Llaqtamasinkunata Ester salvasqanmanta

Ester sutiyuq sipasmi Persia nacionpi Susa llaqtapi yacharqa. Payqa karqa Juda kastamantam. Ñawpaqpim kamachiq Nabucodonosor Jerusalen llaqtata munaychakuruspan Esterpa ayllunta nacionninman aparurqa. Estertam primon Mardoqueo uywakurqa. Mardoqueoqa Persia nacionta kamachiq Asueropa serviqninmi karqa.

Kamachiq Asuerom huk warmitaña kikinpaq maskachirqa, chaymi sumaq rikchayniyuq sipaskunata huñumurqaku, chaypim Esterpas karqa. Chay warmikunamantam Asueroqa Esterta akllarurqa. Esterqa Mardoqueo nisqanraykum mana willakurqachu Juda kastamanta kasqanta.

Kamachiq Asueroqa Haman sutiyuq runatam llapallan kamachiqkunapa kamachiqnin kananpaq churarurqa. Hamanñataqmi hatuntukuruspan ñawpaqninpi lliw runakuna qunqurakunankuta munarqa. Mardoqueom ichaqa mana qunqurakurqachu, chaymi Hamanqa llumpayta piñakuruspan wañuchiyta munarqa. Mardoqueoqa Juda kastamanta kasqanta yacharuspanmi kamachiq Asuerota Haman nirqa: “Juda runakunaqa manam kasusunkichu. Llapankutayá wañuchisun”, nispa. Asueroñataqmi nirqa: “Tantiasqaykitayá ruway”, nispa. Chaymi Hamanqa Adar sutiyuq killapa 13 punchawninpi Juda runakunata wañuchinankupaq kamachirqa. Tukuy chaykunatam Diosqa qawarqa.

Esterqa manam chayna kamachisqanmantaqa yacharqachu. Mardoqueom paymanqa Juda runakuna wañuchisqa kanankumanta willachimurqa, hinaspam nirqa kamachiq Asuerowan rimananpaq. Esterñataqmi nirqa: “Mana qayachichkaptin asuykuqqa wañunmi. 30 punchawñam mana qayachiwanchu, ichaqa risaqmi. Sichum tawnanta haywariykuwaptinqa kawsasaqmi, sichum mana haywariykuwaptinqa wañusaqmi”, nispa.

Chaymantam Esterqa kamachiq Asueropa kasqanman rirqa. Esterta rikuruspanmi Asueroqa tawnanta haywariykuspan tapurqa: “¿Imatataq mañakuwanki?”, nispa. Esterñataqmi nirqa: “Kunanyá convido ruwasqayman serviqniki Hamanpiwan hamuychik”, nispa. Chaypi kaspankum nirqa huktapas convido ruwasqanman kutinankupaq, chaypitaqmi Asueroqa kaqmanta Esterta tapurqa ima munasqanmanta. Esterñataqmi nirqa: “Kamachiqlláy, ñuqatawan llaqtamasiykunatayá wañuymanta harkaykullawayku. Huk runam wañuchiyta munawachkanku”, nispa. Asueroñataqmi nirqa: “¿Pitaq chay runaqa?”, nispa. Esterñataqmi nirqa: “Chiqniwaqniyku mana allin ruwaq runaqa kay Hamanmi”, nispa. Hinaptinmi Asuero llumpayta piñakuruspan Hamanta wañuchinankupaq kamachirqa.

Asueroqa manam Hamanpa kamachikuy hurqusqantaqa chinkachiyta atirqachu, chaymi Hamanpa rantinpi Mardoqueotaña churarqa, chaynapi huk kamachikuyta hurqunanpaq. Chaynapim Mardoqueoqa Juda runakunata kamachirqa peleanankupaq, ¿imanasqa? Mana wañunankupaqmi. Adar sutiyuq killapa 13 punchawninpim atiparurqaku, hinaspam kusikuyllawanña sapa wata chay punchawta yuyarirqaku.