Mana manchakuq Jonatanmanta

Saulpa piwi churin Jonatanqa allin peleaqmi karqa. Davidmi Jonatanmanta nirqa ankamantapas aswan apurawman kallpaq kasqanmanta hinaspa leonmantapas aswan kallpasapa kasqanmanta. Huk punchawmi Jonatanqa Filistea soldadokunata urqupi rikuruspan yanapaqninta nirqa: “Filistea soldadokuna qispinanchikpaq niwaptinchikqa, yachasunmi paykunawan peleananchikpaq Dios yanapawananchikmanta”, nispa. Filistea runakunañataqmi nirqaku: “¡Qispimuychik!”, nispa. Chayraykum Jonatanwan yanapaqninqa qispiruspanku 20 Filistea soldadokunata wañurachirqaku.

Jonatanqa Saulpa piwi churin kasqanraykum taytan wañukuptin payña kamachinan karqa. Ichaqa yacharqam Davidta kamachiq kananpaq Jehova Dios akllasqanmanta, chaywanpas Jonatanqa manam Davidpaqqa piñakurqachu, aswanqa allin amistadmi karqaku. Chaymi Jonatanqa Davidman pachanta, espadanta, flechantawan wiqaw watakunanta quykurqa. Hinaspapas yanapanakunankupaqmi ninakurqaku.

Saulmanta David ayqikuptinmi Jonatanqa Davidpa kasqanman rispan nirqa: “Ama manchakuychu. Qamtaqa Diosmi akllasurqanki kamachiq kanaykipaq, chaytaqa taytay Saulpas yachanñam”, nispa. Kusisqach kawaq Jonatan hina amistadniki kaptinqa, ¿aw?

Jonatanqa wañuytapas mana manchakuspanmi Davidta yanaparqa. Payqa yacharqam Davidta taytan Saul wañuchiy munasqanta, chaymi taytanta nirqa: “Sichum Davidta wañurachispaykiqa huchallikurunkim. Payqa manam imanasurqankichu”, nispa. Chaymi Saulqa Jonatanpaq piñakururqa. Watakunapa risqanman hinataqmi Saulwan Jonatanqa guerrapi wañuchisqa karqaku.

Mefibosetmi Jonatanpa churin karqa, chaymi Jonatan wañukuptin Davidqa Mefibosetta maskarqa. Tariruspanmi nirqa: “Taytayki allin amistadniy kasqanraykum qamta uywakusqayki”, nispa. Davidqa manam qunqarqachu amistadnin Jonatantaqa.