwanaykichik, anchata kallpanchakunaykichik kaptinpas (Proverbios 10:4). Kuskaykichik kallpanchakuspaykichikqa achka bendicionkunatam chaskinkichik (Eclesiastes 4:9).
¿IMATAM RUWAWAQ?
Sasachakuyta imayna allichanaykichikpaq sapakama tanteaychik
Sapa kuti qawaychik hayka kallpanchakusqaykichikta