Rimasqanman hina Jeftey ruwasqanmanta

Kaqmantam Israel runakunaqa Jehova Diosta qunqaruspa taytacha-mamachakunata yupaychayta qallaykurqaku. Chay taytacha-mamachakunaqa manam yanaparqachu Ammon runakuna ñakarichiptinkuqa. Chaymi Israel runakunaqa Jehova Diosta mañakuspa nirqaku: “Huchallikurullanikum, ama hina kaspayá libraykullawayku”, nispa. Hinaspam taytacha-mamachankuta ñutuparuspa kaqmanta Jehova Diostaña yupaycharqaku. Hinaptinmi Diosqa ñakarisqankuta qawaspan llakipayaykurqa.

Israel runakunaqa Jeftey sutiyuq runatam akllarqaku soldadokunata kamachiq kananpaq, chaynapi Ammon runakunawan peleananpaq. Jefteyñataqmi Jehova Diosta kaynata mañakurqa: “Ammon runakunata makiyman churaykuptikiqa, wasiyman kutiptiy punta lluqsimuqtam qusqayki”, nispa. Jehova Diosqa Jefteypa mañakusqanta uyariykuspam yanaparqa.

Wasinman Jeftey kutiruptinmi sapallan warmi churin panderetata salsalyachistin hinaspa tusustin puntata lluqsiramurqa. Jefteyqa Diosman nisqanta yuyariruspanmi nirqa: “¡Ay churilláy! Llumpay llakimanmi wichiykuni. Jehova Diostam nirqani ima ruwanaymanta, chaymi Silo llaqtapi kaq Diospa carpanpi servinaykipaq rinayki kanqa”, nispa. Churinñataqmi nirqa: “Taytáy, nisqaykiman hinayá ruway, ichaqa kayllatam mañakuyki: Urqukunaman iskay killa sipasmasiykunawan rinaypaqyá saqiykullaway. Kutiramuspayqa Diospa carpanmanñam risaq”, nispa. Churinqa Diosman sunqu kasqanraykum wañukunankama Diospa carpanpi servirqa, sipasmasinkunapas sapa watam watukuqku.