Tukuy sunquwan Jehova Diosta Josias kuyasqanmanta

Josiasqa pusaq watachallanmantam Juda nacionta kamachiyta qallaykurqa. Chay tiempopi runakunaqa layqanakuypim kaqku, hinaspapas taytacha-mamachatam yupaychaqku. 16 watanpim Josiasqa Jehova Diosta aswan allinta yupaychayta munarqa, chaymi 20 watanpi taytacha-mamachakunata chinkachiyta qallaykurqa. Hinaspam 26 watanpiqa Jehova Diospa wasintaña allichachirqa.

Sacerdotekunapa kamachiqnin Hilkiasmi Diospa wasinpi tarirurqa Diospa kamachikuyninkunamanta rimaq qillqata, yaqapaschá karqa Moisespa qillqasqanraq. Chay qillqatam Josiasman secretarion Safan leepurqa. Chayta uyariruspanmi Josiasqa musyarurqa runakuna Jehova Diosta unay wataña mana kasukusqankuta, chaymi Hilkiasta nirqa: “Jehova Diostam piñarachinchik, tapumuyá imata ruwananchikpaq”, nispa. Jehova Diosñataqmi willakuqnin Hulda sutiyuq warmiwan nichirqa: “Juda nacionpi runakunam qipancharuwan, chaymi castigasaq. Ichaqa manam Josias kamachichkaptinqa, payqa llampu sunqum”, nispa.

Chayta uyariruspanmi Josiasqa Juda runakunata Diospa wasinman huñururqa, hinaspam Diospa kamachikuyninkunata leepurqa. Chaymi runakunaqa nirqaku tukuy sunqunkuwan Jehova Diosta kasukunankupaq.

Pascuata sapa wata ruwanamanta leeruspanmi, unay wataña mana ruwasqankurayku runakunata Josias nirqa: “Jehova Diospaqyá pascuata ruwasunchik”, nispa. Hinaspam Josiasqa kamachirqa achka animalkunata wañuchispa kañanankupaq chaynataq Diospa wasinpi takiqkunapas kananpaq. Chaymi pascuata ruwarqaku, chaymantam mana levadurayuq tantata ruwana punchawta qanchis punchaw yuyarirqaku. Samuelpa tiemponmantaraqmi chaynataqa mana ruwarqakuchu. Josiasqa tukuy sunqunwanmi Jehova Diosta kuyarqa, qampas paytam qatipakunayki.